پرسی چاكسازییەكانی هەرێم ، سەرنج و پرسیار

  یەک شەممە, 02 نیسان 2017 19:05

هەندێك سەرلەبەری هەنگاوەكانی پرۆسەی چاكسازی لە هەرێم سفر دەكەن و بە ناڕاستەوخۆش بێ‌ زێتر بە ڕێكارگەلێكی شەكلی و چەند هاشوهوشێكی ئیعلامی دەبینن، هەندێكی دیش نەك هەر بە قۆناغێكی گرنگی دەبینن، بگرە ئومێدی گەورەی لەسەر بونیاد دەنێن و شەو و ڕۆژ بە باڵایدا هەڵدەدەن، بەكورتی بەگوێرەی بەدووداچوونی ئێمە پرۆسەكە كەمتر بابەتییانە خوێندنەوەی بۆ كراوە و بە زمانی فاكت و ژمارە و داتا لێی كۆڵراوەتەوە و خاڵە بەهێز و لاوازەكانی پیشان دراوە، لەم سۆنگەوە چەند پرسیار و سەرنجێك لەسەر كۆی پرۆسەكە دەخەینە ڕوو، بەو هیوایەی ببێتە سەرەتایەك بۆ لێكۆڵینەوەی مەیدانیی وردتر و ڕێخۆشكەرێكیش بۆ قسەكردنی زێتر بە زمانی داتا و ئامار سەبارەت بەو پرۆسەیە.

بەر لە هەر شت پێویستە بگوترێ‌ گەندەڵی بنەبڕ ناكرێ‌ و لەنێوناچێ‌، لەبەرئەوە ئەگەر بۆ تێگەی چاكسازی، ناوونیشانی لەنێوبردن یان بنەبڕكردنی گەندەڵی بەرز بكرێتەوە، پێناچێ‌ لە بنەڕەتدا مانشێتێكی ورد و تەواو بێ‌، بەڵكو ئەوەی هەیە ڕووبەڕووبوونەوەی گەندەڵییە. لە هەمان دەمدا چاكسازی دژ و دوژمنی هەموو تەرز و ڕەنگێكی گەندەڵییە لە هەر ئاستێكی گەندەڵیدا بێ‌، چ دزی بێ یا ڕەشوە وەرگرتن یا ساختەكاری یا خزمایەتی كردن و حزبایەتی كردن لەنێو دامودەزگا حكومییەكان یا ڕۆتینیاتی بێ تام و بیرۆكراسییەتی بێ‌ مانا و هتد...
لەبەرئەوە ڕێگەگرتن لە دیاردەی بەرتیلخۆری ئەو دەمە دروست و لەجێی خۆیدایە، كە لە بەرانبەردا ڕۆتینیات و بیرۆكراسییەت نەبێتە مۆتەكەیەكی ناقۆڵاتر، هەر بۆ نموونە هاووڵاتییەكی ئاسایی كە ڕێی دەكەوێتە دامەزراوەیەكی حكومی، هێندە دووچاری سین و جیم و سەین و بەینی لابەلا نەكرێ‌، بەجۆرێك خۆزگەی ئەوە بخوازێت لەباتی ئەوەی هەفتەیەك بۆ ڕاییكردنی مامەڵەكەی بێ‌ و بچێ‌، بە چەند سەعاتێك تەواوی بكات و لە بەرانبەریشدا بڕێك پارەی نایاسایی بدات بە كارمەندێكی دامەزراوە حكومییەكان.
وەك چۆن گەندەڵی لە كوردستان و هەموو دونیاش دەرد و پەتایەكی تایبەت نییە بە سێكتەر و بوارێكی تایبەت، هەرواش لە پرۆسەی چاكسازیشدا دەبێ‌ هەموو كەرت و كایە و جومگە و بوارەكان كاریان لەسەر بكرێت، بۆیە كورتكردنەوە و چوارچێوەبەندكردنی پرۆسەكە لە لادانی چەند بەڕێوەبەرێك و بەردادكردنی چەند كارمەندێك و فۆكس خستنە سەر كەرتێكی داهات و خەرجی... بەس نییە، بەڵكو لەپاڵ ئەوەشدا گەرەكە هەر بە فیعلی ئەو مەقوولە باوەی دەڵێ‌ كەسی شیاو لە شوێنی شیاو جێبەجێ‌ بكرێ‌، بەمەش واتە هەموو ئەوانەی بە سایەی خزمایەتی و حزبایەتی و خێڵگەری و ناوچەگەری... بوونەتە وەزیر و گزیر و شارەزا و ڕاوێژكار و بەڕێوەبەر نەك لەسەر بنچینەی خزمەت و بڕوانامە و لێهاتوویی، ئەو پۆستانەیان لێ‌ وەربگیرێتەوە و بە پێوەرە دروست و هاوچەرخەكانی دیكەی شایستەبوون كەسانی دیكە لە جێگەیان دابنرێن.
هەروەها كە دەگوترێ‌ نابێ‌ هیچ كەس پارێزبەندی (حصانە)ی هەبێ‌، چەندە گرنگە هەر بە فیعلی هیچ كەس پارێزبەندی نەبێ‌ و ئەو گومانە سائدەی هەبووە و هەیە بڕەوێنیتەوە، كە وا دەبینن ئەمە تۆڕێكە هەر ماسییە گچكەكان دەگرێ‌ و ماسییە گەورەكان بۆی دەردەچن، بەقەد ئەوەش زەرورە پرۆسەكە بۆ ساڵێك و دوو ساڵ و ماوەیەكی زەمەنیی دیاریكراو نەبێ‌، چون لێرە و لە هەموو دونیاش چاودێری دارایی و دەستەی نەزاهە و دامەزراوە تایبەتەكانی بەدووداچوون و لێپرسینەوە دامەزراوەی فەرمیی هەمیشەیین، نەك لیژنەیەكی كاتی كە ئەركێك یان چەند ئەركێكی پێ‌ دەسپێردرێ‌، دوای تەواو بوونی ئەو ئەركانە وەزیفەی ئەوانیش تەواو ببێ‌.
وێڕای هەموو ئەوانەش، چونكە گەندەڵی لە باشووری كوردستان (وەك چاودێران دەڵێن) مێژوویەكی هەیە و تا ئاستێكی بەرچاو ڕەگاژۆ بووە و هەندێ‌ كەڕەت و لە هەندێ‌ سێكتەردا بەشێوەیەكی زۆر سیستماتیك بەڕێوە دەچێ‌، بۆیە خەڵكی ئێمە ناهەق نییە متمانەی بەو پرۆسەیە لاواز بێت و بە سانایی باوەڕ بەوە نەكات، كە هەندێ‌ بەڵێنی وەك نەهێشتنی دوو موچەیی و بندیوار و خانەنشینی نایاسایی بچێتە سەر، كە ئەوانە بەشێكن لە وێنە گشتییەكەی گەندەڵی نەك هەمووی، لەبەرئەوە هەموو ئەو دەزگا و نێوەندانەی بەرپرس و پەیوەندیدارن لە پرۆسەی ناونراو بە چاكسازیی هەرێم، خەڵكی كوردستان چاوەڕوانی هەنگاوی گەورەتر و جددیتر و دەستوبردتریان لێ‌ دەكەن.


زیاد ڕەشاد قادر
ئەم ئیمەیڵە پارێزراوە لە سپام, پێویستە جاڤا سکریپت چالاک بکەیت بۆ بینینی.