بنیات و به‌رهه‌مێن روحانیه‌تا ئیسلامی(6)

 

به‌ندایه‌تی ئازادی یه‌.....(خ6)

بتنێ تێگه‌هێ به‌ندایه‌تیێ د ئیسلامه‌تیێ دا رامانا خو یا تمام دده‌ت
ئانكو چه‌ند تو د پله‌یێن به‌ندایه‌تیێ دا پێشبكه‌ڤی و چه‌ند به‌ندایه‌تی ببیته‌ ره‌وشا كه‌سایه‌تیا ته‌ دێ پتر هه‌ست ب ئازادیێ كه‌ی
چونكی به‌ندایه‌تی د ئیسلامه‌تیێ دا بتنێ ژبو خودێ یه‌ و چ په‌یداكری یێن دی كارتێكرنێ ل مروڤی ناكه‌ن و مروڤ ژی رازی نابیت به‌ندایه‌تیێ بو چ تشتا بكه‌ت
یێ به‌ندایه‌تیێ بو خودێ بكه‌ت دێ ژ هه‌می كه‌سا پتر هه‌ست ب ئازادیێ كه‌ت چونكی كه‌س نه‌شێت دلێ وی و روحا وی و هه‌ست و هزرێن وی داگیر بكه‌ت
به‌لێ یێ به‌ندایه‌تیێ بو خودێ نه‌كه‌ت یان دبیت كه‌سه‌كێ بسلمان ژی بیت به‌لێ د باوه‌ری یا خودا یێ لاوازه‌ دێ بینی د ژیانا خودا به‌ندایه‌تیێ بو چه‌ندین تشتا دكه‌ت
بو نموونه‌ :-
1- به‌ری هه‌ر كه‌سه‌كی گه‌له‌ك جارا به‌ندایه‌تیێ بو ده‌رونا خو دكه‌ت و دبیته‌ دویڤه‌لانكێ ده‌رونا خو و په‌یداكه‌رێ خو ژبیر دكه‌ت.
2- به‌ندایه‌تیێ بو گر و شه‌هوه‌تێت خو دكه‌ت ، كا شه‌هوه‌تێت وی چ دبێژنێ هه‌ر وێ ب جھ دئینیت و چ گرنگیێ ناده‌ته‌ توخیبێن خودێ.
3- به‌ندایه‌تیێ بو دنیایێ دكه‌ت و هه‌ر بیاڤه‌كی ژ دنیایێ دبیته‌ خوداوه‌ندێ وی.
4- گه‌له‌ك جارا و ب ملیونه‌ها كه‌س یێن هه‌ین به‌ندایه‌تیێ بو مالی دكه‌ن و مال زالگه‌هیێ لسه‌ر هه‌می ژیانا وان دكه‌ت و خو ل چ توخیبێن حه‌لال ناگریت و هه‌می گاڤا لناڤ پرێزێن حه‌رام دا د چه‌رن.
5- گه‌له‌ك جارا به‌ندایه‌تیێ بو پوسته‌كی دكه‌ن ، ڤێجا ئه‌ڤ پوسته‌ چ بیتن و د كیش مه‌یدانا ژیانێ دا بیت ، پوست دبیته‌ رابه‌رێ وی بو هه‌می لڤینێن ژیانێ.
6- به‌ندایه‌تیێ بو هزره‌كێ دكه‌ن یان بو لایه‌نه‌كی دكه‌ن یان بو گروپه‌كێ سیاسی دكه‌ن و ژبیر دكه‌ن كو خودێ رێبازه‌كا بو ژیانێ هنارتی.
7- لێ هزار جاران جهێ داخێ یه‌ گه‌له‌ك جارا به‌ندایه‌تی بو كه‌سه‌كی دئێته‌ كرن كه‌سه‌كێ وه‌ك وان مروڤ كا چه‌وا بو فیرعه‌ونی ژی دهاته‌ كرن.

* ئه‌ڤ ره‌نگێن مه‌ گوتین یێن به‌ندایه‌تیێ كو د روژا مه‌یا ئه‌ڤرو دا و د جیهانا مه‌ یا هه‌ڤچه‌رخ دا ب ملیونه‌ها كه‌س ل ئاسته‌كێ جیهانی د كه‌ڤنه‌ د ڤێ تاوانێ دا و ب هه‌می زانینا خو یا ژوانڤه‌ د ئازادن ، به‌لێ گومان تێدا نینه‌ هه‌می به‌ندن و به‌ندایه‌تیا وان تشتا دكه‌ن یێن مه‌ ده‌ست نیشان كرین

بتنێ ئه‌و كه‌س یێ ئازاده‌ و ب دروستی دێ هه‌ست ب تاما ئازادیێ كه‌ت یێ ڤان تشتا هه‌می یا بو خو بكار دئینیتن دا به‌نداتی یا خودێ پێ بكه‌ت ، ئه‌و بخوژی هه‌می شیانێن خو دده‌ته‌ كاری دا ببیته‌ به‌نده‌كێ خودێ یێ راسته‌قینه‌ ، ئه‌ها ل وی ده‌می بو هه‌ر كه‌سه‌كێ ب ڤی ره‌نگی په‌یوه‌ندی هه‌بن دگه‌ل خودا و په‌یداكه‌رێ خو دشێت بێژیت ئه‌ز یێ ئازادم ، به‌لێ به‌روڤاژی گومان تێدا نینه‌ چ راستی بو ئازادیێ نینه‌

ئه‌ڤ تێگه‌هه‌ هه‌می كاكلكا روحانیه‌تێ و باوه‌ریه‌كا ب هێز و نێزیك بوونا خودێ نیشا مه‌ دده‌ت ، یێ بڤێت ب دروستی ڤی تێگه‌هی بكه‌ته‌ ژیان دێ بلند ترین پله‌یێن روحانیه‌تێ بده‌ست خوڤه‌ ئینیت ان شاء الله .