كورد رێككەفتینە كو رێكنەكەڤن؟!

سالەك بسەر كریزێن نافخویێن هەرێما كوردستانێ دەرباز بوو ل ناڤبەرا ئالیێن سیاسی ژ پارتێن دەسەلاتێ و ئوپوزسیونێ بێ چ ئاسویەك گەش هەبیت كو ئەڤ پرسگرێكە چارەسەر ببن و خەلك د ڤان كاودانێن نەخوشێن تێدا ژ ئالیێ سیاسی و ئیكونومی و هەتا جڤاكی ژی دەركەڤیت و بگەهن كنارێن ئێمناهیێ.

تشتێ جهێ سەر راوەستانێ ئەوە بوچی ژیكدابرنا سالەكێ؟ بوچی خەما خەلكی نەبیە خەما سەرەكی؟ هەتا كەنگی ئەڤ كریزە دێ بەرداوامبن؟ ئەرێ توركیا و ئوردوگان دیری مەنە كو نەما نەكری بو ولاتێ خو بەرامبەر روسیا؟ ئەرێ وەلات پارێزی و ئاڤاكرن ب ڤی دەست و داریە؟..چەندین پرسێن دی دئێنە كرن ژ هەمی ئالیەكێ د گورەپانا سیاسیا هەرێما كوردستانێ حزور هەبیت.یان بەرسڤا ڤان پرسان هەمیا ئەوە رێكەفتین كو رێكنەكەڤین وەكی دەمێ قەزافی گوتی. رێكخستنا ناڤ مالا كوردی ژ ئەركێن هەرە گرنگ و پێتڤیە بو هندێ خەونا سەدان سالی ژ سەرخوبونێ بێتە دی و ژ داگیركاریا وەلاتێن نەتەوەیی و مەزهەبی و رەگەزپەرستی دەرباز ببن, چ جارا وەك ئەڤرو دەرفەت نە هاتیە پێش كو هەر ئالیەك سیاسی ب هەستەك نەتەوەییانە و كوردستانیانە كار بكەت و هەر ناكوكیەك هەیە بێتە لادان و دەست بدەست كار بێـتەكرن بو راگەهاندنا دەولەتا كوردی كو خەونا هەر كوردەكێ یە,ئەگەر شروڤەیەك سیاسی بێـتەكرن بو ڤان كریزێن هەرێمێ دێ بینی نە ژ وی ئاستینە كو چارەسەری بو نە بیت و ناگەهنە وی رادەی كو سالەك بسەرڤە بچیت و چارەسەری بو نەهێتە دیتن و ئەڤ دوودلی و نەخوشیێت ب ئەگەرێ شەرێ داعشێ و كرێزا ئابوری هاتیە بەرسینگێ خەلكێ كوردستانێ نەبس بوون كریزا هەمیا مەزنتر ژێكنەگرتنا ئالیێن سیاسی یێن هەرێمێ بون ل سەر ڤان پێشهاتێن داویی و پتر دویركەتنا وان ژ ئێكدی و رازینەبوون ب دەرفەتێن چارەسەریێ و بەردەوام بوون ل سەر وێ بوچونێ كو كریزێ دەستپێكری ئەڤێ چەندێ گوم شێلیتر و تاریتر كریە و دەرگەهێن ڤەكری ژی بەرامبەر دەستپێشخەریێت كەسایەتی و ئالی و بەرپرسێن هەرێمێ گرتیە,ئەو گوتنا مەزنان دبیرا مروڤی دئینیت دەمێ دبێژن(تو چیا و ئەز چیا گول ما بێ گیا) ب راستی ب ڤێ تەفكیرا سیاسی بو پرسگرێكێن هەرێمێ چارەسەر روژ ب روژ دوورتر دكەڤیت و دەرفەت ل دەستێ مەدچن و دوژمنێن مە پێ خوش دبن و خەلك پتر دكەڤیت تەنگاتیا دا.
ل داوایێ فەرە هەمی ئالیێن سیاسی لدیڤ وان بانگەوازیا بچن كو دئێنەكرن بو چارەسەریا كریزا سیاسی ل هەرێمێ و هەر ئێك ژ ئالیێ خوە ڤە پێتڤیە دەست بەرداریی پشكەك ژ داخوازیێت خوە ببیت بو بەرژەوەندیا بلندا وەلاتی و بەرخوینا شەهیدێن كورد و كوردستانێ.هەروەسا پێتڤیە ل سەر هەمی ئالیان كو سیاسەتێ دا واقعی بن و ل سەروبەرێ عیراقێ و روژهەلاتا ناڤین بگەهن و بزانن ئەو شەر و تێكدانا نوكە دئێتەكرن ئێك ژ دەرئەنجامێن وێ چارەسەریا كێشا نەتەوەییا كوردە و دروستكرنا كیانەكێ سەربەخو ل باشور و هەرێمەكا ئازاد و سەربەخو ل روژئاڤایە,ئەڤ دوو دەستكەفتیە ژ هەر پوستەكێ ژ هەر كەسەكێ ژ هەر كریزەكێ ژ هەر وەلاتەكێ بو گەلێ كورد مەزنترن لەوما فەرە ب لوژیكەك براگماتی و ب تێگەهشتنەك ساخلەمانە و دیر ژ هەر ئێك و دوویەكێ پێكول بێتەكرن بو دەركەفتن ژ ڤێ دووبەرەكی و دووركەفتنا هەیی.خالەك دیتر لێ نێرینێ بكەین پشتی كو بەحس ژ سەربەخویا كوردا و دەسڤە ئانینا مافێن گەلێ كورد هاتنەكرن وەلاتێن دەڤەرێ تایبەت توركیا و ئیران كو دوژمنێن دیروكی یێن هەڤدوونە ب هەمی ئاوایەكێ یێ كار دكەن ڤێ دەرفەتا هاتیە پێشیا كوردا ژ ناڤببەن و بو دەمێ 500سالیێن دی ژ بن داگیركاریا تورك و فورسێ بمینن و چ جاران كورد بەحس ژ سەربەخویێ ژی نەكەت.وەلاتێن ئیقلیمی ب ڤی ئاوایی ل پرسگرێكا نەتەوەیی یا كورد دنێرن و پیلانێن ئاگرین بو ناڤبرنا ڤان دەرفەتان دادنێن و كورد ژی ژ ئالیێن خوە ڤە ئامادەنینە پێكبێت و و رێبكەڤن بو كارەك هەڤپشك و خەباتەك ئێكگرتی بو دروستكرنا وەلاتەك ئازاد و سەربەخو!.