مەلا كوشتن، خۆكوشتنە..! "پەیامێكی توند، بەڵام بە ئەسپایی بۆ دەسەڵات"

.
ئەگەر ئەتەوێ كۆمەڵگایەك هەڵوەشێنیتەوە دەست بۆ پیرۆزی و رەمزەكانی ببە و لەناویانبەرە، چونكە ئیدی شتێك نامێنێتەوە ناوی شوناس بێت. مەلاو زانای ئایینی ئیسلام، مێژووی كورد سەلماندوویەتی رەمزو بربرەی پشتی ئەم كۆمەڵگایەن. چونكە سیاسەت و ئەدەب و فكر و فەلسەفە و مێژوو لەكوردستان هەر ئەوان سەرباشقەی بوون. ناتوانی باسی مێژووی كورد بكەیت لە شۆرشەكانی لە جوانییەكانی لەئەدەب و شیعرەكانی بەبێ ناوهێنانی مەلا.
رۆژنامەنووس یان سیاسی یان كەسانی ئاسایی كاتێك بەناهەق شەهید دەكرێن ئیدی برینێكی دیكە لەسەر جەستەی نیشتمان درووست دەبێت هەنگاوێكی دیكە خەباتمان دوا دەكەوێت. بەڵام بەخوا مەلا كوشتن ئەتوەستێنێ ووشكت ئەكات ئەتتاسێنێ.مەلا كوشتن واتە باوك كوشتن واتە مامۆستای خۆ كوشتن یەعنی رابەری رۆحی كوشتن و عەقڵ كوشتن واتە براگەورە كوشتن واتە دەس سپی و ریش سپی كوشتن بەكورتی واتە خۆكوشتن و كۆمەڵگا كوشتن.
ئاخر گەورەم، لەداواكردنی ژنەوە تا كاندیدبوون بۆ پەرلەمان هەموومان شانازی بە مەلایەكەوە دەكەین ئیدی چۆن ئەتوانین دەستیان بۆ بەرین، ئای چەند بێ غیرەتییە كاتێك لوولەی تفەنگەكەت روو دەكەیت مەلایەك و مێزەرە سپییەكەی خەڵتانی خوێن دەكەیت. دەبێ لەوكاتەدا رۆحی نالی و مەولەوی مەلای مودەریس و دەیانی دیكە چەند راچڵەكیبن، ئینجا تخوا لەسێدارەدانی قازی نەمرو شەهیدكردنی مامۆستا وشیار ئیسماعیل لەهەولێری پایتەخت ئازارەكانیان جیاوازی چییە؟ بگرە دووەمیان زۆۆر بەئازارترە كەلەسایەی دەسەڵاتێكی كوردی پەتی خۆماڵیدا لەماڵەكەی خۆتدا بەدەستی خۆت رۆڵەیەكی خۆت شەهید ئەكەیت. نەفرەت لەهەرچی پاكی و جوانی دەكەیت.كێشەكە لێرەدا كۆتایی نایەت، دەبێت دەسەڵات ئەوەش بزانێ بكوژ بدۆزێتەوە یان نا _ كە زۆۆر جێگەی گوومانە- دەبێ ئەو پەیامە توندە بەئەسپایی بەگوێیدا بچرپێنرێت كە لەكۆمەڵگەیەكی ئاینیدا زانای ئایینی بەناهەق شەهید بكرێت خەڵك تورەتر دەبێت، لەسایەی دەسەڵاتێكی كوردیدا لە موقەدەسترین چینی كۆمەڵگا بدرێت ئەو دەسەڵاتە نەرم نەرم بزمار لەتابووتەكەی دەدرێت.بۆیە چاكترە گوێ شل بكات و بەجدی سەیری بابەتەكە بكات گەرنا رۆژێك دێت غەزەبی مەلا كوشتن وەك تەرزە ببارێت بەسەرماندا.
لەكۆتایدا ئەوەی ماوەتەوە ئەوەیە یەكگرتوو یەكگرتووەكان وەك چۆن بۆ شەهید فواد چەلەبی دانیان بەخۆدا گرت ئێستەش نەفەس درێژ بن و چاوەرێی لیژنەی خوا بن تا هەموو شتێك ئاشكرا دەكات و لە مەحكەمەی خۆی سزایان بدات. ناوی ئەویش بخاتە لیستی سەیدا موشیرو پیاوچاكانی وەك رێشاوییەوە. دروود بۆ گیانی پاكی شەهید دكتۆر وشیارو تەواوی شەهیدانی رێگای ئازادی و برایەتی و حەق ناسی.

ئەم شیعرەش بە روومەتە نورانییەكەی مامۆستای ئازیز:
مەلا گیان
هەرچی نوسین و قسەت هەیە
هەر هەمووی لەگەڵ خۆت بەرە
بیاندە بەو سەروەرە
شەكوات بكەو بڵێ:
لەشاری مەلایان
لەپاڵا عەباكەی شێخی پیران
لەتەنیشت گۆرەكەی كاوان
دەست بۆ مێزەرەكەت برا
لەسەر كەلیمەی حەق
وەك تائیف خەڵتانی خوێن بوو
شەهید كرا..!
.................................................
ڕەزوان زەڵمی _23/11/2016/ چوار شەممە