كەناڵی NRTو بەرنامەكەی سێوكانی

ماوەی چەند ساڵێكە كەناڵی( NRT) وەك كەناڵێكی خەبەری دەستی بە پەخش كردوە،لە پاڵ هەواڵ و شرۆڤەكان، كۆمەڵێك بەرنامەی جیا جیاشی هەیە،یەكێك لەم بەرنامانە بەرنامەكەی بەڕێز (سێوكانی) یە.
دیارە ئەم كەناڵە خۆی وەك تاكە كەناڵی بێ‌ لایەن ناساندوە،بەڵام بی لایەن بوونی لە رەهەندە حیزبیەكە، ئەوە ناگەیەنێ‌ كە لە رووی فیكریش هەر بێ‌ لایەن بێ‌،چونكە بە پێی سیاسەتی هەواڵ و ئاڕاستەی بەرنامەكانی بە روونی ئەوە بەرچاو دەكەوێ‌، كە خزمەتەكانیان دەچێتە چوارچێوەی پڕۆژەیەكی نەتەوەیی چەپگەر. ئەمەش عەیبە نیە كەناڵێك سەدان هەزار دۆلاری تیا خەرجكرابێ‌ مافی خۆیەتی خزمەت بەوە بكات كە قەناعەتی پێیەتی.
سەبارەت بە بەرنامەكەی بەڕێز(سێوكانی)دیارە سەرەتا وەك میوانی بەرنامە دەردەكەوت،بەڵام ماوەیەكە وەك خاوەنی بەرنامەی (پێكەوە ژیان) دەردەكەوێ‌، لەم بەرنامەیەدا بەردەوام خۆی یا پێشكەشكارە یان میوان،لە ئەڵقەكانی ئەم بەرنامەیەدا كۆمەڵێك خەڵك دەركەوتن و وون بوون،بەڵام هیچ بەرنامەیەك بێ‌ بەڕێز (سێوكانی)پێشكەش نەكراوە.
دیارە عنوانی پێگەی بەڕێزیان (توێژەرە)خۆی بە شارەزا لە فیكری ئیسلامیش ناساندەوە.ئەم پیاوە بەڕێزە كە من خۆم لەیەكەم بەرنامەوە تا ئەم لەحزەیە هیچ بەرنامەیەك نیە سەیرم نەكردبێ‌.
بەڕێزیان بەردەوام كۆمەڵێك شت هەیە دووبارەیان دەكاتەوە و، زۆر جاریش نەك هەر بینەرەكانی بەڵكو میوانەكانیش بێ‌ تاقەت دەكات.
لەوانەیە خەڵكانێك بە قسەی نابەجێ‌ و نەشیاو لە تۆڕە كۆمەڵایەتیەكان شتیان لەسەر نوسیبێ‌،بەڵام من قەناعەتم بە ناوزڕاندن و سوكایەتی كردن بەكەس نیە و، ئەمانە ناچنە چوارچێوە حیواری سەقافی.
بەڕێزیان ئەوەی لە كۆی بەرنامەكانی ئاماژەی پێداوە و، بەردەوام دووبارەیان دەكاتەوە بە كورتی بریتین لەم قسانە، ( كاتی خۆی كە ئیسلام هاتوە بە ناوی فەتحەوە كۆمەڵێك وڵاتیان داگیركردوە و، بە ناوی جیهاد شەڕیان بەسەر خەڵكدا سەپاندوە و، وێرانكاری زۆریان كردوە و، خەڵكی ئەم ناوچانەیان كردوە بە كۆیلە و جاریە و، وەك دەستكەوتی شەڕ بەسەر خۆیان دابەشیان كردوە،پێغەمبەریش كۆمەڵێك جاریەی بوە و، وەك خێزانی خۆی مامەڵەی لەگەڵ كردون، ئینجا داعش هەڵنەتۆقیوە و لە فەزاوە دروست نەبووە، بەڵكو ئەوە كتێبە دینیەكانن كە بە كۆمەڵێَك دەق هۆكاری دروست بوونی داعشن، هەروها ئەوەی داعش دەیكات لە مۆخ و هەناوی ئیسلام هەڵقوڵاوە و، ئەسڵەن ئەوان لەسەر ئەرزی واقیعدا دەقا و دەق پڕاكتیزەی ئیسلام دەكەن وەك خۆی، دیارترین سەرچاوەكانیش بۆ بەرهەم هێنانی فیكری داعش كتێبەكانی حەسەن بەننا و سەید قوتب و ئیمامی ئەحمەد و ئین تەیمییە و چەند كەسانێكی ترن. ئینجا لە ئیسلام دا شێك نیە ناوی دیموكراسی بێ‌ و ئەسڵی دینیش لەگەڵ ئەم چەمكەدا پێچەوانە و دژە).
