نه‌وت و ده‌رده‌ سه‌ری هاوڵاتی هه‌رێمی كوردستان

هه‌رێمی كوردستان له‌ چه‌ند ساڵی ڕابردوودا به‌ ده‌ست سیاسیه‌ بارزگانه‌كانی ئه‌و وڵاته‌ ڕووبه‌ڕووی زۆر ئاسته‌نگی جۆراودۆر بووه‌ته‌وه‌ و به‌رده‌وامیش له‌ قه‌یراندا ده‌خولێته‌وه‌.

نه‌وت ئه‌و به‌رهه‌مه‌ سروشتیه‌ خوا پێداوه‌ی به‌رده‌وام سوودی زۆری بووه‌ بۆ هاوڵاتیان به‌گوێره‌ی ناوچه‌ی جوگرافی هه‌ر وڵاتێك، به‌ڵام ئه‌و به‌رهه‌مه‌ سروشتیه‌ له‌ هه‌رێمی كوردستاندا بووه‌ته‌ نه‌گبه‌تی بۆ هاوڵاتیانی ئه‌ویش به‌دسه‌ت سیاسیه‌ بارزگانه‌كان...له‌سه‌رووی هه‌موویشه‌وه‌ ئاشتی هه‌ورامی ، ئه‌و ئاشتی هه‌ورامییه‌ی به‌رده‌وام وه‌ك چۆن نه‌وتی ئه‌و وڵاته‌ی هه‌ڵمژیووه‌، له‌ هه‌مان كاتیشدا ئاوا داهاتی ئه‌و وڵاته‌ی هه‌ڵمژیووه‌ و هه‌رێمی كوردستانی ڕووبه‌ڕووی قه‌یرانی برسكردن كردووه‌ته‌وه‌.
ژیانی كۆمه‌ڵایه‌تی هاوڵاتیان به‌ پچڕانی شیرازه‌ی خێزان نامێنێت و به‌ره‌و هه‌ڵوه‌شانه‌وه‌ ده‌چێت و ئه‌و قه‌یرانه‌ی ته‌نگی چنیووه‌ به‌ هاوڵاتیان به‌شیویه‌كی دڕێژماوه‌ ده‌مێنێته‌وه‌ تا ئه‌وكاته‌ی ئابووری وڵات نه‌بێته‌ سێكته‌رێكی سه‌ربه‌خۆ و به‌هێز.
نه‌وتی هه‌رێمی كوردستان چه‌ندین ساڵه‌ بووه‌ته‌ قوربانی ده‌ستی چه‌ند چه‌ته‌ و بازرگانێكی ناسیاسیی و دوور له‌ ئابووری و خراپه‌ به‌كارهێنانی بۆ چه‌ند ده‌سته‌بژێرێكی سه‌ر به‌ده‌سه‌ڵات و خۆتێركردن و برسی كردن و ناچاركردنی به‌ ملكه‌چبوون بۆ كۆمه‌ڵێك كۆت و به‌ندی حزبی و نامرۆڤایه‌تی تا له‌و ڕێگه‌یه‌وه‌ هاوڵاتیان ببنه‌ به‌شێك له‌ كۆیله‌.
ئێستا ژیان و بژێوی خه‌ڵك له‌سه‌ر بڕه‌ موچه‌یه‌ك وه‌ستاوه‌ و خه‌ڵك له‌وێوه‌ داهات و بژێوی خۆی بۆ ده‌سته‌به‌ر ده‌بێت، به‌ڵام چه‌ند هاوبه‌شێكی ده‌سه‌ڵات و چه‌ند مشه‌خۆرێكی نا سیاسیی و نا عه‌قلانی..... بوونه‌ته‌ ڕێگر له‌به‌رده‌م خۆشگوزه‌رانی خه‌ڵك.
ئێمه‌ له‌درێژه‌ی چاره‌گه‌ سه‌ده‌یه‌كی ژیانی نیمچه‌ سه‌ربه‌خۆیی نه‌مانتوانی ببینه‌ هێزێكی كاریگه‌ر بۆ ئه‌وه‌ی ئه‌و نیمچه‌ سه‌ربه‌خۆییه‌ بۆ زۆر مه‌به‌ست وه‌ك هه‌لێكی زێڕین بقۆزینه‌وه‌ بۆ ته‌واوی جومگه‌كانی دام و ده‌زگا حكومییه‌كان.

