بێ‌ دەنگی پێش زریان

 

سروشت وەك شاكارێكی خوایی جگە لە جوانیەكەی، زۆر جار پڕە لە ئیلهام و پەند و ئامۆژگاری بۆ مرۆڤەكان. كاتێ‌ كە زریان هەڵدەكات بەر لە هەڵكردنەكە كەشێكی مات و بێ‌ دەنگ باڵ بەسەر ئەو ناوچەیەدا دەكێشێ‌ و، و دواتر باهۆز و زریان سەردەكات و تەر و وشك بەیەكەوە لول دەكات.

راستی ئەم دۆخە نالەبارەی ئێستای هەرێمی كوردستانیش، رێك لە بێ دەنگی پێش زریان دەچێ‌. زیاتر لە دوو ساڵە، سەرەتا بە مانگی 50 رۆژی و دواتر مانگی 90 رۆژی و، ئێستاش بە چارەكە مووچەی 60 رۆژی خەڵك بەڕی دەكرێ‌.

هەموو ئەمانە بەلایەك، بێ‌ منەتی و سوكایەتی كردنیش بە خەڵك بەلایەكی تر.ئەوەی زۆر جێگای پرسیار و سەرسوڕمانی منە ئەوەیە، ئەرێ‌ بۆ هەرچی سەركردەی ئەم رۆژهەڵاتی ناوەڕاستەیە، هەموویان یەك بیركردنەوەیان هەیە و، وەك ئەوەی بەرهەمی یەك كۆمپانیابن و یەك مەكینەیان لەسەرە؟!. نازانم بۆ عیبرەت لەیەكتر وەرناگرن؟! بۆ وەك مرۆڤ لە گەلانی خۆیان ناڕوانن؟.بۆ هەموو خەڵك بە خزمەتكار و رەنجبەری خۆیات تێدەگەن؟!

باشە بۆ لەبری ئەم زمانە زبرە دەسەڵاتداران ناتوانن بە زمانی خۆش لەگەل خەڵك بدوین؟ سەبارەت بەخۆشمان، ئێستا ئەم دۆخەی كە هاتۆتە ئاراوە، جگە لەوەی ئەگەر دەسەڵاتداران دەست بخەنە سەر قورئان كەس قەناعەت بە بێ‌ پارەیی حكومەت ناكات،لەم لاشەوە بە وشەی رەق و قسەی زەق، لەبری سوپاسی خەڵك تەشهیر بە خەڵك دەكرێ‌!!!

دەزانن ئەوەی ئێستا لەعێراق و سوریا و لیبیا روودەدات، سەرەتا جگە لە خۆپیشاندانێكی هێمنانە و، وتنەوەی چەند هوتافیك زیاتر نەبوو؟، بەڵام دواتر بە حساب نەكردن بۆ خەڵك و بەسوك سەیركردنی میللەت مەرگەسات و لافاوی خوێن هەستا!!!

دەزانن سوریەكان و لیبیەكان و ئەواتر تریش، میللەتەكەیان كە شۆڕشیانكرد كێشەی دەوڵەت نەبوونیان نەبوو، نا چونكە دەوڵەت بوونی هەبوو. بەڵام بۆ عەدالەت و كەرامەت و نان و ئازادی رژانە سەر شەقامەكان. ئاخر مرۆڤە یەك جار دەژی، كە بە كولەمەگی ژیا و مناڵەكەی داوای نانی كرد و نانی نەبوو، ئیتر بەدیار حاڵی خۆیەوە دانیشت و گریا، ئەو كات نەك دەوڵەت كیشوەریش بەو كەسە چی؟! پێم وایە ئێستا دۆخەكە گەیشتۆتە خاڵی نەگەڕانەوە و كۆتایی تونێلەكە و ئیتر تەواو حاڵەكە بە زمانی حاڵ هاواردەكات بمگۆڕن.
پێدەچێ‌ لە گەڵ ساڵی تازە و لە چەند مانگی داهاتوودا داعش بەرەو كۆتایی بچێ لەعێراق و، ئیتر بەهانەیەك نامێنێ بۆ دەسەڵاتداران. بۆیە ئیتر خەڵك بێ‌ دەنگ نابێ‌ و، ئەم بێ دەنگیەش بێ‌ دەنگی پێش زریانە.

ئاخر حكومەت لە مانگی 9ی پارەوە ساڵێَك و دوو دانە مانگە، بەڵێنی نیو مووچەی مانگی ئەیلولی 2015ی مامۆستایانی جێبەجێ‌ نەكرودە، ئیتر خەڵك قەناعەت بەكام بەڵێنی حكومەت بكات؟ ئاخر بۆ ئەم دەسەڵاتە نەهیچ دەبیستێ و نەهیچ دەبینێ؟بۆ هەموو مافێك بەخۆی دەدات و هەموو رەخنەیەكیش لە میللەت دەگرێ‌؟
من دڵنیان هەڵچون و هەیەجانی برسیەتی روو لە هەر گەلێك بكات، جیاوازی دۆست و دوژمن ناهێڵێ و میللەت لەبەر ئازاری خۆی دەست بۆ هەموو شتێك دەبات. ئێستا ئەگەر چی درەنگە بەڵام هێشتا كارلەكار نەترازاوە ، پێویستە سەرەتا حیزبەكان و دواتر حكومەت بە هۆش خۆیان بێنەوە و، زۆر بەجددی بیرلەوە بكەنەوە ئەم دۆخە تاسەر بەم شێوەیە ناڕوە.
ئاخر بە دڵنیایەوە خەڵك هەموو وەك یەك بیرناكاتەوە، كوردیش وەك گەلێكی شەرقی سەرگەرمە، باشە دواتر لە هەڵكردنی زریان و توڕدانی هەموو حیزبەكان و فەرتەنە و بەدبەختی كێ‌ بەرپرسیارە؟بۆیە هەر كەس و حیزب لایەنێك خۆی بە دڵسۆزی خاك و خەڵك دەزانێ، پێویستە لەوە تێبگە كە ئیتر خەڵك نەك پڕ بووە، بەڵكو زۆر دەمێكە لەسەری دەڕژێ‌ و، پڕیشكی غەزب و توڕەیی میللەت دەگاتە فەلەكی ئاسمان.

بۆیە تا هەمووتان دەستان لە هەمبانەكەوە دەرنەچووە، توزێ‌ لە هەمبانە پڕەكانی حیزب بكەنە هەمبانەی بەتاڵی خەڵكەوە و ،با لە بێ‌ دەنگی پێش زریان رزگارتان بێ‌.