لەبری هات و هاوار، كاڵاكانتان بخەنە بازاڕ!!

 

ئێستە بازاڕی خستنە ڕووی بیرو بۆچوون و ئایدۆلۆژیا جیاوازەكان تا ڕادەیەكی زۆر گەرم بووە و هەر كەس و لایەن و تەوژمێك سەرقاڵی سەودا و مامەڵە و خستنە بازاڕی كاڵا و شمەكی خۆیەتی، مەخابن هەندێ‌ جار گەرمی هات و هاواری بازاڕی نمایشكردنی بۆچوون و تێڕوانینەكان هێندە گەرم و پڕ لە قڕم و قاڵە، كە پێكدادان و گرژی و ئاڵۆزی دروست دەكات و دەبێتە دەمەقاڵە و شەڕ و یەكتر تاوانبار كردن و بێ‌ ڕێز كردن بەرامبەر یەكدی.
ئەوەی جێی داخە لەم وڵات و نیشتیمانەی ئێمەشدا -كە یەكتر قبوڵكردن و پێكەوەژیان و باوەڕبوون بە بنەماكانی حیوار و گفتوگۆ لە ئاستێكی زۆر لاوازدایە- زۆر جار لەكاتی خستنەڕووی كاڵا و بۆچوونە جیاوازەكاندا لە نێوان هەڵگرانیاندا دەمەقاڵە و پێكدادان و بێ‌ ڕێزی كردن و سوكایەتی كردن و ناوزڕاندنی یەكتر ڕوو دەدات و نەفەسی شەڕەنگێزی و یەكتر سڕینەوە و خۆبە فریشتە زانین و ئەوانیتر بە شەیتان زانین زاڵ دەبێت بەسەریاندا، كە نیشانەی (بێ‌ تفاقی) و (كەم تفاقی) و (كاڵ تفاقی) هەڵگرانی ئەو بۆچوون و ئایدیا جیاوازانەیە.
ئەوەی كە خەم و حەسرەتەكە زیاتر دەكات و برینەكە قوڵتر و بەسوێتر دەكات، ئەوەیە كە كەسانی پەیامدار و هەڵگرانی بیروباوەڕی ئیسلامی و تەنانەت بەشێك لە زانایانی ئایینی ئیسلام و ڕۆشنبیران و بانگخوازانیش دەكەونە ناو ئەم جەدەل و دەمەقاڵە و شەڕە بێ‌ مانایانەوە و ئەچنە ناو ئەو بازنە تەنگەبەرەیەوە، جا هەندێ‌ جار یان تفاقی ڕووبەڕووبوونەوەی زانستی و مەعریفی و ڕۆشنبیرییان كەمە و ناتوانن بە شێوازی لۆژیكی و بە ڕەچاوكردنی بنەماكانی حیوار و گفتوگۆ ڕووبەڕوو ببنەوە و بەرپەرچی نەیار و ڕكەبەرەكانیان بدەنەوە، یاخود بەهۆی تەنگە نەفەسی مەعریفی و ڕۆشنبیری و زانستی و نەبوونی توانای قبوڵكردنی بەرامبەر و ڕای جیاوازەوە ئەوانیش دەچنە ناو ئەو شەڕو دەمەقاڵەیەوە كە نەدەبوو بچن، ئەمەش نیشانەی شكست و بێ‌ تەوفیقی ئەو كەسانەیە و دەرفەتی بێ‌ ڕێزی كردن بەرامبەر بە خۆیان و پەیامەكەیان و ئایینی ئیسلام بۆ نەیار و ناحەزەكانیان دەڕەخسێنن.
ئەگەر كەسی پەیامدار و بانگخواز و ڕۆشنبیر و زانایانی ئیسلامی بڕوایان بە بۆچوون و بیروباوەڕەكەی خۆیان دامەزراو و تۆكمەیە و قەناعەتیان وایە كە لە باوەڕو ئایدۆلۆژیای بەرامبەرەكەیان باشترە، ئەوا پێویستە باوەڕی تەواویشیان بە قبوڵكردنی ئەوانیتر و ڕای جیاواز و سەلیقەی جیاواز هەبێت و بنەمای (پێكەوەژیانی ڕا جیاوازەكان) پەیڕەوی بكەن نەك (پێكدادانی ڕا جیاوازەكان) و سڕینەوە و ڕێگە نەدان بە ئەوانیتر بۆ خستنە ڕووی كاڵاكانیان.
بۆیە پێویستە بە قەناعەتەوە ڕێگە بەوە بدەن و بهێڵن با ئەوانیتریش كاڵاكانیان بخەنە ڕوو، با ڕەنگ و دەنگی جیاواز هەمیشە حزووری هەبێت و دەرفەتی سەرپشك بوون لە هەبوونی باوەڕ و ئایدۆلۆژیای جیاواز لەوانیتر زەوت نەكرێت، با كاڵای یەكڕەنگی و یەكدەنگی درۆینە نەكرێت بە بەری هەموو تاكەكانی كۆمەڵگەدا، با حەقیقەتی كۆمەڵگە و تاكەكان وەك ئەوەی كە هەیە دەركەوێت نەك وەك ئەوەی كە ئێمە دەمانەوێ‌، با ئەوانیش تفاقی خۆیان عەرز بكەن، با پەردە لەسەر پشت پەردەكانی خۆیان لابدەن و ئەو دیوی پەنجەرەكانیان ببینن، با هەرچی كاڵایەك لە هەگبەكەیاندایە نومایشی بكەن، تەنانەت با سیحر و جادووەكانیان ئەنجام بدەن، هەرچی شەعوەزە و فێڵ و سیاسەت و پلان و پیلانیان هەیە با بیخەنە گەڕ، مەترسن و باوەڕ ئەستوور و دامەزراو و سنگ فراوان بن و بەرگەی هەموو جۆرە هێرش و هێز و چەك و كەرەستە و میكانیزمێكی نەیارەكانتان بگرن، با توانای بەرگەگرتن و بەرگری كردن و هێرش بردنتان لەوان زیاتر و باشتر و فراوانتر بێت، ئێوەش خۆتان ساز و ئامادە بكەن و با (هێزی لۆژیك) و حیوار و گفتوگۆ و بەڵگەكانتان لەوان بەهێزتر بێت، بەم شێوەیە ببنە جێبەجێكاری ئەم بانگەوازە ئیلاهییە كە دەفەرمووێت: [ۆأعِدُّواْ ڵهُمْ مَااسْتَگَعْتُمْ مِنْ قُوَّەٍ.] بەڵێ‌ بە هێز و میكانیزم و قووەی مەعریفی و زانستی و بەڵگەی بەهێز ڕووبەڕوویان ببنەوە، لەبری شكاندنی نرخی كاڵاكانی ئەوانیتر كاڵای جوان و بەنرخ و گرنگی خۆتان عەرز بكەن و نیشان بدەن.
