ھەفسەنگیا ھێزێ دێ بارودوخێ ھەرێمێ پتر ئالوز کەت

ھەڤسەنگیا ھێزێ ب رامانا خوە یا سیاسی ئانکو وەکھەڤی دھێزێ دا، کو دەما لایەنەک یان کومەکا لایەنان لسەر ئاستێ ناڤخویی و دەولەتەک یان کومەکا دەولەتان لسەر ئاستێ نێڤدەولەتی ھەست ب مەترسیا ھێزەکا ژ خوە مەزنتر ل سەر بەرژەوەندیێن خوە دکەن، پێکولێن کاراکرنا سیستەمێ ھەڤسەنگیا ھێزێ دکەن ژبوی کو ھێزا خوە وەکھەڤ یان ژی پتر ژ یا لایەنێ بەرامبەر یێ ناکوک لێ بکەن و پتریا جاران سیستەمێ ھەڤسەنگیا ھێزێ ب رێکا دروستکرنا ھەڤپەیمانان دھێتە کاراکرن.

ئەگەر چ ژ لایێ لوژیکی ڤە گەلەک ژ سیاسەتمەدار و ڤەکولەران دوێ باوەرێ دانە کو ھەڤسەنگیا ھێزێ دبیتە ئەگەرێ نەھێلانا دوژمنکاریێ دناڤبەرا دوو لایەنێن ناکوک دا، لێ د وارێ پراکتیکی دا دھێتە دیتن کو سیستەمێ ھەڤسەنگیا ھێزێ گەلەک خالێن نەرێنی ھەنە، و ھند جاران دبیتە ئەگەرێ ھەڤرکیەکا مەزنتر. چونکە ھەردوو لایەنێن ناکوک خوەدی ھێزەکا مەزنن و د ئامادەنینن تەنەزولێ بو یێ بەرامبەر بکەن. بو نمونە: درێژبوونا جەنگێن سار دناڤبەرا ویلایەتێن ئێکگرتی یێن ئەمریکا و ئێکەتیا سوڤیێتێ بو ماوەیەکێ درێژ ژ ئەگەرێ ھەڤسەنگیا ھێزێ بوو دناڤبەرا ھەردوو لایان دا. ھەروەسا سەروکێ بەرێ یێ ئەمریکا وورد وێلسوون ب دژی سیستەمێ ھەڤسەنگیا ھێزێ بوو و ب دیتنا وی ئەڤ سیستەمە ئەگەرێ سەرھلدانا جەنگێ جیھانی یێ دووێ بوو.

ل ھەرێما کوردستانێ ژی پشتی رێککەفتنا (ئێکەتی – گوران) بارودوخ بەر ب ھەڤسەنگیا ھێزێ ڤە چوو، و ئەگەر چ ئێکەتی و گوران بانگەشەیا وێ یەکێ دکر کو ئەو دێ ڤی سیستەمی بکارئینن بو ئاسایی کرنا بارودوخێ ھەرێمێ، لێ د کارڤەدانێن دەسپێکی دا دیار بوو کو بارودوخ دێ ئالوز تر لێ ھێت و ژ دیارترین نمونەیان ژی ئینانا مالکی بو سلێمانیێ ژلایێ ئێکەتی و گوران ڤە کارڤەدانێن نیگەتیف ژلایێ جادێ ڤە بدویڤ خوە ھێلان.

لایەکێ دن یێ نیگەتیڤ د ھەڤسەنگیا ھێزێ دا ل ھەرێما کوردستانێ دوو گوتاریا کوردان لە بەغدا، کو بەری رێککەفتنا (ئیکەتی – گوران) تارادەیەکێ باش کورد یەک ھەلویست بوون، لێ دنوکە دا دوو گوتاریەکا بەرچاڤ دھێتە دیتن پارتی وەک ھێزا زال سەرەدەریێ دکەت و ئێکەتی و گوران ژی خوە ب ھێزا زال دزانن ئەڤ چەندە ژی دیار بو پشتی ئێکەتی و گوران بێی ئاگەھداریا لایەنێن دن یێن ھەرێمێ سەرەدانا بەغدا کرین. ئەڤ سەرەدەریە دێ کارتێکرنەکا نەرێنی ل سەر بەرژەوەندیێن ھەرێمی کەت و دبیت لایەنێن عیراقی ب تایبەت شیعە نە ئێکگرتنا کوردان بو بەرژەوەندیێن خو بکاربینن. بتایبەت بابەتێ ریفراندومێ و سەرخوەبونا ھەرێما کوردستانێ دێ ب زەحمەت تر لێ ھێت.

د بابەتێ قەیرانا دارایی و ئاسویێن چارەسەریێ دا خەلکێ ھەرێما کوردستانێ دێ پتر باجا سیستەمێ ھەڤسەنگیا ھێزێ دەن ژبەر کو پارتی سیاسەتا برسیکرنێ بکاردئینیت و دەمێ لایەنەکێ ھەڤرک بو وێ پەیدا دبیت پتر قەیرانان دروست دکەت دا کو خەلک ھوسا ھزر بکەن ئەگەرێ ڤی بارودوخێ ئالوز لایەنێن ناکوکێن وێ نە.

یا ژ ھەمیان گرنگتر ھەلبژارتنێن داھاتی کو ھوسا بریارە ئێکەتی و گوران ب ئێک لیست بەژدارببن، ئەگەرێن پتر ئالوز بونا بارودوخێ سیاسی دێ بھێز بن، ژبەرکو وەکھەڤی یان زورینەکا کێم ل بەرامبەر لایەنێ بەرامبەر د دەنگدانێ دا ژلایێ ڤان ھەردوو ھێزان ڤە دێ پرسگرێکان د پێکئینا حکوومەتێ دا و چەندین بابەتێن دن دروست کەت. چونکە ب ساناھی نابیت ھەر لایەک تەنازولێ بو یێ بەرامبەر بکەت و ئەگەرێن دروستبوونا دوو ئیدارەیی یێ ژی دێ پتر ب ھێز کەڤن.