لە هەرێمی كوردستاندا (شەقام)مان نییە

مەبەست لە شەقام ئەو شەقام و جادە و كۆڵانە قیرتاوانە نییە كە گلەیی زۆری لەسەر, مەبەستمان لە شەقام لەم وتارەدا شەقامی سیاسییە كە گروپێك یان زیاتر بۆ گوزارشت لە خواستەكانیان دێنە سەر شەقام و بە شێوازێكی مەدەنیانە چالاكی دەكەن و بۆ ماوەیەكی دیاریكراو لەبەرامبەردەسەڵات و كۆتایی دێت .لە هەرێمی كوردستاندا تاكو ئێستا بە واتا سیاسییەكەی شەقاممان نییە , راستە لێرە و لەوێ چالاكی مەدەنی دەكرێت لە خۆپیشاندان و گردبوونەوە و بایكۆت و مانگرتن و تا بە كاری هونەریش دەگات , بەڵام پرسیاری گرنگ ئەوەیە ئایا ئەمە شەقام بووە كە ئەم چالاكییانەی كردووە یان حزبەكان لەپشتی جوڵاندنی ئەم شەقامەن؟ بەبڕوای ئێمە هێشتا شەقام بە مانا سیاسییەكەی لە دایك نەبووە لە هەرێمدا لەبەر ئەم سێ خاڵەی خوارەوە: 

1- گەشەی سیاسی لە هەرێمدا لە ئاستێكی پێشكەوتوو نییە و هێشتا ماویەتی گەشەبكات تا بگاتە ئەو ڕادەییە شەقامێكی بێ دەست و پاڵپشتی حزبی لە دایك بێ .
2- گەشەی دیموكراسی هێشتا لەم ئاستە نییە خەڵك بێ گەڕانەوە بۆ حزب ئەوەندە بوێری هەبێ بێتە سەر شەقام .
3- گەشەی كۆمەڵی مەدەنی جارێ‌ لەسەرەتاكانییەتی و تەواو لە ژێر هەژموونی حزب دەرنەچووە تا نوێنەرایەتی خەڵك بكات و شەقامی لێ دورست بێ.
بۆیە زۆرێك لەم چالاكییانەی كە لە هەرێمدا كراوە ئەوەندەی حزب لە پشتییەوە بووە ئەوەندە ڕەنگدانەوەی خواستی شەقامێكی خۆرسك نەبووە, بۆیە زۆربەی جارەكان بێ ئەوەی داخوازییەكان جێبەجێبكرێن چالاكییەكە كۆتایی هاتووە, واتا ئەوەی كە حزبەكان لە كۆبوونەوەكانیان بۆیان نەكراوە لەسەر یەكتری بیچەسپێنن ویستوویانە بەفشاری شەقامێكی دەست لەپشتدراو لەسەر یەكتری فەرزی بكەن . سوتاندنی بارەگاكانی یەكگرتوو لە بادینان, خوپیشاندانەكانی 17 شوبات, چالاكییەكانی پارساڵ لە دەڤەری سەوز و خۆپیشاندانەكەی 27/9/2016 نموونەی زەقی بێ شەقامین .سووتاندنی بارەگاكانی یەكگرتوو لە بادینان قسە هەڵناگرێ بۆ هەمووان ڕوونە. لە 17 شوبات حزبی ویستی لەسەر خۆپیشاندانەكان بوو , ماوەی دوو مانگ درێژەی كێشا كە كاری تەواو بوو بە دوو رۆژ كۆتایی پێهێنرا. چالاكییەكانی پارساڵ ئەوەندە توندبوون خەڵك كوژرا, بارەگا سووتا, كەچی سنوورەكانی رۆژانی شەڕی ڕەشی براكووژی نوێكردەوە , لە 27/9ی ئەمساڵ كە حزب ویستی پەیامێكی كورت و هێمنانە بداتە دەسەڵات, خوپیشاندانەكە كورت و پوخت بوو ,لەگەڵ ئەوەش نموونەیەكی مەدەنی جوان بوو .ناكرێت لە بەهاكەی كەم بكرێتەوە , بەڵام ناكرێت ناوی بنێن شەقام , پرسیاری گرنگ لێرە ئەوەیە ئەم وتاربێژ و نوێژخوێن و هوتاف كێشانەی سەرای ئازادی تا بەوانەی ئەمڕۆش دەگات دەبێ خزمەتی ئەجیندای كام لایەنی هەرێمی و دەسەلاتی كوردیان كردبێت ؟