یەكگرتوو لە دەروازەی قۆناغی ڕاگوزەریدا

لەدوای بەستنی كۆنگرەی حەوت و كۆتایی هاتنی ڕۆژووگرتنی مانكی رەمەزان و جەژنەكەشی، ئێستە ئیتر سەرەتای دەستپێكی ئەو قۆناغە ڕاگوزەرییە دەستپێدەكات كە بەڕێز مامۆستا سەلاحەدین موحەممەد بەهائەدین لەوتارەكەیدا لە كۆنگرە ئاماژەی پێكرد، لەڕاستیدا ئەم ئاماژەیەی بەڕێزیان بووە هیوایەك بۆ زۆرمان و پێمانوابوو كە مادام ئەم قۆناغە ناونراوە ڕاگوزەری كەواتە بزاوتنێكی گەورە دەبێت بۆ فەراهەمكردنی ئامانجێكی گەورە.


قۆناغی ڕاگوزەری سروشتی وایە كە دەبێتە وێستگەی وەستان و تێهەڵچونەوە بە تەواوی ئەو هەنگاو و میكانیزمانەی كە پێشتر گیراونەتەبەر و سودیان نەبووە یان زیانیان هەبووە یان لانی كەم یەكگرتوویان بەرەوپێش نەبردووە، هەورەها دیاریكردن و فۆرمەلەكردنی شێواز و ڕێگەو ڕێبازی نوێیە بۆ ئەو هەنگاوانەی كە بۆ داهاتوو دیاریدەكرێن.


ئیدی لەم ساتە بەدواوە سەركردایەتی حیزب دەبێت ئەجێندای ئەم قۆناغە بخاتە ڕوو، هەر كاراكتەرێك ڕۆڵی خۆی بۆ دیاریبكرێت و لێی ئاگادار بكرێتەوە، بەزوترین كات كارە ڕۆتینییەكان تێپەڕێنرێن و ئەوەی كەماوە لە هەڵبژاردنی ئۆرگانەكان سەقفێكی زەمەنی زۆر كورتی بۆ دیاریبكرێت و قۆناغی دەسپێكردنی كاری جددی دیاریی بكرێت، جەموجۆرییەك بكرێت لە دەزگاكان و پەرشوبڵاوەكان كۆبكرێنەوە و زۆریش گرنگە ئیدی واز لە كاردۆزینەوە بۆ كەسەكان بهێنین و كەسەكان بۆ كار بدۆزینەوە، تكایە با ئێمە هۆكاری نزیكبونەوەی قیامەت نەبین، بەوەی كارەكان بسپێرینە كەسانی نەشیاو " إِذَا وُسِّدَ الْأَمْرُ إِلَى غَيْرِ أَهْلِهِ ؛ فَانْتَظِرْ السَّاعَةَ ".


گرنگترین شت بەرچاوڕونییە، مرۆڤ دەبێت بزانێت بەرەو كوێ‌ هەنگاو دەنێت و مەبەستی چییە لە هەنگاوەكانی،( ۆاقْصِدْ فِی مَشْیِك) تەنها تایبەت نییە بە شێوەی رۆشتن و دوربون لە كەشوفش و خۆبەگەورەزانی بەڵكو بۆ دیاریكردنی ئامانج و بەرچاوڕونی ئەوسەری ڕێیە، مرۆڤ هەركات لەتاریكیدا هەنگاو دەنێ‌ یان ترسی هەیە پێ‌ بە شتێكی زیانبەخشدا بنێ‌ یان بكەوێتە چاڵیكەوە، ئەگەر وێناكە گەورە بكەین بۆ جەمع و گروپ و كۆمەڵ و پارتەكانیش هەر ڕاستە، بە بڕوای من پێویستە ڕاگەیاندن و ڕێكخستن و ڕێكخراوەكانیش بە ئاراستەی خزمەتكردن بەو ئامانجانە هەنگاو بنێن و كارو چالاكییەكانیان بەئەنجام بگەێنن.


لەكۆتاییدا:


دەبێت یەكگرتوو گەورەتر لەخۆی بیر لە قۆناغەكە بكاتەوە، ئێستە كوردستان بەدۆخێكدا تێپەڕ دەبێت زۆر پێویستی بە هەناسەی دڵسۆزانە و دوور لە بەرژەوەندی تایبەتی هەیە، ئەوەش لە یەكگرتوودا هەیە – ئیدی خەڵك پێبزانن یان نەزانن واقیعەكە بەوجۆرەیە- بۆیە هەوڵەكانی جەنابی ئەمینداری گشتی لە مانگی ڕەمەزانی پیرۆزدا هەم جێی نرخاندن و دەستخۆشین هەم سەلمێنەری ئەو ڕاستییەن كە ئەوە یەكگرتووە خەمی ئەزمونی ئەم هەرێمەیەتی و لەبەرامبەر ئەم خەمەشیدا هەمیشە باجی داوە و دەستخۆشی لێنەكراوە، بۆیە ئەركی سەركردایەتی حیزب قورسترە، هەم ئەركی بەڕێوەبەردنی قۆناغی ڕاگوزەری و هەم ئەركی ئاشتەوایی و سەرپەرشتی كردنی پرسە نیشتیمانییەكەش، ئەمەش بە هەموان دەكرێت و پشكی هەموانی تێدایە بۆیە دەبێت بڕیارێكی جددی بدەین كە شان بدەینە بەر ئەم بەرپرسیارێتییە و ئەوەی كە بەرمان دەكەوێت بەوپەڕی توانامان بەئەنجامی بگەێنین.