سەبارەت بە یەكبوونی ئیسلامیەكان

دیارە دوای هەڵبژارندی بەرێز مامۆستا صلاح الدین بە ئەمینداری گشتی لە كۆنگرەی حەفتەم، ئەوەش دوای ئەوە دێت كە بەرێزیان دوو دەستپێشخەری هەبوو بەر لەوەی ببێتەوە ئەمینداری گشتی، كاتێك دەست بەكار بوو بەردەوام بوو لەسەر ئەو دوو هەڵوێستەی.
یەكەمیان بۆ لێك نزیك بونەوەی لایەنە كوردستانیەكان و دووەم: لێكنزیك بونەوەی لایەنە ئیسلامیەكان، سەبارەت بە دەستپێشخەری یەكەم پێشوازیەكی گەرمی لێكرا لەلایەن لایەنەكان و بەتایبەتی جەماوەر كە ئێستا لە حالەتێكی رەش بینی و بێئومێدی دەژیت، ئەوە جێگای باس وخواسی ئێمە نیە، هاوكات دەستپێشخەریەكەی دووەمی هەندی یەكەمیان ئەگەر زیاتریش نەبێت پێشوازی لێكرا، ئەم باسەش وامان لێ دەكات بڵێین هەموو ئەو هەنگاوانە ناكرێت ئەنجام بدرێت بەبێ دیراسە كردنی حالەتی ئیسلامی لە كوردستان ، ئەوەش پێویستی بە دەزگایەكی توێژینەوە هەیە. بۆیە ئەوەی من لێرانە بە پێویستی دەزانم تیشكی بخەمە سەر چەند خاڵێكە بۆ بەرچاو روونی ئەو كەسانەی یان ئەولایەنانەی بەو كارە هەڵدەستن هەروەها بۆ جەماوەری ئیسلامی :
یەكەم: بەر لەقسەكردن لەسەر ئەو پڕۆژەیە پێویستی بە دەزگایەكی توێژینەوە هەیە تا جولانەكانمان لەسەر بنەمای داتا وزانیاری بێت.
دووەم: ماوەیەكی باشە هەر یەك لەم لایەنانە بەجیا كار دەكات و خاوەن بڕیار وهەڵوێستی خۆیەتی، بۆیە ئاسان نیە هەموویان بێنە ژێر یەك چەتر وبڕیار ئەگەر موراعاتی زەمەن نەكرێت .
سێیەم: زەمەن بەشێك بوە لەم حالەتە بۆیە ناكرێ بەبێ ئەو رەهەندە هیچ بكرێت.
چوارەم: واتە جەماوەری ئیسلامی دەبێ بەشێوەیەكی دراماتیكی سەیری ئەو پرۆسەیە نەكات، بەڵكو ئەوە سەرەتایەكە بۆ ئایندەیەكی نیمچە دوور.
پێنجەم: ئەگەر ئەو سەرەتایە ئێستا دەست پێ نەكات ئەوە دواتر دەكەوێت ودەرەتجامەكەیشی زیاتر دوور دەكەوێت.
شەشەم: دیارە پێشتر یەكگرتوو قسەیەكی لەسەر بوو لەسەر ئەوەی ئامادە باشی تەواوی نیە بێتە ناو ئەو بابەتە.
حەفتەم: بەڵام ئێستا یەكگرتوو خۆی دەستپێشخەرە.
هەشتەم: كۆمەڵێك بەربەستی فیكری و فیقهی هەبوون لە تێڕامانەكان سەبارەت بە هەڵگرتنی چەك و چونە ناو پەرلەمان و حكومەت و گۆرانی گوتن وموسیقا و بەدەركەوتنی ئافەرت لەسەر شاشە ودراما وكۆمەڵێك بابەتی لەم جۆرە، بەڵام ئێستا ئەوانەی هیچی نەماون وبەرەو یەك ئامانج و بەكەرستەیەكی نیمچە لێك نزیك لە دیدگاو كرداریەكاندا.
نۆیەم: كەواتە ئەوەی ئێستا لەبەردەمدا ماوە پا شماوە مێژووەكەیە كە كاتی پێویستە لەگەڵ هەندێك بەربەستی نەفسی كە ئەویش بە دیدار و گیانی باوەڕداری بەرەو نەمان دەچێت.
دەیەم: ئەم كارە هەناسەیەكی درێژی دەوێت ونیەتێكی پاك و عەقلێكی كارا.
یازدە: پڕۆژەی ئیسلامی تەنیا بریتی نیە لە لایەنە سیاسیەكان بەڵكو چەندین كەسایەتی فكری و زانستی و كۆمەڵایەتی و ئەكادیمی و كاسبكار و خاوەن پیشە هەیە دەبی ئەوانیش پێگەو شوینیان دیار بێت بەقەدەر حاجەو ئیمكانیاتی خۆی.