دابران به‌لێ ژبهايێن پێرۆز ويێت شوڕه‌شكێرى!!

دابران وه‌كو تێگه‌هێ هزركى ئێكه‌ ژتوندرترین هه‌لویستان به‌رامبه‌ر بووریێ جڤاكى یانژى به‌رامبه‌ر كه‌لتورى، ل هه‌ر ده‌ستپێكا سه‌رهلدانا مودورینیزمێ سێ هه‌لویست هه‌بوون به‌رامبه‌ر كه‌لتۆرى ومێژوو وبوریێ نه‌ته‌وه‌یى: ئێكه‌م هه‌لویست ڕه‌تكرنا بوورى ب ئێكجارى وپشتدان ودابڕان ژوى، وبه‌رامبه‌ر ڤێ ژى هه‌لویسته‌كێ دیێ توندێ موحافزكار هه‌بوو ئه‌وژى پیرۆز دیتنا بوورى وقودیسییه‌تكرنا وى هه‌روه‌كى ژمێژوه‌ره‌ هاتیه‌ گۆتن (لیس فی الإمكان أبدع مما كان).
لێ هه‌لویستێ ناڤجى ئه‌ڤه‌بوو كو نه‌ پیرۆزكرنا كه‌لتورێ هه‌ر وه‌كى ژئه‌سمانا هاتیه‌ خوار ، نه‌كو مینا هه‌لویستێ دابرانخوازان ژى هه‌وڵێن به‌یهوده‌ بدن داره‌كا قورمێ وێ ستویر بلند ببت به‌لێ پشتى بڕین وڤه‌قه‌تاندنا وێ ژڕه‌هـ وریشالێن وێ یانژى وه‌كى بزاڤێن بلندكرنا ته‌لاره‌كێ زۆر به‌رز به‌لێ بێى هیچ بناغه‌ وبنستر!
گرۆپێ دابرانخوازێت مه‌ ئه‌وێت ل رۆژا پێنج شه‌مبێ 22/9/2016 دووه‌مین پلاتفورما خۆ سازكرین ب به‌شداریا ده‌هان فه‌كوله‌رێن عه‌ره‌ب ویێت بیانى دڤێ ده‌مێ دێوێن قه‌یرانێت ئابۆرى وسیاسى بێهن ل هاوڵاتیێ كورد ته‌نك كرى وئه‌ڤ قه‌یرانه‌ژى هه‌ر ژئه‌گه‌رێ تالانكرنا سه‌روه‌ت وسامانێ كوردستانێ یێ هه‌مان سه‌ركرده‌یێن ڤى كرۆپى رۆله‌كێ باش تێدا گێڕاى وبووینه‌ فاكته‌رێ سه‌ره‌كى بۆ وێ چه‌ندێ كوردستانێ به‌ره‌ڤ ژناڤچوون وئینهیارا ئابۆرى ڤه‌ بچتن، هه‌لویستێ سه‌رێ ڤێ به‌ندا ناڤبرى هه‌ر ژكه‌ڤندا هه‌مى پرێت په‌یوه‌ندیا هه‌لوه‌شاندین نه‌ك ته‌نها لناڤبه‌را خوه‌ وكه‌لتۆرێ كوردى به‌لگێ هه‌تا لگه‌ل نه‌گوهورێت ناسنامه‌یا گه‌ل ووه‌ڵاتى ژى یێت قوتكرین، هه‌ر وه‌كى پلاتفورما ئێكێ (سه‌ركێشێ وان) بئاشكه‌رایى دیاركرى هه‌ر ل سه‌ر سۆز وپه‌یمانێت خۆیه‌ دژى نه‌گوهورێت ئاینى یه‌ كو دپلاتفورما خۆ یا ئێكێ دا خویاكربوو ئه‌و عاشقێ گوشتێ به‌رازیه‌، نزانم بۆچى ڤێ جارێ به‌حسێ خوارنا گۆشتێ صه‌یى ویێ هرچێ ویێ كه‌رى وڤه‌خوارنا شیرێ ماكه‌رێ ژى نه‌كر!
