موسایەك پێویستە بۆ ئەم میسرە

ئەگەرچی لە ڕووكاردا ستەم و ناعەدالەتی و چەوساندنەوە، پێگە و كورسی دەسەڵات بەرزتر و فراوانتر و زیاتر دەكات و پێدەچێ‌ ماوەی مانەوەش لە دەسەڵات تا ئەندازێك درێژتر بكاتەوە، بەڵام لە حەقیقەتدا ستەم و ناعەدالەتی وەك ژەنگ و ژار و مۆریانە بەر دەبێتە گیانی دەسەڵاتداری ستەمكار و نادادپەروەر و پایەكانی كورسی دەسەڵاتەكەی دەڕزێنێ‌ و وردە وردە لەناوی دەبات، لەوەش خراپتر لەناكاو ستەمكار و فەرمانڕەوای سەر كورسییەكە دەخاتە خوارەوە و ئیدی هیچ كەس و هیچ شتێكیش فریای ناكەوێت و ڕسوای زەمانەی دەكات و دەیخاتە زبڵدانی مێژووەوە.

كاتێك ستەم و ناعەدالەتی و چەوساندنەوە و چەواشەكاری گەشتە چڵەپۆپە، كاتێك خیانەت و دەستبردن بۆ موڵكی گشتی و پاوانخوازی گەیشتە ترۆپكی خۆی، ئیدی كاتی گۆڕانكاری و بچڕاندنی پەتی زوڵم و ستەم نزیكتر دەبێتەوە و دێتە پێشەوە، وەك وتراویشە (الكفر یدوم، والڤلم لایدوم) واتە: كوفر و بێباوەڕی بەردەوامی دەبێت، بەڵام ستەم بەردەوام نابێت و تەمەنی كورت دەبێت.
كە ستەم و چەواشەكاری و گەندەڵی گەشتە چڵەپۆپە، كاتی ئەوە دێتە پێشەوە كە دەنگە كپكراوەكان بێنە زمان و هاوار بكەن، كاتی ئەوە دێتە پێشەوە كە دەست و پێ‌ كۆتكراوەكانیش كۆت و بەند و زنجیرەكانی ستەم و ناعەدالەتی بپسێنن و خۆیان دەرباز بكەن، كاتی ئەوە دێتە پێشەوە كە چەوساوە و ستەم لێكراوەكان قوفڵە ژەنگگرتووەكان بشكێنن و بە ستەمكارەكان بڵێن ئیدی بەسە و بوەستن.
ستەم و ناعەدالەتی و گەندەڵی و بێ‌ ویژدانی دەسەڵاتداری كوردی لە هەرێمی كوردستان یاخود كوردستانی باشوور، لە ماوەی چەند ساڵی ڕابردوودا بەگشتی و ئەم چەند ساڵەی كۆتایی بەتایبەتی، گەشتووەتە چڵەپۆپە و هیچ دەرفەتێكی چاوپۆشی كردن و چاوەڕوانی كردنیان بۆ هاوڵاتیان نەهێشتووەتەوە، ئەگەر جاران تەنها ستەمیان ئەوە بوو كە خەڵكیان لە ئیمتیازات و هەندێ‌ مافی خۆیان بێبەش دەكرد و بە شەڕی ناوخۆی براكوژی چەندین ساڵیان گوزەراند و سامانێكی زۆری مرۆییان بە كوشت دا، ئەگەر جاران قۆرخكاری سیاسی و هەژموونی سەربازی و پلە و ئیمتیازات لە سیمایان بوو، ئەوا ئێستە ئیدی دەستی ستەمكارانەی خۆیان بە تەواوەتی خستووەتە ناو ئابووری و داهاتی نیشتیمانی و بازرگانی و (لە خوێن ڕشتنەوە گواستوویانەتەوە بۆ خوێن مژین) و ئەو كەمە قوت و بژێوییەی كە هاوڵاتیان هەیانە، خەریكن یاری بە ژیان و گیانی خەڵك دەكەن، خەریكە سوكایەتی و بێ‌ ڕێزی كردنەكانیان ڕووی (فیرعەون و قارون و هامان) و سەربازەكانیان و دیكیتاتۆرەكانی دیكە سپی دەكەن، كە ڕەمزی دیكتاتۆری سیاسی و ئابووری و سەربازی بوون، مەخابن ستەمیان گەشتووەتە ئاستێك بەشێك لە خەڵك خەریكن بە تەواوەتی ئینتیمای نیشتیمانی و نەتەوەییان لەدەست دەدەن و لەوەش خراپتر ئاوات بە سەردەمی دەسەڵاتدارێتی ڕژێمە پێشووە دیكتاتۆرەكان بخوازن!!
