تكایە حكومەتی هەرێم با بەس بێت برسی كردنی هاوڵاتی

  سێ شەممە, 06 ئەیلول 2016 11:40

 

ئەگەر بڕیار بێت ئەم سیاسەتەی حكومەتی هەرێم ناوی لێ بنێین ( سك هەڵگوشین ) خۆ ئەبێت ئامانجەكەی دیار بێت ، چونكە ئەگەر سەیری كەسێك بكەین كە خاوەنی خانەوادەیەكە كاتێ ئەوەی پەیدای ئەكات هەمووی خەرج ناكات بۆ خانەوادەكەی یا هەر هیچ نەبێ ژیانێكی ئابڕو مەندانەیان بۆ دابین ناكات ، ئەبێت وەڵامێكی دروستی پێ بێت بۆ تاكەكانی خانەوادەكە و وەڵامەكەش ئەبێت زۆر نزیك بێت لە عەقڵەوە ، وەك ئەوەی خانویەك لە ئایندە بكڕن یان ئۆتۆمبیلێك یان پرۆژەیەكی دیار ، بەڵام كاتێ ئەمانە هیچی دیار نەبێت یان دیار نەكرا ئیتر ئەو سەرۆك خێزانە ئەكەوێتەژێر پرسیارو گومانێكی زۆرەوە كە گوایە ئەم پارەیە چی لێ ئەكات ( بە تایبەتی دایكی مناڵەكان كێ ئەڵێ ماڵێكی تری پێكەوە نەناوە) ؟؟
لە عێراقدا و لە بوجەی ساڵی 2016ئەم ژمارانە هاتوە لێرەدا ژمارەكان تۆمار ئەكەین و پاشان پرسیارەكانی خۆمان ئەكەین :
1- داهاتی خەمڵێنراو لە سنوری 81.7تریلیون دیناردا بوە لە سەر بنەمای فرۆشتنی نەوت بە 45دولار بۆ هەر بەرمیلێ .
2- ئەم داهاتە لە كەرتە جیاوازەكانەوە دێت و بەڵام بە تەنیا نەوت بە سنوری 69.7تریلیون پڕ دەكاتەوە .
3- تەواوی داهاتەكانی تر بێجگە نەوت 11.9ترلیون دینارە .
4- خەرجیەكانی عیراق مەزەندە كراوە بە 105.8 تریلیون .
5- كورت هێنانی پلان بۆ دانراو 24.1 تریلیون دینار
تێبینی : زۆر بە دەگمەن فرۆشتنی نەوت گەشتۆتە 45$ و بەزۆری لە خوار ئەو نرخەوە فرۆشراوە .
لە گەڵ ئەمانەشدا تا ئێستا عێراق ئەو مافەی بە خۆی نەداوە كە هەڵكوتێتە سەر قوتی فەرمانبەران و بەم دەردەی هەرێمی لێ بكات ، هەرچەند لە ڕیزی بەرنامەی چاك سازی حكومەتدا تیایدا بوو كەم كردنەوەی خەرجیەكان و لە نێویشیاندا موچەی فەرمانبەرانی پلە باڵاكان تا زیاتر لە 50% كەم بونەوەی تیا بوە ، لە گەڵ ئەوەشدا مانگانە فەرمانبەر موچەی خۆی لە كاتی خۆیداوەرگرتوە و وەر دەگرێت .
كوردستان كاتێ لە دوای ساڵی 2013كەوتە كێشمە كێش لەگەڵ حكومەتی ناوەند و موژدەی دا بە هاوڵاتیان كە ئیتر لە ئێستە بەدواوە نەوتی خۆمان بۆ خۆمان ئەفرۆشین و قنج هەڵئەپەڕین و پێویستمان بە حكومەتی ناوەند نیە و نابێ كەس ببێتە جاش و پیاوی حكومەتی ناوەند ، بەڵام هەر لە گەڵ دەست پێ كردنی بڕینی بڕە بوجەی كوردستان لە لایەن حكومەتی ناوەندەوە یەكەم فیشەك نرا بە موچەی فەرمانبەران و مانگ لە دوای مانگ بۆ چەند مانگێ هەر هیچ نەدرا .
پرسیارە سادەكە لە هاوڵاتیەوە بۆ حكومەتی هەرێم
( باشە هەردولا تەنها نەوت ئەفرۆشن، دابەزینی نەوت بۆ هەموو لایەك وەك یەك وایە ، نەوتەكەی ناوەند زیاتر ناكات لە نەوتی هەرێم ،بۆ ناوەند ئەتوانێ تا ئەم ساتە وەختەش پا بەند بێت بە موچەی فەرمانبەران و حكومەتی هەرێم ناتوانێ ؟ باشە ئەگەر ناتوانی موچەی فەرمانبەران دابین بكەیت و ( ئیدارەیەكی زانستی ئابوریانەی كەرتی نەوت بكەیت ) خۆ تا ئێستاش ئێمە واتە هەرێم بەشێكین لە عێراقی یەك پارچە ئەو نەوتەی هەتە ڕادەستی حكومەتی ناوەندی بكە و ئەو كاتە دەست بكە بە چاوی حكومەتی ناوەندا بۆ بە شە بوجەی خۆت و ئیتر با بەس بێت برسی كردنی هاوڵاتی كورۆدستان)
یان ئەگەر ئامانجێكت هەیە بیڵێ بەو خەڵكە ڕەش و ڕوتە با هەموومان سكی بۆ هەڵگوشین هەر هیچ نەبێ لە بەر خاتری نەوەكانی دوای خۆمان