یا سه‌یر نینه‌ ئه‌ڤ جۆره‌ مرۆڤه‌ دابراى بن ژڕابردووى ومێژۆ وكه‌لتۆرێ گه‌لێ كورد، ودیسان نه‌یا سه‌یره‌ هه‌تا مرنێ په‌ویوه‌ندیێت وان یێت وژدانى ومه‌عرفى وهزركى ڤه‌قه‌تاى بن ژئاینێ ئیسلامێ به‌لێ یا سه‌یر وسه‌مه‌ر وعه‌جیبێت زه‌مانى ئه‌وه‌ سه‌رێ ڤى كرۆپى به‌حسێ هزرێت رۆناك ویێت دیموكراسى بكت پشتى هو باش په‌رده‌ هاتیه‌ لادان ژگه‌ڤلێ پێشكه‌فتنخوازى ونویخوازى ولافیتێن به‌ریقدارێن خه‌باتكرنا پێناڤ ئاڤاكرنا جڤاكه‌كێ ئازاد وژیانه‌كا دیموكراسى وبۆ مه‌هه‌میان دیار بوو هه‌مى تشتێن به‌رۆڤاژى نه‌ وهه‌مى بهایێن شۆره‌شگێرى وخه‌باتێ یێت هاتینه‌ گۆریكرن ژبۆ كومپانیێت زه‌بلاح وهه‌پشكى دبیر وبۆریێت په‌ترۆلێ دا ل گه‌ل خانمێ ژبه‌ركو ئه‌وژى – هه‌ڤدژ ل گه‌ل ئیدداعائێت خۆیێن به‌رێ- یێ بوویه‌ مریدێ كونترۆلكرنا حوكمێ بنه‌ماڵى وقورغكرنا خێزانه‌كێ بۆ به‌هرا هه‌ره‌ زۆر ژسامانێت نه‌ته‌ویى ئه‌وێ دكه‌ڤنه‌ ژیر چه‌ترا كه‌سك گۆره‌ى سیسته‌مێ فیفتی فیفتی.
پشتى ڤێ هه‌میێ ستویێ خو وه‌كى یێ زرافێ درێژ دكت وبه‌حسێ هزرێت نویخارز ودابڕانێ دكت، براستى كه‌نیه‌كێ هیسترى مرۆڤى دكر ئایا ب چ ڕویێ قایم كه‌سه‌كێ هه‌تا دفنێ نوقوى بووى دگه‌را مریدى وشاگردیێ یانژى كویله‌تیێ بۆ ده‌ستهه‌ڵاتیا پاشڤه‌ڕۆیا حوكمێ خێزانه‌كێ ئه‌ڤرۆ به‌حسێ دابڕانێ بكت ژ"هزرێت گه‌ڤنه‌په‌رست!"بدیتنا من ئه‌ڤ كومیدیا دهه‌مان ده‌مدا تراژیدى مینا ((مشكه‌كێ یه‌ به‌حسێ پاقژیێ بكت))!، هه‌رچه‌نده‌ یا ئه‌فه‌ندیێ مه‌ دبێژت وبه‌حس دكت ژبابه‌تێ دابرانا خۆ ژبهایێت پیرۆز ئه‌وا ده‌رباز دبت ژسنۆرێ دابرانا ژكه‌لتۆرى هیچ پاقژى تیدا نینه‌ وگوشتێ به‌رازى لێ عافیه‌ت بت هه‌ر وه‌كى جوامیرى بخۆ سالا پار خویاكرى!
به‌لێ هه‌ر چاوان بت كار وكریار وسلۆكێ بازرگانى یێ وى وهه‌ڤالێن وى به‌رۆڤاژى فه‌رهه‌نگا وى یا سوشیال وپرۆپاكنده‌ وبانگه‌شه‌یا وى یا چه‌بخوازه‌ براستى دیمه‌نێ وان تا ڕادده‌یه‌كا باش وه‌كى وى وێنێ شیعریێ یه‌ ئه‌وێ هوزانڤان (به‌یار باڤى) ل ده‌ستپێكا ساڵێت نووتان دا كێشاى بۆ ڤان جۆره‌ چه‌پخوازان ل ڤى ئالى و ل وى ئالى ده‌مێ د "فه‌رهه‌نگا شۆڕه‌شگێره‌كێ" ده‌نگێ ئاخ وموخابنیێ بۆ ڤه‌گێراى:
پڕ دكر به‌حسا پاله‌و جوتیارا
خوه‌ش خوه‌ش دئینا
ناڤێ هوشى مێن و ماوو جیڤارا ..
لێ ئه‌ڤروكه‌ ..
وپشتى دوو بهارا
به‌رپه‌رێت فه‌رهه‌نگێ ڤه‌دكه‌م
ته‌ماشه‌دكه‌م
هه‌ر لسه‌ر وان به‌ر په‌را
په‌یڤێن فڕین
یێت خۆ كرین
وێنێت ( هارتوپ ) و ( سوپه‌را ) *
په‌یڤێن مرین
یێت خۆ كرین
قه‌سرێت ئاغاوو به‌گه‌له‌را ..
......
*ل گوره‌ى وى سه‌رده‌مى (سالا 1993) ئه‌ڤه‌ دو جورێن ترومپێلێن گران بها بون، وئه‌ڤرۆژى ئه‌م ئه‌م هه‌مى دزانن چ جۆره‌ خۆشیێت دونیایێ ب سه‌رداگرتنا مالێ گشتى دا "دابرانخواز وپێشكه‌فتنخوازان" بۆ خۆ ب ده‌ستڤه‌ئیناینه‌!