بێ‌ ویژدانی و بێ‌ ڕیزی و سوكایەتی لەوە گەورەتر چییە كە دەسەڵاتێك و حوكمڕانێك بیت لە لایەكەوە مووچەی چوار مانگی ساڵی ڕابردووت نەدابێت و مووچەی ئەم ساڵیش بە پاشەكەوت (لێ‌ دزین و لووشدان!!)ەوە چەند مانگێك دوا بكەوێت، لە لایەكی دیكەشەوە بە هاش و هوش بانگەشەی دامەزراندنی (دەوڵەتی كوردی!!) بكەیت؟! ساویلكەیی لەوە زیاتر چییە كە ئەگەرەكانی (شەڕ و دوو ئیدارەیی و لەتكردنەوەی نیشتیمان!!) لە ئەگەرەكانی سازان و ئاشتەوایی زیاتر بن و بانگەشەی ڕیفراندۆم و هەوڵی بەدەوڵەتبوونیش بدرێت؟! دڵنیابن خەڵك لەوە ژیرتر و حاڵی ترە لەو گەمژەیی و چەواشەكاری و فرت و فێڵانە تێنەگات و ئەمجارەش فریوی ئەو چەواشەكاریانە بخوات.
ئێستە ئیدی بێزاری خەڵك و جەماوەر لەوە ترازاوە تەنها نەیارەكانیان لێیان بێتاقەت بن و بە ستەمكاریان هەژمار بكەن، ئێستە ئیدی كادیرو ئەندام و هەوادار و تەنانەت (ماستاوچی!)یەكانی ڕۆژانی ڕابردووشیان لێیان بێزارن و ژیانیان لێ‌ تاڵ بووە، بەهۆی ئەو ناعەدالەتی و ستەمەی كە بەرامبەریان دەكرێت و قوتی ژیانیان لێ‌ گیراوەتەوە.
ئەم دۆخە ناهەموار و قەیراناوییەی هەرێم ئەوەمان پێ‌ دەڵێت كە كاتی ئەوەیە (موسا)یەك بێت و خەڵك لە ستەم و چەوساندنەوە و گەندەڵی و چەواشەكارییەكانی (فیرعەون و قارون و هامان) و شوێنكەوتووەكانیان دەرباز بكات، جا ئەو (موسا)یە كەسایەتییەك بێت یان گروپ و لایەنێك یاخود تەوژمێكی جەماوەری یەك دەنگ و هۆشیار و بوێر، موسایەك كە جادووەكان پوچەڵ بكاتەوە و كلیلی قاسەكانی قارون بداتەوە دەست گەل و جەماوەر و سەربازەكانی هامان بكاتەوە سەربازی نیشتیمانی و موڵكی هەمووان و لە ژێر فەرمانێكی میللی و نیشتیمانیدا خەبات بكەن.
بەڵێ‌ (موسا)یەك پێویستە بۆ ئەم میسر و هەرێمەی ئێمە كە خاوەنی (یەدی بەیزا) و دەستێكی سپی و پاك بێت، دەستێك كە دزی و خیانەت نەكات، دەستێك كە خوێن نەڕژێنێت، دەستێك كە بڕیاری ستەمكارانە دەرنەكات، دەستێك كە واژووی نابەجێ‌ نەكات، دەستێك كە دەستدرێژی نەكاتە سەر ماڵ و ناموس و كەرامەتی كەس، دەستێك كە نازی بێ‌ نازان بكێشێت، دەستێك كە مافی هەموو كەسێك بدات، دەستێك كە ڕوناكی بداتەوە ژیان و ئاسۆی نیشتیمان پرشنگدار بكات و مەودای نێوان بەرپرس و هاوڵاتی ئاسایی كەم بكاتەوە و هەمووان پلە یەك بن و هیچ كەس لە سەرو یاساوە نەبێت.
موسایەك بۆ ئەم میسر و هەرێمەی ئێمە پێویستە كە خاوەنی عەقڵ و ژیری و حیكمەت و دڵسۆزی بێت بۆ گەڵ و نیشتیمان، موسایەك كە بە پلان و بەڕێوەبردنی باش و پێگەیشتووانە حوكم بكات و سەرمایە و سامانی نیشتیمان بپارێزێ‌، موسایەك كە خاوەنی هێزی لۆژیك و ئەمانەتداری بێت، چاوی لەسەر ماڵ و سامانی كەس و سەروەتی نیشتیمانی نەبێت و بە تاڵانی نەبات.
موسایەك كە ئەگەر هەڵەی كرد و زەبرێكی لە كەسێك وەشاند، ئامادەی داننان بە هەڵەدا بێت و داوای لێخۆشبوون بكات، موسایەك كە خاوەنی هێز و حیكمەت و دڵسۆزییەكی وابێت جادووگەر و چەواشەكارەكانی دەسەڵاتیش ئامادەبن لەبەردەمیدا چۆك دابدەن و پەشیمانی دەربڕن و دان بە زیرەكی و دڵسۆزی و هێزی لۆژیك و باوەڕیدا بنێن.
بەڵێ‌ ئەم هەرێمە (موسا)یەكی پێویستە كە ئەم گەل و نیشتیمانە لەم هەموو كێشە و قەیرانە ڕزگار بكات و لەو قوڕاوە دەری بهێنێ‌ كە چەندین ساڵە دەسەڵاتدار و گەندەڵەكانی نیشتیمان بۆ ئەم گەلەیان گرتووەتەوە، موسایەك كە لە خەمی نەوەكانی ئێستا و داهاتووی نیشتیماندا بێت و سەرمایە و سامانە سروشتییەكانی نیشتیمان تاڵان فرۆش نەكات و ئایندەی لەپێش چاو نەبێت.