كێ ئەو دۆخەی كوردان، چارەسەر دەكات

  هەینی, 17 شوبات 2017 06:06

لێ خوڕەولێ دەو بڕۆ لاباری خۆت بگرە لە مشت
كوردی چی و نیشتمانی چی بۆ كورد بۆ چی خوت ئەدەی بە كوشت

وا بزانم ئەم هۆنراوە هۆنراوەی مەڕحومی مامۆستا قانعە ، لێرەدا چەند پرسیارێ ئەكەین بۆ ناو ماڵی كوردی و هەموو ئاگردانێكی كوردەواری ، باشە ئەم دۆخەی تێدا ئەژین دۆخێكی دروست و تەواوە ؟ عەیاری (24) یان پێویستی بە چاك كردن هەیە ؟ باشە نابێ كەسێ لایەنێ هەستێ بە جوڵاندنی دۆخەكە؟ ئەوەی كە هەڵئەستێ بە م كارە نابێ چەكوشێ لەم لاو چەكوشێ لەولا بدات ؟ نابێ هەندێ هەق بدات بەلایەك و هەندێ بە لایەكی تر ؟ خۆ لایەك شەیتانی رەجیم نیە و ئەوی تر رەحمانی رەحیم ؟


من ئەزانم ئەوەی پاڵ بە یەكگرتوو ئەنێ سەر بكات بەم ماڵ و بەو ماڵدا هەستی بەر پرسیاریەتیە نەك شتی تر ، هەرچەندە خەریكی كارێكە زۆر لە خۆی و حەجمی سیاسی خۆی گەورەترە ، بەڵام لە مێژودا هەر وابوە زۆر جار كاری گەورە مرۆڤە بچوكەكان پێی هەستاون و سەركەوتوو بوون ، چونكە دانا بوون.

من بیرمە لە كاتی شەڕی نەگریسی ناوخۆدا زۆر فشارمان لە سەر بوو تا لەگەڵ لایەك دەست بگرین و پشت بكەینە لاكەی تر ، پێمان ووتن ئێمە ئەزانین رۆژێ دێ لە ژێر لێزمەی بارانی ماچی ئێوە دا ئێمەتان بیر ئەچێتەوە ، بەڵام هەر پێی قایلین ، لە ڕاستیا هەر واش بوو ، بەڵام ئێمە پەشیمان نین لەم سیاسەتە ، سیاسەت لە لای ئێمە مەرج نیە تەنها بەرهەمەكەی لە دونیا بێت بە پێچەوانەی هەموو بیردۆز و فیكری سیاسیەوە ، ئێمە زۆر شت پاڵنەری تر پاڵمان پێوە ئەنێ ، هەر چەند ئەم خاڵە ئەزانم لای زۆر كەس مەقبول نیە یان قەناعەتی وانیە ، ( بەڵام ئێمە جیاوازین ).

ئێمە برایەتی ناو خۆمان و ناو ڕیزەكانی كۆمەڵگا ناگۆڕینەوە بە كلكە وەزارەتێ یان پۆستێكی ناشیرین كراو ( هەر ئەمەشە وای كردوە لە رابردوو ئێستاشدا بریاری سیاسیمان بە ئاسان لە دایك نابێت چونكە ئەزانین لە كوێدا ئەژین ) ، ئێمە خەریكی ئاشتەوایین ، مێژووی گەلی كوردمان باش خۆیندۆتەوە ، ئەزانین هەمیشە ئەمە دەردی كورد بوە ( كورد هەر وایە ، لە سەركردە بەختی ڕەشە بۆیە باری ڕاسە نایە ، كۆڵەكەی ماڵ كرمی تیایە ) لەگەڵ ئەوەشدا ئێمە مرۆڤین بەقەدەر مرۆڤ بونەكەمان عەقڵمان كار دەكات ، بەڵام ئەو عەقڵە زنجیر نەكراوە بە بەرژەوەندی تاكە كەسی و حیزبیەوە ، مرۆڤ ئەو كاتە ئاسودەیە كە بتوانێ ئەركی خۆی بەرامبەر میللەتەكەی جێ بەجێ بكات.

ئەوەی وا بیر ئەكاتەوە كە شەڕی ناوخۆ كۆتایی هاتوە زۆر بە هەڵەدا چوە ، چونكە بەرژەوەندیەكان لای بەرژەوەندخوازان زۆر خۆشەویسترە لە خوێنی ڕەش و ڕوتی ئەم میللەتە ، بینیمان لە شەری ناوخۆ هەبوو بە بلۆك مێشكی پژا كاتێ گیرا و هەش بوو موعەزەزز موكەررەم تەسلیم بە لای خۆی كرایەوە ؟؟؟؟؟؟مرۆڤ هەر مرۆڤە ئەم جیاكاریە ئەگەر بەرژەوەندی نەبێ چی ترە ؟ تكا ئەكەم لە هەموو ئاگردانێكی كوردەواری ئاوا بڕواننە هەڵوێستەكانی یەكگرتوو ، بەڵێ ئەكرێ لە تێ روانینی ئێمەدا ئەكرێ هەندێكی برژێتە ژمارە حیسابی كەسێكەوە بەڵام ئەوە پەیوەستە بە سونەتی ژیان كە مرۆڤ نە شەیتانی تەواوە نە رەحمانیشە بەو شێوە .
بۆیە ستراتیجی ئێمە وەك یەكگرتوو بە تایبەتی ئەمینداری گشتی بریتیە لە رێكخستەوەی نێو ماڵی كورد ، جا كە ڕێكەوتن حەز ئەكەن ئەم جارە ش لە ژێر لێزمە بارانی ئێوەدا ئێمە بەش بڕاو بكەن ئینگلیز واتەنی no problem