قەڵەمەكانی شەڕ !

  چوار شەممە, 15 ئازار 2017 08:04

لە 26 سالی حوكمرانی كورددا هەمیشە لەبەرامبەر قەلەمەكانی ئاشتی و ئاوەدانی قەلەمی شەر و گەرمكردنی كێشەكان و ئالۆزكردنی دۆخەكە بوونی هەبوە ، قەلەم و بیری ئاشتی و ئاوەدانی پەیوەست نیە بە حیزبە حوكمرانەكانەوە بگرە بە پێچەوانەوە هەمیشە ئەوەی گوزارشتی لە دەسەلات كردوە قەلەكانی شەر بوون بۆیە دۆخی هەرێم لەم ئاستەدایە !! ئێوە ببینن تا ئێستەش هەندی نوسین هەمان زمانی شەری ناوخۆ و هەندی قەلەم هەمان قەلەمە ژەنگاویەكانی سەردەمی كەپكی حەمەد ئاغا و دێگەلەیە و ئەگەر بەراور لابەریت لەسەر هەندی نوسین لابەریت دروست ئەڵێی سالانی نەوەدەكان نوسراوە ، لەم هەرێمە رق و كینە و بە شەیتان كردن بوە بەبەشێك لەپەروەردە ! ئەگەر كەسێك بە زمانێكی هێور قسە بكات و بنوسی و رێنمای هەبێت بۆ ئاشتی و بۆ هێوری كۆمەلگا دەیان نا و ناتۆرەی لی دەنرێت ! ئەم 26 سالە پەروەردەی ناتەواوی دوو جەمسەرە حیزبیەكە وای لەكۆمەلگا كردوە لە شەوچەرەی شەوانی لادێیەكدا شەر دروست بێت لەسەر هەلویستی لایەنیك دژ بەلایەنیكی تر ! بەشێك لەو پەروەردە لە ئەستۆی قەلەم هەلگران و راگەیاندنكاراندایە و ئەوەی كە سەردەستەی دەكات و وێنەی دۆخەكە دەكێشێ وتەپلی ناكۆكی لێدەدات هەر هەمان ئەو قەلەمانەی شەرن كە پێشتر نان و ژیانیان لەسەر ئەو ئاراستەیە بوو لەلایەن حیزبیەكانەوە هان دەدران و دالدەدەران بەبی ئەوەی هەست بەوە بكەن ئەوە بەهۆی ئەوانەوەیە ولات وێران دەكرێت بەپێچەوانەوە هەمیشە كەرەستەیەكی خراپی ئەو دۆخە ناهەموارە بوون ، ئەو دوو ئاراستەی لە بزوتنەوەی كورددا لە مێژوودا بونی هەبوە ئیستەش لە قالبێكی تردا ئامادەیی هەیە و تا دێت گەشەی پێدەدریت كە دەبوو وانەیەك لەو مێژوە وەربگیرایە كە هۆكاری سەرەكی هەموو نوشستەكانی كورد ئەو دوو بەرەكیە بوە كە زۆربەی كات قەلەمەكانی شەر ئاگرەكەیان خۆش كردوە .

پاش هاتنی داعش و پاش داعشیش دۆخێكی نوێ بۆ كورد دروست بوو بەداخەوە لەبری قۆستنەوەی وەك هەل ئەویش وەك زۆر باسی تر بوو بە هۆكار بۆ دوو راییی و جیاوازی ، لەلایەكی ترەوە نەبونی سیستم و دەستور و پەیرەو نەكردنی یاسایەكی جێگیر لە هەرێمدا هۆكاریكی ترە كە بۆ ئەویش دوو را و دوو بۆچونی جیاواز هەبێت ! پارتی بۆ بەشەرعی ناساندنی بارزانی بریاری ئەنجومەنی شورا دەكاتە بەلگە !! لەكاتێكدا یاسایەك هەیە بە روونی ئاماژەی بۆ بەسەرچونی ماوەی سەرۆكایەتیەكەی دەكات هەردوو بەرەكە هەر بە یاسا قسە دەكەن و كار لەسەر ئەوەش دەكەن كە رای خەلكی بەدەست بێنن !! ئەمە كێشە سەرەكیەكەیە جا لەبری ئەوەی هیچ نەبێت قەلەمە ژەنگ گرتوەكانی شەر بێدەنگ بن ئەم دۆخە جارێكی تر دەقۆزنەوە و بە ئاراستەی لێكترازانی كۆمەلگادا دەنوسن و هەریەك بە دیدیكی ئایدۆلۆژی كۆمەلگا پر دەكات لە رق لە كینە و لە تورەیی ! ئەم دۆخە هیچ جیاوازیەكی نیە بەراورد بە سالی نەوەدەكان قەلەمەكان و پشت قەلەمەكان لەبری سودبینین لە هەل و دۆخێك كە دروست بوە كار بۆ دوو بەرەكی زیاتر دەكەن ، باش تێدەگەم كە هەرێم چواردەورەكەی كێیە و كوێیە بەلام خۆ ئەوە ئەوان نین دەستیان گرتبین دۆخەكان چارەسەر بكەین و كەی دەتوانین بەسەر كۆسپەكاندا زال بین و لە مێژوودا نەژین ، ئەوەی كە مایەی كەسەرە ئەوەیە هەركەس بەئارەزووی ئەو دوو جەمسەرە نەنوسی تۆمەتی بۆ دروست دەكرێت لای جەمسەری ئەملا سەر بەولایە و لای ئەویترش رووی لەملایە !! ئەم دوو جەمسەرە قەلەمێكیان دەوێت كە تا دوا قەترەی مەرەكەبەكانیان داكۆكی لە بەرەكەی ئەو بكات ئەگەر هەقیش نەبێت ، قەلەمێك بەدلی ئەوان نەنوسێت قەلەم نیە !! بیرێك وەك ئەوان بیر نەكاتەوە بونی نیە ! ئەم دوو جەمسەرە كە مایەی هەموو نەهامەتیەكانن رازی نین وەك یەك سەیریان بكرێت ! رازی نین لەیەك ترازوودا دابنرین و هەریەكەیان كە قەلەمەكانیان هان دەدەن وا گۆشیان دەكەن كە هەركەس لەگەل ئێمە نەبێت دژمانە و ئەوان ناوەندیان ناویت ئەوەیان دەوێت كە قەلەمت نوسی لە بەرژەوەندی ئەوان بنوسێ ئەگینا نوسینەكەت هیچ نیە چونكه خزمەت بەوان ناكات .
تا ئەم قەلەمانە بونیان هەبێت دۆخێكی باشتر فەراهەم نایەت و تا لەمێژوودا بژین نابێت چاوەنواری ئاسۆیەكی گەش بین .

 

عەبدولكەریم ئەحمەد

له‌دایك بووی ساڵی 1972
به‌كالۆریۆس ئامار
سه‌رنوسه‌ری رۆژنامه‌ی یه‌كگرتوو بۆ ماوه‌ی 7 ساڵ
ئه‌ندامی دامه‌زراوه‌ی راگه‌یاندن و هونه‌ر
به‌رێوه‌به‌ری گشتی كه‌ناڵی ئاسمانی سپێده‌