هەوڵێكـ بۆ وەڵامی چەند پرسیارێكی فیصل القاسم

  چوار شەممە, 15 ئازار 2017 11:31

 

 

.... گەورە نووسەرو ڕۆژنامەنووسی سوری و ڕاگەیاندكاری بەناوبانگی بەرنامەی ( الاتجاه المعاكس )ی كەناڵی جەزیرەی قەتەری دكتۆر فیصل القاسم لە ئەكاونتی تایبەتی خۆی لە تویتەر دەنووسێت : بۆچی هەموو ئەو دەنگانەی لە وڵاتانی بەهاری عەرەبیدا دروشمی دیموكراسیان بەرزكردبووە چوونە پاڵ ژەنراڵەكانی سوپا هەر لەبەر ئەوەی ڕقیان لە ئیسلامیەكانە !؟ بۆچی تەوژمی سێیەمیان پێكـ نەهێنا !؟ ئایا جگە لە سوپا و ئیسلامیەكان كەسی تر بوونی نیە‌ لەو وڵاتانەدا لەسەر كورسی دەسەڵات ململانێ بكەن !؟ بۆچی هێزێكی نیشتمانی و مەدەنی دیموكراسی گەشەی نەكرد پێكەوە سوپا و ڕیشدارەكان ڕەددبكاتەوە !؟ كوا تەوژمی نیشتمانی مەدەنی لەو پێكدادانەی ئێستای نێوان ژەنراڵەكان و ئیسلامیەكان لە وڵاتانی بەرپابووی شۆڕشەكان !؟ بۆچی ململانێكان تەنها لە نێوان سوپا و ئیسلامیەكاندا قەتیس بووە ؟ ... بەندەش ئەخوازێ بەكورتی ئاماژە بەبەشێكـ لە وەڵامەكانی بدەم ....
:
1- حەقیقەتی گەڕانەوە و گەشەكردن و پێگەیشتنی هێزو باڵادەستی ڕابوونی ئیسلامیەكانە‌ و هەنگاونانی موسڵمانانە بۆ پیادەكردن و بەعەمەلیكردنی ئاینی پیرۆزی ئیسلام وەكـ ئەوەی لە مێژوودا هاتووەو كاری پێكراوە ، ئیسلام وەكـ ئاین و دەسەڵات و بانگەواز و ئاشتیخوازی و دژی ستەم و زۆرداران و گێڕانەوەی مافی چەوساوەو بەرگریكردن لە خۆ ! هەر بۆیە هەموولایەكـ بەدەست لەملانی یەكدی و لەبیركردن و تێپەڕاندنی تەواوی جێاوازیەكان و كۆبوونەوە لە پشت دەسەڵاتی ڕەشی پۆستاڵدا ، كۆكـ و یەكدەنگن لەڕەددكردنەوەو دژایەتیكردنی ئیسلامیەكان !
:
2- زۆرینەی دەسەڵاتدارانی ناوچەكە بەبەڵێ و ڕازیكردنی زلهێزانی جیهانی هاتونەتە سەر حوكم و دەسەڵاتیان گرتۆتە دەست لەوێشەوە بۆ ڕازیكردنی ئەوان و مانەوە لەسەر كورسی دەسەڵات ئامادەی هەموو ئیملائاتی دەرەوە ئەبن ، ئەگەرچی لەسەر حیسابی برسیكردن و كوشتن و قڕكردنی میللەتیش بێ وەكـ لە میسر و سوریا و لیبیا و یەمەن و لەوێشەوە لەسەر هەمان كێش و سەروا ئەوانیتر بخوێنەوە‌‌ !
:
3- فەشەلی ئەخلاق و بەها باڵاكانی مرۆڤ دۆستی و مافەكانی مرۆڤە ، ئەمەش لەمایەپووچی و دەست بەتاڵی و داماڵینی پرنسیپ و دروشم بازی دەستەبژێری سیاسی و حزبە بەناو عەلمانیەكانەوە سەری هەڵدا ، وەكـ دەبینین لەمپەڕی چەپەوە بۆ ئەو دیووی ڕاستی عەلمانی بەلایانەوە ئاساییە لەژێر لافیتەو ناونیشانی دروشمەكانی عەلمانیبون و بانگەشەی دەوڵەتی مەدەنی و ڕێزگرتن لە ڕاو ڕای بەرانبەر ئامادە و فەرماندارو سازشكاری بەردەم دەوڵەتیكی مەزهەبی بن !
:
4- بەشێكـ لەڕاوەستان و پاڵپشتیكردنی یەكتر لە پشتی هێزی سوپاو ژەنراڵەكاندا بە ئاماژەو فەرمانداری ئەجیندای دەرەوەیە ، بەناوی دژایەتی و مەترسی هاتنی ئیسلامیەكان و بەرگری لە هاوپەیمان و ئەڵقە لە گوێی دەسەڵاتدارانی ناوچەكە ، بەرژەوەندیەكانی خۆیان باشتر دەپارێزن و درێژە بەمانەوەی دەدەن ! خۆ پڕچەككردنی زیاتری دەسەڵاتداران و بیركردنەوە لەبژاردەی چەكـ بۆ هەندێ هێزی مەدەنی دەچێتە خانەی باوەڕبوون بە گوتەزای مانەوە بۆ بەهێزەكانە !
:
5- چارەسەری كێشەو گرفتەكانی ناوخۆی وڵاتانی ناوچەكە لەبەرژەوەندی ئەجیندای دەرەوەدا‌ نیە ، هەر بۆیە هەرجارەو بە بیانوویەكـ درێژە بە سەپاندنی شەڕو كاولكاری و سیاسەتی وێرانكردنی ناوچەكە پیادەكەن ، بۆ ئەمەش ئەكتەرو نمایشكاری ڕاهێنراو و مەشق پێكراو لە هەردوولا ئامادەو بەردەستە ! هەڵتۆقینی داعش و داتاشینی دەیان ڕێكخراوی توندڕەوی تیرۆریستی و بەردەوامی قەیرانەكانی دارایی و هەڕەشەكانی یەكتر بۆ سەر ئەویتر شایەتحاڵی واقیعە !
:
6- بەشێكی دی لە ڕیزكردنی هەمووان لەپشتی سوپاو ژەنراڵەكانی دوێنێی دژە شۆڕش ، لەژێر هەڕەشەو گوشاری كۆمپانیا گەورەو زەبەلاحەكانی خودی وڵاتانی زلهێزە ، بۆ بەردەوامی بەرهەمهێنان و دروستكردنی چەكـ و تەقەمەنیەكان بە‌ هەموو جۆرەكانیەوە و كەڵەكە نەبوونی لەعەمبارو سازغكردنەوەو بەبازاڕككردن و دوانەكەوتن لە كێبڕكێی بازاڕدا ، پەنا ئەبەن بۆ بیدعە و داهێنانی شەڕی وەهمی و ڕێكخراوی گوماناوی و تیرۆرو تۆقاندن و كودەتا و بەرپاكردنی شەڕ و ململانێی نێوان كەمینەی ئاینی و نەتەوەیی ، لێرەوە دەبێتە بەهانەیەكی ساختەو بۆ ئەوان و شەرعیەتی شەڕو بەرگری لە خۆكردن وەردەگرێت ! .

غەفور ئەحمەد

له‌ دایك بووی ساڵی 1972، مامۆستای زمانی ئینگلیزیە،  دانیشتوی شاری كەلارە.

له‌ بوارەكانی فیكر و سیاسه‌ت و ڕۆشنبیری گشتیدا دەنوسێت.