هەموو جارێك بێدەنگی مانای ڕازی بوون و بێ‌ هەڵوێستی نییە!!

مودریك عەلی عارف

لەناو عەرەبدا گوتەزایەك هەیە كە دەڵێ‌: (سكوت البكر إِذن) واتە بێدەنگی كچ لەكاتی پرس پێكردنیدا بۆ هاوسەرگیری، نیشانەی ڕازی بوونیەتی... ئایا ئەم قسەیە لە هەموو كاتێك و بۆ هەموو كچێك ڕاستە؟! بە دڵنیاییەوە كە نەخێر، بۆ؟ چونكە هەندێ‌ جار ئەم كچە لە شەرم و حەیاییدا بێدەنگە و هیچ ناڵێ‌، هەندێ‌ جاریش لە ترسی باوك و برا و دایك و هەندێ‌ لە كەسە نزیكەكانی كە هەڕەشەیەكی توندیان لێ‌ كردووە و دڵنیاییە لەوەی هەڕەشەكە دەبێتە ڕاستی و جێبەجێی دەكەن.
بێدەنگی بەشێك لە هاوڵاتیان و بەشێك لە شارو شارۆچكەكان لە هەندێ‌ قۆناغ و وێستگەی جیاوازدا لەو زوڵم و ستەمەی دەرهەقیان دەكرێت و مافیان دەخورێ‌ و زەوت دەكرێ‌، ئەوە مانای ڕازی بوون و قبوڵكردنی ئەو ستەمە و بێ‌ هەڵوێستییان نییە، بەڵكو دەكرێت لە دڵنیاییان بێت لە ستەمكاری و بێ‌ ویژدانی و دیكتاتۆرییەتی ئەو دەسەڵاتەی بەسەر سەریانەوەیە و حوكمڕانییان دەكات، دڵنیان لەوەی كە گیان و ژیانی خۆیان و ماڵ و مناڵیان دەكەوێتە بەر هەڕەشە و مەترسییەكی حەتمییەوە. (ئەڵبەت ئەم قسەیەش نابێت بكرێتە پاساو بۆ بێدەنگی هەمیشەیی و لە بەرامبەر هەموو ستەمێك) و دەبێت دواجار كۆمەڵێك ئەو قوربانییە بدەن و ئەو بێدەنگی و مات بوونە بشكێنن.. قوربانییەك لەپێناو خۆیان و نەوەكانیان.
لانی كەمی ئەم بێدەنگییە لەبەرامبەر ئەو ستەم و جەور و ناعەدالەتییەی كە بەرامبەریان دەكرێ، دەبێ‌ لەناخەوە پێیان ناخۆش بێت و خەم و خەفەتی لێ‌ بخۆن و ئازاری ناخ و ویژدانیان بدات... نەك پینە و پەڕۆی ستەم و ناعەدالەتی ستەمكاران بكەن و بە بێدەنگییەكەی خۆشیان ڕازی بن... ئەمە ئیدی ئەبێتە (أچعف الإِیمان-لاوازترین ئیمان) بەرامبەر ستەم و مونكەرو ناعەدالەتی، وەك لەم فەرموودەیەدا هاتووە: عَنْ أَبی سعیدٍ الخُدریِّ رَچِی اللهُ عَنْهُ قاڵ: سَمِعتُ رسوڵ اللهِ صَلَّی اللهُ عَڵیْهِ ۆسَلَّمَ یقولُ: (مَنْ رَأَی مِنْكُمْ مُنْكَرًا فَلْیُغَیِّرْهُ بِێدِهِ , فَإِنْ ڵمْ ێسْتَگِعْ فَبِلِسَانِهِ، فَإِنْ ڵمْ ێسْتَگِعْ فَبِقَلْبِهِ , ۆژَلِكَ أَچْعَفُ الْإیمَانِ.) رواه مسلِمٌ. .