زۆر پێویستە كە پەیامدار و بانگخواز و زانایانی ئیسلامی و ڕۆشنبیرانی باكگراوند ئیسلامیش بە شێوازێكی جوان و شایستە كاڵای خۆیان عەرز بكەن و سەرقاڵی سەودا و كاری خۆیان بن و نەچنە گۆڕەپانی ئەوانیترەوە و خەسڵەت و سیما و بەهاكانی خۆیان لەبیر نەكەن، بوێر بن و وەك حەزرەتی موسا -سەلامی خوای لێبێت- بە بەرامبەرەكانیان بڵێن: [ألْقُواْ مَا أنْتُمْ مُلْقُون.] چیتان لەدەست دێت بیكەن و هەرچی هێزتان هەیە بیخەنە كار، ئێمە ترس و باكمان نییە و متمانەمان بە خوای خۆمان و بیروباوەڕەكەمان و هێزی ئیرادەی پۆڵایینی خۆمان هەیە.
با هەمیشە پەیامدار و بانگخواز و زانایان و ڕۆشنبیرانی باكگراوند ئیسلامی متمانەیان بە كاڵا و تفاقی خۆیان و پەیام و خاوەن پەیامەكەیان هەبێت و دڵنیابن كە -ئەگەر ئەوان ڕاستگۆیانە و موخلیسانە كار بكەن- خوای گەورە پشتیوانیانە و پشتگوێیان ناخات، دڵنیابن كە (یەدی بەیزا) و (عەسای حیكمەت و دەعوەت و حیواری هێمنانە)یان هەرچی سیحر و جادووی نەیارانیان هەیە پوچەڵی دەكاتەوە، تەنانەت وادەكات بەشێكی زۆر لە شوێنكەوتە و جێبەجێكاری پلانەكانیشیان ڕۆژێك لێیان پەشیمان دەبنەوە و متمانە بە باشی و جوانی و ڕاستی كاڵاكەی ئەمان دەكەن و دەبنە پشتیوانیان.
لێرەوە ئیدی هەستكردن بە بەرپرسیارێتی و مەسئولییەتە گەورەكە دەست پێدەكات، دەبێ‌ ئەوەمان لا ڕوون بێت كە بەرپرسیارێتی گەورەی ئەم قۆناغەی هەموو بانگخوازان و زانایانی ئیسلامی و ڕۆشنبیرانی باكگراوند ئیسلامی بەگشتی و تەوژم و ڕەوت ئیسلامییەكان بەتایبەتی زۆر گەورەتر و فراوانترە لە ڕێژەی دەنگ و ژمارەی كورسی و پشكی وەزارەت و كێبەركێی كێكی شەراكەتی حكومەت و دەسەڵات، هەروەك زۆریش هەستیارترە لەوەی كە بوەستن بەدیار خوڵك و ناز و فەرمووی ئەم و ئەوەوە، پێویستە زۆر جددیتر و دڵسۆزانەتر لە جاران قۆڵی جوامێری لێ‌ هەڵماڵن و شان بخەنە ژێر باری ئەو مەسولییەتە گەوەرەیەوە كە ڕووی تێكردوون، ئەویش بریتییە لە ئەركی پاراستن و هێشتنەوە و گەشەدان بە ئاست و ڕێژەی دینداری و خواناسی سەرجەم چین و توێژە جیاوازەكانی كۆمەڵگە و پابەندبوونیان بە بەها باڵا ئەخلاقی و كۆمەڵایەتییەكان و كلتوورە جوان و ڕەسەنە نەتەوەیی و نیشتیمانییەكانەوە، ئەڵبەتە لەگەڵ ئەوەشدا پێویستە ئەوەیان لەبەرچاو بێت كە بیركردنەوە لە دۆزینەوەی چارەسەری قەیرانی بێ‌ دەرامەتی و كەم دەرامەتی هاوڵاتیان و شكاوی كەرامەتیان بەهۆی هەژاری و نەبوونی و تەنگپێهەڵچنینی سەختییەكانی ژیان و گوزەرانەوە، دەبێ‌ بەشێكی گرنگ و سەرەكی بێت لە خەم و هەمیان و بەردەوام لە هەوڵی دۆزینەوەی دەریچەیەكدا بن بۆ دەربازبوون لەو قەیران و كێشەیەی هاوڵاتیان و ئومێدێكیان پێ‌ ببەخشن و ببنە فریادڕەسێكی ئەم قۆناغە هەستیارە بۆیان.