ئەمانە زۆربەی هەرە زۆری ئەو باسانەن كە دووبارە و، چەند بارە بەڕێز(سێوكانی) لە بەرنامەكانی ئاماژەیان پێدەكات و، بە شێوازی جۆرا و جۆر دەیان وروژێنێ‌.
سەرەتا با ئەوە بڵێن رەخنە بەردەوامەكانی بەڕێزیان و، بەستنەوەی داعش بە فیكری (حەسەن بەننا و سەید قوتب) ئەگە لەبەر ئەوەیە كە بەڕێزیان ساڵانێكی زۆر بانگەشەكاری مەدرەسە و فیكری (حەسەن بەننا و سەید قوتب) بووە، ئەوە دیارە پێویست بە تۆڵە ناكە لەمردوەكان، چونكە بەڕێزیان ئارەزوومەندانە ئەندامی ئەو رەوتە بووە، و ئیخوان بوون داعش بوون نیە بە زەبری تفەنگ بێ‌.
پاشان ئەگەر ئەوە راست بێ‌ كە (بەننا و قوتب)لە سیاقی مەوقیع و تەئریخی خۆیان دەربهێنرێن و، دوای 50 ساڵ زیاتر لە مردنیان ئیدانە بكرێن و لێپرسینەوەیان لەگەڵ بكرێ‌، دەی باشە بەڕێزیان كە ئێستا لە ژیاندا ماوە، نابێ‌ لێپرسینەوی لەگەڵ بكرێ‌ لەسەر ئەم رۆژگارانەی كە ئەندامی حیزبێك بووە كە سەر بەهەمان مەدرەسەیە؟
باشە ئەوەی بەڕێزیان باسی دەكات دینێك (لە عەرەبەستانەوە هاتبێ‌، باب و باپیرانی ئێمەی بە ناحەق كوشتبێ‌، هەناسەی ئازادی تیا نەبێ‌، بە گۆڕانكایەكانی سەردەم نەخوا، دینێك هەر كوشتن و خوێن رشتن بێ‌ و؟، پێغەمبەرەكەشی بەدەر نەبێ‌ لە هەڵكوتانە سەرخەڵك و كاولكاری، بەكورتی دینێك خەڵكێكی داعش ئاسای بەرهەم هێنابێ‌ ). ئیتر بەو هەموو تەفسیر و تێكەڵكردنەی بەڕێزیان وێنای دین دەكەن، كێشە نیە ئێمە هەموومان قبوڵە چونكە لەمە باشتر شك نابەین. بەڵام بەڕێزیان وەك كەسێكی ئەكادیمی و توێژەرێكی زانستی، دینێكی ئاوای قبوڵە؟! ئەگەر قبوڵیەتی ئەوە پێویست بەم هەموو ناشیرین كردنەی دین ناكات كە خۆی یەكێك بێ‌ لە پەیڕەوانی، ئەگەر قبوڵیشی نیە كە مافی خۆیەتی قبوڵی بكات یان نا، بەڵام ئەگەر قبوڵی نیە خۆ بەڕێزیان كەسێكی زۆر بوێرن، بۆ لەبەرنامەیەكدا رێك هەڵوێستی خۆی راناگەیەنێ‌ و بڵێ‌، بینەرانی بەڕێز من ئێستا نەك هەر ئیسلامی نیم، بەڵكو قەناعەتم بە ئیسلامیش نیە وەك دین، ئینجا كە خۆی یەكلا كردەوە، ئیتر مافی خۆیەتی هەر رەخنەیەك بگرێ‌ و هەر چۆنێ‌ قسە بكات و كەس ناتوانێ‌ رەخنەی لێبگرێ‌.
