دزو گەندەڵكارەكانیش سنورێكیان هەیە

لەم ساڵانەی دوایدا چاوپێكەوتنێكی رۆژنامەنووسیم خوێندەوە كە لە زینداندا لەگەڵا دزێك كرابوو، رۆژنامەنووسەكە پرسیار لە دزەكە دەكات و دەڵێت ئایا رۆژێك لە رۆژان چاوەڕوانی ئەم چارەنووسەت دەكرد كە بگیرێیت و بچیتە بەردەم دادگا؟ دزەكەش زۆر راستگۆیانە وەڵام دەداتەوەو دەڵێت، سوێند بەخوا هەموو رۆژێك چاوەڕوانی ئەو چارەنووسەبووم ،چونكە چۆن خوا قبوڵی دەكات، خەڵك بەو هیلاكی و زەحمەتە پارە پەیدا بكات و منیش شەو بچم لێی بدزم، پاش هەواڵی بڵاوبوونەوەی دەستبەسەردا گرتنی پارەو سامانی 21 بەرپرسی باڵای عێراقی و كوردستانی لەلایەن بەرپرسانی ئەمریكی و جەختكردنەوەی سەرۆكی ئەمریكا لەسەر ئەوەی كە ئەو پارەیە موڵكی ئەمریكیەكانە نەك ئەو بەرپرسە گەندەڵانە و بڵاوبوونەوەی هەواڵەكەش لە سایتی خەزێنەی ئەمریكی راستی هەوڵەكە دەسەلێنێت، لێرەوە دەكرێت ئەو پرسیارە بكەین ئایا دزی و گەندەڵی رێگەیەكی ئارام و بێ‌ سنورە و كۆتایی نیە، ئایا ئەو سنورە كێ‌ دیاری دەكات و تاكوێیە؟
پێموایە وەك دزەكە لە چاوپێكەوتنە رۆنامەنوسیەكەدا وتی سایكۆلۆژیای مرۆڤی دز سایكۆلۆژیایەكی وێران و راراو وێرانە، چونكە بەردەوام كە سەیری ناشەرعی بوونی كارەكەی دەكات هەست بە ئەو مەترسیە دەكات، ئەگەر رۆژێك ئەم دۆسیانەی هەڵبدرێتەوەو بچێتە بەردەم دادگا چۆن وەڵامیان بداتەوەو لەبەردەم رای گشتیدا تووشی چ شەرمەزاریەك دەبێت،پێم وایە بەشێكی گرنگی شكستی پڕۆژەكانی چاكسازی لە عێراقو كوردوستان دەگەڕێتەوە بۆ ئەو خاڵە جەو هەریە ، چونكە بیركردنەوەی ئەوان بەو جۆرەریە ،ئەگەر لە عێراق و كوردوستاندا یاسا سەروەر بێت ئایا چارەنوسی ئەو هەموو بەر پرسە چیان بە سەر دێت ،لە بەر ئەوە هەتا حوكم بە دەست ئەم بەر پرسانەوە بێت ،هیچ پڕۆژەیەكی چاكسازی سەر ناگرێت و دەوڵەتی یاساش نابینی . لەلایەكی تریشەوە ئەگەر وەك یاسایەكی گەردوونی سەیری بكەین مرۆڤ و گەردوون هەموو بەدیهێنراوی خوایە، تەنها مرۆڤ ئازادە لە هەڵس و كەوت و مامەڵە و شێوازی حوكم كردندا، بەڵام لەرێگەی پەیامە ئاسمانیەكانیشەوە رَنمایی كردووە بۆ عەدالەت و شەفافیەت و ئەخلاقی بەرز، بەڵام كاتێك مرۆڤ لەم رێنماییانە لادەدات و رودەكاتە دزی و گەندەڵی و ستەمكاری، خوای گەورە هەتا سنورێك رێگەی پێدەدات و لە خاڵێكدا دەیوەستێنێت، چونكە خوای گەورە لە فەرموودەیەكی قودسیدا دەفەرموێت من ستەمم لە خۆم حەرام درووە ئێوەش ستەمكار مەبن، هەروەها پێغەمبەری خوا لە فەرموودەیەكدا دەفەرموێت خۆتان لە نزای ستەملێكراو بپارێزن، چونكە لای خوا وەرگیراوە، لەبەرئەوەش كە دزی لە سامانی گشتی یەكێكە لە تاوانە گەورەكان ،كەواتە خوای گەورە زۆر توڕە دەكات و بەدەم نزای ستەملێكراوانەوە دەچێت و بەڵێنی خۆشیەتی كە لە دنیا و دوارۆژدا ریسوایان دەكات.