لۆزانێكیتر بەڕێوەیە

  سێ شەممە, 23 ئاب 2016 09:01

( برا فكری چرا كبریتی فرسەت تالەدەستدا .... شەو یەڵدا لەپێشە ڕۆژی عومرت وەختە ئاوا بێت )


بەپێی ئەو لێدوانەی كاك مەلا بەختیار بێت لۆزانێكیتر چاوەڕێمان دەكات ، ناوبراو لەگەڵ چەندین ئەكادیمی‌و نوسەرو روناكبیرانی گەورەو دیاری میسرو مامۆستای زانكۆكانی قاهیرەو میسر و پسپۆڕانی سیاسی‌و سەربازی‌و ئامادەبوونی چەندین رۆژنامەنووس‌و نوسەرو رەخنەگر، سیمینارێكی بۆ ساز كرا. لەو سیمینارەدا كە لەرێگای سكایپەوە بۆی ساز كرابوولە شوێنێكی دیمانەكەدا دەڵێت (بیست و هەشت دەوڵەتی ڕۆژئاوا بە ڕوسیاشەوە واژۆی بەڵگەنامەیەكیانكردووە و ڕادەستی هەردووحیزب (یەكێتی و پارتی) یانكردووە، لە بەڵگە نامەكەدا دوپاتیان كردۆتەوە كەئەوان لەگەڵ یەكێتی خاكی عێراقدان و لەگەڵ دامەزراندنی دەوڵەتی كوردستانی باشوردانیین... هیچ پرۆژەیەكی لەو چەشنەش لەئارادانییە) ئەگەر ئەم لێدوانەی ناوبراو وابێت ئیتر دەوڵەتی كوردی نەك خەونی شاعیرانە تەنانەت لە بیر و ئەندێشەی هیچ سەركردەیەكماندا بونی نییە.
ئەو هەڵوێستە نەرێنیەی زلهێزان كەبەردەوام هەڵوێستیان بەرامبەر گەلی كورد هەروابووە، چەندە جێگای داخە و دووبارە و چەندبارە بونەوەی مێژووە، شاردنەوەی ئەو بەڵگەنامە و هەڵوێستەی بەناوو هاوپەیمانانمان لەلایەن ( یەكێتی و پارتی) زیاتر جێگای داخە، دیارە ئەمانیش وەك خوی هەمیشەییان هەردەم ڕاستیەكانیان لە خەڵكی شاردۆتەوە.
ئاماژەیەكی ترسناكتر بەرامبەر بەكورد نزیك بونەوە و هاوپەیمانی (ڕوسیا، ئێران، توركیا، عێراق) ە بەرامبەر ڕۆژئاوای كوردستان .
ئەگەر ئەمە هەڵوێستی یار و نەیارەكانی كوردبێت ئەوەش ڕەوشی نەخوازراوی ناوخۆی خۆمان بێت ، چ ناوخۆی هەرێم و چ هەرێم لەگەڵ پارچەكانیتری كوردستان، دەی ئەوا مانگی هەنگوینی ئێمە و هاوپەیمانان تا كۆتایی هاتنی ڕێكخراوی (داعش )ە یان جەنگی دژ بەداعشە ، پاش ئەو جەنگە ئیتر گڵۆڵەمان جارێكیتر دەكەوێتەوە لێژی و سەركەوتوانی ئەو جەنگەش (كەبەلای خۆمانەوە ئێمەش بەشێكی كاریگەری ئەو جەنگە و هاوپەیمانیەین) هەموو ڕیسەكەی ئێمە دەكەنەوە بەخوری!!!!!
لێرەوە جێگەی خۆیەتی حیزبەكانیتری هەرێمی كوردستان و رێكخراوەكانی كۆمەڵگەی مەدەنی و هەموو چین و توێژەكان دەست بكەن بە فشار بۆسەر هەردوو حیزب ( پارتی و یەكێتی) بۆ ئاشكراكردن و خستنە ڕوی ئەو بەڵگە نامەیە ، ئەگەر بونی هەیە.
دیسان دەبێت هەوڵوێست وەربگرین لەجەنگ دژ بە داعش و لەوە زیاتر ڕۆلەی ئەم گەلە ستەمدیدە بەخوت و خۆڕایی بەكوشت نەدەین، چونكە ئێستە هەموو خاكی كوردستان بەناوچە جێ‌ ناكۆكەكانیشەوە لەژێر دەستی هێزی پێشمەرگەی كوردستاندایە.
دیسان دووبارەی دەكەمەوە ئەگەر ئەو لێدوانەی كاك مەلا بەختیار وایە ئەوا دەبێت هاوڵاتیانی لێ‌ ئاگاداربكرێتەوە، ئەگەریش وانییە دەی با پارتی ڕاستیەكە ئاشكرا بكات، تاكەی ڕاستیەكان دەشارنەوە ؟؟؟!!!