من قەناعەتم وایە خۆشی قەناعەتی بەهەندێ‌ لە شتەكانی خۆی نیە،بەڵام ئامانج لە وتنیان چیە؟ خوا دەیزانێ‌ و خۆی. بەڕێزیان باش دەزانێ‌ داعش ئەوەندەی پڕۆژەیەكی سیاسی ئیقلیمی و نێودەوڵەتیە، بەهیچ شێوەیەك پەیوەندی بە دین و بە ئیسلام و بە لایەنە ئیسلامیەكانی كوردستانەوە نیە. بەڕێز(سێوكانی)باش دەزانێ‌ ئەگەر ئیسلامیەكانی كوردستان تەبەنی فیكری داعشیان بكردایە، ئێستا ئارامی لەهیچ بستە خاكێكی كوردستان نەمابوو. چونكە ئیسلامیەكانی كوردستان خاوەنی زیاتر لە 300 هەزار دەنگن. دەی خۆ بینیمان بە 100 تیرۆرست یەك هەفتە دۆخی شارێكی گەورەی وەك (كەركوك) چۆن ئاڵوزبوو، ئەگەر لەم 300هەزارە 1000 كەس تیرۆرست بن ئارامی لە وڵات ناهێڵن.
ئەگەر داعشن بونیش لە ئیخوانەوە سەرچاوەی گرتبێ‌ وەك بەڕێزیان بەردوام ئەمە دوبارە دەكەنەوە، ئێستا كە زیاتر لە (60)هەزار ئیخوان لە زیندانەكانی میسر بەندكراون. ئەگەر 6 هەزاریان داعش بونایە ئیسَتا ئەم وڵاتە لوول كرابوو یا نا؟
باشە بەڕاست ئەو شەڕە قورسەی لە بەرنامەكەی بەڕێزیان دێتە ئاراوە، ئا ئەمەیە پێكەوە ژیان؟
راستی من لێرەوە پێشنیار بۆ بەڕێز(سێوكانی) و كەناڵی( NRT) دەكەم، ئەگەر ئەم بەرنامەیە هەر بەم فۆڕمەی ئێستای بەردەوام بێ‌، ئەوە ناوی بەرنامەكە بگۆڕن بۆ(پێكەوە زیان) تا جێگای شەڕ و لێكترازانی كۆمەڵگای تیا بێتەوە، یان ئەگەر بە فیعلی مەبەستیان تۆخكردنەوە و رەنگ رێژكردنی پێكەوە ژیانە، ئیتر لە میانەی بەرنامەكاندا با تیشك بخرێتە سەر ئەم نەسیجە كۆمەڵایەتیەی كە لە كودرستان بونی هەیە نەك دروستكردنی كێشە.
باشە بۆ باس لەوەنەكرێ‌ موسڵمان و كاكەییەكانی هەڵەبجە،موسڵمان و ئێزیدیەكانی شەنگال،موسڵمان و مەسیحیەكانی كۆیە، شیعە و سوننەكانی گەرمیان، پارتە چەپ و راستەكان، ئیسلامی و عەلمانیەكان، سەلەفی و سۆفی،نەقشی و قادری و، دەیان رەوت و گروپ و ئایدیای تری جۆرا و جۆر، چۆن لەم كوردستانە بەیەكەوە دەژین و كەسیش كەس ناكوژێ‌؟!
لە كۆتایدا بە حەقیقەت نەئیسلام ئەوەیە كە بەڕێز(سێوكانی) وێنای دەكات،چونكە زۆربەی ئەو شتانەی كە بەڕێزیان وەك رەخنە دەیانخاتە روو، رووداوگەلێكی مێژووی موسڵمانن، مێژووش لەگەڵ سەردەمی خۆیدا بە كۆتا دەگات. ئەگەر تاوان و زڵمێكیش هەبێ‌،كە من نەك هەر پێم وایە هەیە بەڵكو زۆریشە،بەڵام ئەوانە لێی بەرپرسیارن كە ئەنجامیان داوە، دەی دەكرێ‌ ئێستا هەرچی ناوی (عەلی)یە لەبەر (عەلی كیمیاوی) بەتاوانی (عەلی) بوون لەسێدارە بدرێ‌؟
ئینجا بەهیچ شێوەك ئیخوانیش ئەوە نیە كە بەڕێزیان كردویەتی بە كابوس و خەڵكی پێدەترسێنێ‌،ئەگەر كابوس بوایە، دوای وازهێنای ئەو مامۆستا بەڕێزە لە ئیخوان، دەبوو وەك داعش و هەندێ‌ هێزی تری چەپگەر، نەهێڵن كەس بەسەلامەتی لەناویان دەرچێ‌.ئینجا داعشیش وەك گروپێكی تیرۆرست و زاڵم و مرۆڤكوژ و وێرانكەر، نە تەمسیلی دین دەكات نە دینداری،بەڵكو تەمسیلی ئەو دورە دەكات كە چیرۆكنووس و دەرهێنەرەكان بۆیان داناوە و هیچی تر.