كۆبونەوەی ژوورە تاریكەكانتان تاكەی؟؟؟


لەوەتەی لایەنە سیاسیەكانی كوردستان لە كۆبونەوەدان چ لە ناوخۆدا و چ لەگەڵ هاوپەیمانان و وڵاتانی دونیا هەموو خاڵ و مادە و بڕگەكانی ئەو كۆبونەوانە بەنهێنی بوون و بەنهێنیش هێڵراونەتەوە، ئەوەی كە پێی دەوترێت كۆبونەوەی ژورەتاریكەكان ، (یەكێتی و پارتی) سەدان و هەزاران كۆبونەوە و ڕێكەوتنی ناوخۆیی و دەرەكیان ئەنجامداوە تائەمڕۆشی لەگەڵدابێت هیچ كەسێك و ڕاگەیاندنێك ئاگاداری وردەكاریەكانی ئەو ڕێكەوتن و كۆبونەوانە نەبووە!!! مەگەر تەنها ئەوو كۆبونەوە و ڕێكەوتن و نامانەی كە (ویكیلێكس) یان لایەنێكی دەرەكی تیشكێكی خستبێتە سەر ئەو جۆرە كۆبونەوە و ڕێكەوتنانە.


ئەوەی تا ئەمڕۆ گوزەراوە بووەتە حاڵەتێكی ئاسایی لای دوو گەورە حیزبەكەی كوردستان ، بەڵام لێرەدا جێگەی خۆیەتی بپرسین بۆچی حیزبەكانی تریش لەسەر هەمان سیناریۆكانی ئەوان دەڕۆن؟؟؟ بۆنمونە بۆچی بزوتنەوەی گۆڕان بەڕون و ئاشكرا تیشك ناخاتە سەر ئەو خاڵ و بڕگە و پێشنیارانەی كە نوێنەرەكەی پارتی( فوئاد حسين) بۆ ئاسایی كردنەوەی دۆخی چەق بەستوی هەرێمی كوردستان دەیخاتەڕوو!!! بۆچی كۆبونەوەكانی ئەوانیش هەرلە ژوورە تاریكەكاندا دەكرێن؟؟ بۆچی هاوڵاتیان ئاگاداری پێشنیارە شیا و نەشیاوەكانی پارتی و گۆڕان نەبن؟؟؟ بۆچی دەبێت پاش بەسەرچونی سەردەم و لە ڕێگەی لایەنی دەرەكیەوە ڕاستیەكان دەربكەون، یان پاش چەند دەیەیەك لە ڕێگەی یاداشتەكانتانەوە ڕاستیەكانمان بۆ بنوسنەوە ، ئەویش بە میزاجی خۆتان.


ئەی گەورەترین بانگەشەی ئێوە لە هەڵبژاردنەكاندا بۆ كۆتایهێنان بە دیاردەنەبوو، ئەی بڕیار نەبوو ئێوە ڕاستیەكان نەشارنەوە ؟ بڕیارنەبوو ئیتر كۆبونەوە لە ژورەتاریكەكاندا نەكەن؟ بڕیارتان نەدا ئیتر لاسایی دووگەورە حیزبەكە نەكەنەوە؟


دەی پێم بڵێن تا ئەمڕۆ خاڵ و بەندی چ كۆبونەوەیەكی ناوخۆیی و عێراقی و دەرەكیتان بۆ خەڵكی و ڕاگەیاندنەكەتان ڕاگەیاندووە؟؟؟ ئەگەر لەهیچ شتێكدا شوێن پێی ئەوانتان هەڵنەگرتبێت ئەوا لە بوارەدا دەقاودەق فۆتۆكۆپی ئەوانن!!!


هەموو حیزبەكان هاوشێوەی یەكن تكایە ئیتر شاردنەوەی ڕاستیەكان بەسە ، بۆ پێمان ناڵێن لەسەر ئەو خاڵانە ڕێكین و لەسەر ئەو خاڵانەش ناكۆكین؟ هەرچەندە ئەوخورمایەی ئێوە دەیخۆن ناوكەكەی لە گیرفانی خەڵكیدایە! بەڵام ئازایەتی ئەوەیە خۆتان ڕاستەوخۆ پێكەوە ڕاستەیەكان بەخەڵكی بڵێن، نەك شەرمنانە و ناڕاستەوخۆ بەناوی دزەكرنی كۆبونەوەكانەوە، ئەگەر لایەنی بەرامبەریش ئامادەنەبوو ڕاستیەكان ڕون بكاتەوە دەتوانن كۆبونەوە نەكەن، یان بڵێن ئێمە ڕاستیەكان ڕادەگەیەنیین، بەڵام تا ئەمڕۆ بەرژەوەندیە تایبەتیەكان هۆكاری ئەوەن لەوەی كە كۆبونەوەكان هەر لە ژوورە تاریكەكاندا ئەنجام بدرێن!!!!!

 

am