هاواری شەقام و ترس لە ئایندەی دیموكراسی

 

ئەگەر لە ئێستادا سەرنجی شەقامی كوردی بدەین دەبینین شەقامێكی خرۆشاوە، رۆژانە فەرمانبەران و مامۆستایان و چین و توێژە جیاوازەكانی هەرێمی كوردستان هەریەكە بۆ مەبەستێك دێنە دەرەوەو بە رێپێوان و ناڕەزایی دەربڕین بە شێوازی جۆراوجۆر داوای مافەكانیان دەكەن، ئەو خۆپیشاندان و رێپێوانانەی لە هەرێمی كوردستان دەكرێت لە زۆر روەوە جیاوازن لەوانەی كە لە بەهاری عەرەبیدا روویاندا، بەڵام ئەم خۆپیشاندانەش كە ئەمڕۆ لە كوردستان بەڕێوە دەچن پێویستە بە بایەخەوە سەیر بكرێن و پشت گوێ نەخرێن و هەر لە چوارچێوە مەدەنی و دیموكراسیەكەدا چارەسەر بكرێن و رێگە لەوە بگیرێت كە بەرەو توندوتیژی بڕوات یان لایەنی بێگانە دەستیان تێ بخات، چونكە ئەگەر بڕیاربێت سیستمی سیاسیی لە هەرێمی كوردستاندا لەسەر بنەمای دیموكراسی بێت، دەبێت گرنگترین شتێك لای حكومەت دەنگی هاوڵاتیان بێت، چونكە ئەو پارتە سیاسیانەی ئێستا لە دەسەڵاتدان و حكومەتیان پێكهێناوە، هەموویان بە دەنگی خەڵك رۆیشتوون و هەریەكەش بەپێی ئاستی بەدەستهێنانی دەنگەكان بەشداری لە حكومەتدا كردووە، لەبەرئەوەش كە دیموكراسیی مانای كێڕانەوەی دەسەڵاتە بۆ گەل، كەواتە پارتە سیاسیەكان و بەتایبەتیش ئەوانەی كە بەرپرسیاریەتی گەورەیان لە ئەستۆدایە لەنێو حكومەتدا زۆر پێویستە بەتەنگ ناڕەزایی و خۆپیشاندانەكانی هاوڵاتیانەوە بن و گوێیان بۆ بگرن و لە گرفتەكانیان تێ بگەن.

لە ئێستادا ئەگەر سەیری خۆپیشاندانەكان بكەین دەبینین زۆر بە شێوازێكی مەدەنی و دوور لە توندوتیژیە . لە سیستمنی دیموكراسیدا هەموو چین و توێژێك مافی خۆیەتی كە داوای مافە مەدەنیەكانی بكات، لەبەرئەوەش كە لە كوردستاندا دروست كردنی حكومەت لەسەر بنەمای دەستكەوتی هەڵبژاردنە، كەواتە هەموو ئەو پارتانەی كە ئێستا لە دەسەڵاتدان دەبێت ئەو راستیە بزانن كە لە ئایندەدا كە هەڵبژاردن دەست پێ‌ دەكاتەوە دەبێت هەموویان چاوەڕوانی دەنگی هاوڵاتیان بن هەتا دەنگیان پێ‌ بدەنەوە. لەبەرئەوە ئەو پارتە سیاسیانەی كە لە دەسەڵاتدان زۆرتر بەرپرسیارن لە ئاست چەسپاندنی دادپەروەری و شەفافیەت و پێشكەشكردنی خزمەتگوزاری بە خەڵك و دابینكردنی ئارامی و ئاسایش و بوونی پرۆژەی گەشەپێدان لە بواری جۆربەجۆردا بۆ پێشخستنی كۆمەڵگەی كوردی.

بەشێكی زۆری ناڕەزایەتیەكانی كۆمەڵگەی كوردی لە ئەمڕۆدا بەهۆی ئەو سیستمی پاشەكەوت كردنی مووچەیەوە دروست بووە كە حكومەت نزیكەی دوو ساڵە پەیڕەوی دەكات، كە ئەمەش هیچ بنەمایەكی یاسایی و دەستوری نیە، ئەوەش بە تەواوی لە هەڵوێستی داواكاری گشتی دا دەركەوت كە وتی ئەم سیستمی پاشەكەوتە بڕیارێكی یاسایی نەبووەو دەبێت پێداچوونەوەی پێدا بكرێت، لەلایەكی تریشەوە ئەگەر سەرنج بدرێت، لەدوای ئەوەی كە لە 23ی حوزەیران لەنێو پەرلەماندا گرفت دروست بوو بەمەش پشێوی كەوتە ناو كوتلەكانی پەەرلەمان و دواجاریش پارتی رێگەی لە سەرۆكی پەرلەمان گرت كە بگەڕێتەوە هەولێر و بەمەش شەرعیترین دامەزراوەی هەرێم لەكار خرا كە سەرچاوەی یاسادانانە، ئەو یاسایەش لەدوای ئەم رووداوە دراوە، كەواتە بڕیارەكە سەرچاوەیەكی یاسایی نیە، پاش ئەم بڕیاری پاشەكەوتی مووچەیە كە بڕیارێكی كتوپڕ و بێ‌ پاساوە، هەموو چین و توێژەكان بەتایبەتی فەرمانبەران باری گوزەرانیان تێكچوو بەرەو هەژاریەكی خراپ هەنگاویان نا، بەم هۆیەشەوە گرفتەكە گوازرایەوە بۆ ناو هەموو یەكە كارگێرَِیەكانی حكومەت و حكومەتی تووشی جۆرێك لە ئیفلیجی كردووە و بەمەش ئیرادەی دڵسۆزی و ئینتیما و خۆشەویستی بۆ حكومەت و نیشتمان و نەتەوەی بەرەو لاوازی بردوە، بەڵام ئەوەی جێگەی داخە سەرەڕای زانیاری حكومەت بە تەواوی ئەو كێشانە، بێ‌ وەڵام ماوەتەوەو سوورە لەسەر هەنگاوەكانی و ئامادە نیە لەو بڕیارە پاشگەز بێتەوە، ئەمەش مەترسی ئەوەی لێ دەكرێت كە كوردستان بەرەو كۆتایی دیموكراسی هەنگاو بنێ‌ و جارێكی تر بە نیاز نەبێت بگەڕێتەوە بۆ سندوقەكانی دەنگدان.