ئەو حكومەتەی ئایندەی گەلێكی ڕەش كرد

حكومەتی هەرێمی كوردستان هەر لە سەرەتای دروست بوونیەوە تەعبیری نەكردووە لە رای زۆرینەی خەڵك و وەڵامدەرەوەی ویست و خواستی دەنگدەران نەبووە لە حوكمدا، بەڵكو فەزای هەڵبژاردنەكان وەك گەمەیەكی سیاسیی بەكار دەهێنێت بۆ شەرعیەتدان بە ئەو ویست و ئامانجانەی كە دوو پارتی دەسەڵاتدار هەیانبووە، لەبەرئەوە هەر لەدوای هەڵبژاردنەوە جەماوەر لەبیركراوەو گەڕاوەتەوە بۆسەر ئەجێندای سیاسیی و ئابوریە حیزبەكەی و بۆ ئەو مەبەستەش چەندان گەمەی جۆراوجۆری كردووە، لە هەرێمی كوردستاندا ساڵا بۆ ساڵا گەمەی پارتە حوكمڕانەكان لە دەسەڵاتدا خراپتر دەبێت و پاشەكشە دەكات و جەوهەری زیاتری ئەم پارتانە دەردەكەوێت، كە چین و عەقڵیەت و بیركردنەوەیان تاچەندە و ویست و خواست و ئامانجی راستەقینەیان چیە؟

پاش زیاتر لە 24 ساڵا لە حوكمڕانی لە ئێستادا زیاتر روی راستی ئەم دوو پارتە دەسەڵاتدارە دەركەوتووە، ئەویش پاش ئەوەی كە بە درێژایی 24 ساڵی رابردوو، بە دور لە هەر هەستكردن بە بەرپرسیارێتیەك دەستیان خستە ناو هەموو جومگەیەكی حكومەت و هەموویان بە حیزبی كرد و نەوت و گاز و گومرگ و هەموو سەرمایەیەكی ئەم هەرێمەیان بەتاڵان برد و بەسەرخۆیاندا دابەشیان كرد. لە دوایەمین پلانی شومیاندا دەستیان برد بۆ قووتی خەڵك و زۆرینەی مووچەی فەرمانبەرانیان گەڕاندەوە بۆ بانكە تایبەتیەكان و لەوێشەوە بۆ گیرفانە رەشەكەی حیزب.
لەم هەنگاوەیاندا توانیان كاریگەری زۆر سلبی و خراپ لەسەر سایكۆلۆژیای مرۆڤی كورد دروست بكەن و بەمەش باری كۆمەڵایەتی و فیكری و رۆشنبیری و ئابوری و پەروەردەیی و مەدەنیان تووشی بارێكی زۆر ناهەموار كرد، وەك ئەوەی كە نوخبەیەك لە دەرەوە بە عەقڵی ئیمپریالیزمێكی نوێ‌ هاتبێت و گەلێك تووشی جەنگی دەرونی بكات و بە جۆرەها چەكی سایكۆلۆژی كار لەسەر تێكدانی كەسایەتی و شوناس و مێژوو ئایندەی بكات.
ئەم حكومەتە بەبێ‌ هەستكردن بە هیچ بەرپرسیاریەتێكی مێژوویی و ئەخلاقی و بەبێ‌ گوێدانە ئەو هەموو كاریگەریە سلبیانە، تاكە تاكەی هاوڵاتیانی ئەم هەرێمەیان تووشی خەجاڵەتی و تێكدانی باری دەروونی و ئاسایشی خێزان و قوتابخانە و گەنج و لاو و مناڵا و پیرەكان كردووە.
دروستكردنی ئەم بارودۆخە وای لە مرۆڤی كورد كردووە كە ئیتر هیچ هیوایەكی بە ئایندەو ناسیونالیزمی كوردی و سەركردەكان نەمێنێت، چونكە ئەوەی ئەمڕۆ ئەمانە پێی دەكەن هیچ دوژمنێك لە فارس و تورك و عەرەب نەیانتوانیوە پێی بكەن و بەو جۆرە تووشی قەیرانی ماددی و مەعنەوی بكەن و ژیان لەبەرچاوی ناشیرین بكەن. مەترسی ئەم قەیرانە دروستكراوە لەوەدایە كە زۆرتر روی كردۆتە چینە خوێندەوار و ئەكادیمی و دامەزراوە پەروەردەیی و مەدەنیەكان، لەبەرامبەردا دامەزراوە ئەمنی و سەربازی و رێكخستنەكانی دوو حیزبی دەسەڵاتدار گرفتیان نیە.
ئەمەش ئاماژەیەكە بۆ وێران كردنی پەروەردەو مەدەنیەت و شارستانیەت و بەهێزكردنی بازوی هێز و عەسكەر و دامەزراوە ئەمنیەكان، لەكاتێكدا كە دەبوایە گرنگی پێدانەكە پێچەوانە بوایە ئەگەر حكومەت نیەتی گەشەپێدانی هەبوایەو بە پلانێكی ستراتیجیەوە روی لە ئایندە بكردایە، كە ئەمەش مەترسیەكی گەورەیە بۆسەر ئایندەی ئەم هەرێمە و نەوەی نوێ‌، چونكە ئەم جۆرە پلانانە گەل بەرەو نائومێدی دەبات و لە نائومێدی گەلیشدا هەموو خواستێكی نەتەوەی و بەدەوڵەتبوون و سەربەخۆیی شكست دەهێنێت.
ئەمانە هەتا ئێستاش بەو چەمكە تەقلیدیە كار دەكەن كە دەڵێت سەگەكەت برسی بكە شوێنت دەكەوێت ،بەڵام بێئاگان لەوەی كە زۆر دەسەڵاتی تری ئەم ناوچەیەش ئەم سیاسەتەیان گرتەبەر بەڵام ئەو سەگانە قاچیان گرتوو كەوڵیان كرد.