وەحشیگەری ئەسەد و لوت شكانی روسەكان

  شەممە, 08 نیسان 2017 15:09

 

پاش 40 ساڵ لە زوڵم و ستەمی بنەماڵەی ئەسەدی عەلەوی لە سوریا، دواجار لە شوباتی ساڵی 2011 بڵێسەی شۆڕش كڵپەی كرد و، سوریەكان دەستیان كرد بە خۆپیشاندان و خەباتی مەدەنی، بەڵام لە یەكەم كاردانەوەی ئەسەدیە بەعسیەكان، بە دڕندانە ترین شێوە وەڵامی خەڵكی سڤیل و بێ دیفاعیان دایەوە.

لەگەڵ بەردەوام بوونی خۆپیشاندانەكان گرتن و كوشتنی بەناحەقی هاوڵاتیان زیاتر و زیاتر دەبوو،دواجار شۆڕشگێڕان بیریان لە دروستكردنی هێز كردەوە و هێزی سەربازیان پێكهێنا.
هەرچەند كەرستەی دەستیان سادەترین چەكی تەقلیدی بوو.بەڵام ناحەقی و زوڵم و زۆری بەعسیەكان وایكرد، كۆڵنەدەن و هێواش هێواش بەڕەكە لەژێر پێی ئەسەدی خوێنرێژ و دیكتاتۆر دەركەن، دواجار رووسەكان دوای ئەوەی زانیان خەریكە عەرشەكەی ئەسەدی شاگردیان لەق دەبێ و نزیك بۆتەوە لە روخان، خۆیان بۆ نەگیرا و، لە بەرەبەیانی 30/9/2015 بۆیەكەم جار بەدەیان فڕۆكەی نەوەكانی لینین، وەك پیشەی هەمیشەیان بەهێزترین هێرشیان بۆسەر خەڵكی بێ دیفاع ئەنجامداو، وێرانكارێكی زۆری لێكەوتەوە. ئیتر لەم رۆژەوە روسەكان هەر بەردەوام بوون تا ئەم چركەساتە بۆ تەنها ساتیكیش درێغی ناكەن لە خەڵك كوشتن.

دیارە روسەكان بە سێ‌ هۆكاری سەرەكی راستەوخۆ هاتنە ناوشەڕی سوریا.

1-تاقیكردنەوەی سەرجەم ئەو چەكانەی لە 50 ساڵی رابردوو دورستكرابوون و كاریگەریان لەمەیدانی شەڕدا دەرنەكەوت بوو، بێ‌ گومان هەموو ئەوانەیان تاقیكردەوە.
2-پارێزگاری كردنیان لە تاكە شوێنپێیان لە رۆژهەڵاتی ناوەڕاست، كە بریتین لە لازقیە و تەرتوس لە سوریا.

3-تاقیكردنەوەی درۆی بەناو كۆمەڵگەی نێودەوڵەتی و،چایخانەی نەتەوەیەكگرتوەكان و، ئەفسانەی ئەمریكا و، ویژدانی ئەوروپا و خۆرئاوا بەگشتی.

راستی تا بەناو هێرشەكەی بەرەبەیانی 8ی نیسان كە ئەمریكا ئەنجامیدا و، ئەویش خاڵی نەبوو لە بەرژەوەندی شەخصی و گشتی بۆ ئیدارەی ئێستای ئەمریكا. بەڵام تا ئێستا رووسەكان بەئارەزوی خۆیان چیان ویستووە، ئەوەیانكردوە و حسابیشیان بۆ كەس نەكردوە. تا ئێستا 7 جار لە ئەنجومەنی ئاسایش ڤیتۆیان بەكار هێناوە و، نەیان هێشتوە هیچ بڕیارێك لە دژی ئەسەدی بەعسی دەربچێ‌.

سەبارەت بە هێرشەكەی ئەمریكاش، هێشتا زووە تا بزانین راز و نیازی راستەقینەی ئەمریكا چی بووە لەم هێرشەدا، بەڵام ئەوەی روونە كە ئەگەر ئەمریكا و خۆرئاوا بەجددی مەبەستیان بوایە سوریا وێران نەبێ‌، داعش دروست نەبێ‌، عێراق نەبێتە بنكەی تیرۆر، بە سەدان هەزار ئاوارە روو لە ئەورپان نەكەن، بە سەدان ملیۆن دۆلار لە ئاوارەكان خەرج نەكەن. بۆ هەموو ئەوانە دەیان توانی لە ساڵی یەكەمی شۆڕش، پێش هاتنە ناوەوەی روسەكان، بەدەر لە هێرشی ئاسمانی و زەمینی بەڵكو تەنها بە پێدانی چەكی پێشكەوتوو بە ئۆپۆزسیۆن، زۆر بەئاسانی دەیانتوانی كۆتایی بە نەهامەتیەكانی سوریا بێن و، ئەم هەموو لێكەوتەش لە شەڕەكەدا نەدەكەوێتەوە.

بەڵام ئیدارەی ئۆباما زۆر بەخەمساردیەوە مامەڵەیان لەگەڵ ئەم مەلەفەدا كرد، تا دواجار سوریا بوو بەم سوریایەی كە ئێستا بەهیچ زمانێك وەصف ناكرێ‌ و، بە هیچ قەڵەمێك نانوسرێ‌ و، بەهیچ وشەیەك نابێ‌ بەشیعر و، بە هیچ كتێبێك نابێ‌ بە رۆمان و، بەهیچ كامیرامانێك وێنەی ناگیرێ‌ و، بە هیچ فلم سازێك نابێ بەفلم و دراما.

هەرچەند زۆر درەنگە و خەریكە تاریكی شەو هەموو شتێ لەم وڵاتەدا دادەپۆشێ‌، بەڵام بەو هیوایەی كە دواجار هەڵگرانی چەمكی مافی مرۆڤ و، لیبڕاڵە دیموكراسیەكان و خاچ لە ملەكان، ئەگەر بۆ تەنها جارێكیش بێ، درۆ نەكەن و ئەم لافاوی خوێنە راگرن. بەو ئومێدەی هێرشەكەی ئەمریكا بەشێكی تری فلمەكە نەبێ‌ و، ئیتر بەیەكجاری لوتی روسەكان بشكێ‌ و كۆتایی بە وێرانكاری و خوێن رێژی بێ‌ لەم وڵاتەدا، كە ناڵەی بێ دەسەڵات و بێ تاوانانی گەیشتۆتە حەوت تەبەقەی ئاسمان.

 

 

سۆران هەستیار

سۆران عبدالله، لە دایك بووی 1973.ئەندامی كارای  سەندیكای رۆژنامەنوسانی كوردستان.ئەندامی یەكێتی رۆژنامەنوسانی نێودەڵەتی.بەشداربووی چەندین خولی جۆراو جۆری بواری رۆژنامەوانی،وەرگێر و شاعیر و پەخشان نووس.شرۆڤەكاری سیاسی،موحەریری هەواڵ لە كەناڵی سپێدە لە ساڵانی پێشوو، نوسەری  بەردەوامی رۆژنامەی یەكگرتوو پێش وەستانی رۆژنامەكە.