مانگی ئازار و ڵاتی ئازار!

  پێنج شەممە, 02 ئازار 2017 13:15


قەدەر هەر یەك لە گەل و نەتەوەكانی لە شوێن و مەملەكەتێكدا داناوە،مەملەكەتەكەی ئێمەش كە باشوری كوردستانە و بەشێكە لە عێراقی بەدناو، كە بە وڵاتی فیتنە ناسراوە.
دیارە مێژووی دوور و نزیكی ئەم وڵاتە لێوان لێوە لە رووداوی تاڵ و ترشی بێ سنور و بێ ژمار.


مەملەكەتەكەی ئێمەش كە زۆر بەداخەوە بەشێكە لەم رابردوە و ئێستاش هەر بەشێكە لە ئازار و مەینەتی رۆژانەی ئەم وڵاتە بەد ناوە، ئاشكرایە بابەتەكەمان بە بۆنەی مانگی ئازارەوە تایبەتە بە ئازارەكانی هەرێمی و كوردستان و خۆمان لە قەرەی مێژووی پڕلە زوڵم و زۆری عێراق نادەین.


ئەم هەرێمە كە ئێستا 26 ساڵە لەلایەن دەسەڵاتدارانی كوردەوە حوكوم دەكرێ،لە ماوەی زیاتر لە دوو دەیە و نیودا چی بۆ خەڵك كراوە و هاوڵاتیان چیان بینوە؟!وەڵامی ئەو پرسیارە عارەقی شەرمەزاری بەو كەسانە دەكات، كە شەرم دەكەن و مانای شەرم دەزانن.ئاخر لەم بیست و پێنچ ساڵەدا خەڵك چی بینیوە؟ راستی خەڵك ئەمانەی بینیوە.


شەڕی ناوخۆ و كورد كوژی و یەكتر قڕكردن!،لەتكردنەوەی لەتە كوردستانی باشور!،وێران بوونی سەرخان و ژێرخانی ئابووری!،چۆڵ بوون و وێران بوونی لادێكان!،فەرامۆش كردنی كەرتی كشتوكاڵ و ئاژەڵداری!،راكێشانی گەنجان بۆ ریزەكانی حیزب و بڕینەوەی موچەی بندیوار و، بەكار هێنانیان لە دەزگا حیزبیەكان لەسەر حسابی حكومەت!،بە حیزبی كردنی پەروەردە و پرۆسەی خوێندن!،دانانی بەڕێوەبەری قوتابخانە و فەرمانگە حكومیەكان لەسەر بنەمای تەزكیەی حیزبی و بێ بەشكردنی كەسانی شایستەی دوورە حیزب و سەربەخۆ!،هاتنە كایەی بازرگانی سیاسی و سیاسی بازرگان!،قۆرخكردنی بازڕا و دەستگرتن بەسەر جوڵەی بارزگانی!،نەبوونی خزمەتگوزاریە سەرەتایەكان!،نۆژەننەكردنەوە و چاكنەكردنی رێگاوبانەكان و، رۆژانە دووبارە بونەوەی رووداوەكانی هاتوچۆ و بوونە قوربانی هاوڵاتیان!،نەبوونی كارەبا لە گەرمای هاوین و سەرمای زستان،جار جار بەزمی بەنزین و ریزبوونی دەبە بەنزینی ئێرانی لە سەر شەقام و شۆستەكان!،قەیرانی ئاوی پاك لە زۆریك لە شارو شارۆچكەكان، بەتایبەتی لە وەرزی هاین و گەرمادا،پڕبوونی وڵات لە ئۆتۆمبێلی ژمارە رەشی بێ‌ ناونیشان!،هێنانی ئەنواع و ئەشكاڵ خۆراك ودەرمانی عەجیب و غەریب لە خاڵە سنوریەكان!،تەلبەندكردنی دەشت و كێو و گردو شاخەكان!،داگیركردنی هەزاران دۆنم زەوی شارەوانی و هاوڵاتیان لەلایەن دەسەڵاتدار و بەرپرسان!،وەرگرتنی بەرهەمی گەنمی جوتیاران لە هاویندا دواخستنی پارەكەی بۆ دوای دوو زستان،سەقەتكردنی سەدان پڕۆژە و ویڵكردنی و بە فیڕۆدانی سەدان ملیۆن دۆلار!هاوردە كردنی سڵق و تور لە ئێران و، نیسك و نۆك لە توركیا!،لە هەمووی سەیر ئەوەیە وڵاتێك لەسەر دەریای نەوتە، بەڵام لە زستادا نەوت بە قەترەیە! كە بوو بە شەڕە بەنزین ئیتر هەر پاڵ نان و شەڕە قسەیە،سستمی حوكمڕانی دیكتاتۆری و دیموكراسی و پەڕلەمانی و سەرۆكایەتی و دەستەجەمعی و تاكە كەسیە!!!مولیدە بە ئەمپێرە ،ئاو بەدەبەیە،بەنزین بە دڵۆپە، مووچە بە فەترەیە.


باشە مەملەكەتێك ئەمە حاڵی بێ لە دەقی چ فلمێكی هندی جیگای دەبێتەوە؟! لەسەر تەختی چ شانۆیەك گوزارشتی لێدەكرێ‌؟چ شاعێریك دەتوانێ‌ بیكات بە شیعر؟ئاخر ئەمە چ ناوێكی لێدەنرێ جگە لە مەملەكەتی ئێش و ئازار؟بۆیە حەقە لەم وڵاتە بە هەر 12 مانگەكە بوترێ‌ مانگی ئازار .

 

سۆران هەستیار

سۆران عبدالله، لە دایك بووی 1973.ئەندامی كارای  سەندیكای رۆژنامەنوسانی كوردستان.ئەندامی یەكێتی رۆژنامەنوسانی نێودەڵەتی.بەشداربووی چەندین خولی جۆراو جۆری بواری رۆژنامەوانی،وەرگێر و شاعیر و پەخشان نووس.شرۆڤەكاری سیاسی،موحەریری هەواڵ لە كەناڵی سپێدە لە ساڵانی پێشوو، نوسەری  بەردەوامی رۆژنامەی یەكگرتوو پێش وەستانی رۆژنامەكە.