ڕه‌وشی سیاسیی و حزبایه‌تی و ئابووریی تێكه‌ڵ به‌ژیانی خه‌ڵك كراوه‌ به‌وه‌ی كه‌مده‌رامه‌تی زۆر له‌شه‌ڕێكی سه‌ختی ده‌روونیدا به‌ردوام كاری خۆی ده‌كات ، له‌ولاشه‌وه‌ دوور له‌ به‌رپرسیارێتی و نا به‌رپرسانی حكومه‌ت و ناوه‌نده‌ بڕیار به‌ده‌سته‌كان له‌ خۆگێلكردندا بوونه‌ته‌ ڕێڕه‌وێك بۆ تێكدانی كه‌ش و هه‌وای كۆمه‌ڵایه‌تی و پاڵه‌په‌ستۆی توند له‌سه‌ر تاكه‌كانه‌ له‌ ئه‌نجامی ئه‌و گه‌نده‌ڵی و خراپ به‌كارهێنانی نابه‌رپرسانی ده‌سه‌ڵات.

كه‌وته‌ : خه‌می گه‌وره‌ی خه‌ڵك تێركردنی سگیانه‌ و خه‌می گه‌وره‌ی به‌رپرسانی مشه‌خۆر برسیكردنی خه‌ڵكه‌ ، به‌زۆر بیانووی جۆراو جۆر خه‌ڵك خراوه‌ته‌ دۆزه‌خێك كه‌سمان نازانین سه‌ره‌نجامی حكومه‌تی هه‌رێم و سیاسیه‌ دۆڕاوه‌كان به‌كوێ ده‌گات و بێده‌نگی خه‌ڵك و زمان درێژی ده‌سه‌ڵاتیش بووه‌ته‌ مێژوو ، كه‌ كه‌س له‌م وڵاته‌ی ئێمه‌ خۆی به‌ به‌رپرسیار نازانێت ، به‌ڵام ئه‌وكاته‌ی شیرینی نه‌وت و داهاتی وڵات كه‌وته‌ سه‌رمێزی گفتوگۆ ئینجا مشه‌خۆرانی سه‌ر ده‌سه‌ڵات ده‌رده‌كه‌ون.

ئه‌و داهاته‌ی حكومه‌تی هه‌رێم له‌ڕێگه‌ی وه‌زاره‌تی سامانه‌ سروشتیه‌كان به‌ده‌ستی دێنێت ئیڕاده‌ی خه‌ڵكی لاواز كردووه‌ له‌ هه‌ستی نه‌ته‌وه‌یی و عه‌قڵی خه‌ڵكی به‌تاڵكردووه‌ته‌وه‌ له‌ هه‌ستی كوربوونی خۆی و ئه‌وه‌شی له‌ڕابردوو كردوویه‌تی لێی په‌شیمانه ، چونكه‌ ئێستا كه‌انێك ده‌یخۆن نه‌ كوردن به‌و مانایه‌ی بۆ كورد قوربانیان دابێت ، هیچ سودێكیان بۆ كوردیش له‌سه‌ر ئاسته‌ جیاوازه‌كان نه‌بووه‌ به‌ڵكو شكستخواردووترین كه‌س بوون له‌ مێژووی سیاسیی وڵاتدا.

بۆیه‌ ئه‌مڕۆ ئه‌وه‌ی ده‌یبینین سامانی وڵات له‌گیرفانێكی نا به‌رپرسانه‌ و نا ئه‌مین دایه‌، كاتێكیش لێپرسینه‌وه‌ و لێكۆڵێنه‌وه‌ له‌سه‌ر ڕه‌وشی ژیانی حكومه‌ت و ده‌سه‌ڵات نه‌بێت ڕێڕه‌وی سه‌ره‌ڕۆی ده‌سه‌ڵات به‌و ئاسته‌ ده‌بێت.