كی ژ ڤێ‌ ستەمێ‌ بەرپرسە؟

  پێنج شەممە, 13 نیسان 2017 16:49

نڤێسین: یەحیا جاد
وەرگێران: وەحید سندی
گەلەك جاران پرسیار دهێتكرن: ئەگەر خودێ‌ دادپەروەرە؛ ئەرێ‌ بۆچی ب ڤێ‌ زۆلم و ستەما نوكە ڕازییە؟!! ئەگەر خودێ‌ شیان هەنە بۆچی ناگوهورت؟!! زارۆكەكێ‌ بچویك دێ‌ ژ برسان مرت؛ ئەرێ‌ چ گونها خوە هەیە؟ بۆچی خودێ‌ دڤێت ئەوی ب جەربینت؟!
بەرسڤ:
كێشە لڤێرەیە دەما ئەم نزانین و مە ژبیركری دەرئەنجامێن تشتی ژ دەڤ خودێ‌ یە، لێ‌ خودێ‌ مرۆڤێن لسەر موكەلف كرین و ئەڤ كریارە یا ئێخستی د ستوویێ‌ واندا، ئەوێن ژێ‌ كرین بەرپرس، دێ‌ حسابێ‌ لگەل وان كەت لسەر ڤێ‌ ئاریشێ‌ و هەر ئاریشەیەكا دی، خودێ‌ ئەڤ دنیایە یا دانایی داكۆ مە مرۆڤان تێدا بكەت بەرپرس و ب جەربینت، ئانكۆ مە بكەت د ئەزموونێدا، مەرەم ژ بەرپرسیارەتی و پێراِبوونێ‌ (التكلیف)- د دیتنا مە مرۆڤاندا- ئەم یێن بەرپرسین ژ پەیداكرنا زۆلمێ‌ و ژ ڕاكرنا وێ‌ دەما كەسەك د كەڤت تێدا.
ئەڤ چەندە بەرپرسیارەتییا مەیە – مرۆڤان- نەبەرپرسیارەتییا خودێ‌ یە، خودێ‌ ئەمێن پێ‌ ڕاسپاردین، دێ‌ حسابێ‌ لگەل مە كەت، ئەڤا د ناڤ گورەپانا ڤی ئەردیدا ڕوو ددەت بەرپرسیارەتییا مە مرۆڤایە، هەر تشتەكا بسەرێ‌ مرۆڤاتیێ‌ بهێت پرسیار دێ‌ ژ مە مرۆڤان هێتكرن، و نە ژ كەسێ‌ دی.
ئەڤ برسیاتییا د ناڤ جیهانێدا پەیدابووی كی ژێ‌ بەرپرسە؟
ئەرێ‌ ئاریشەیا خودێ‌ یە و ئەو ژێ‌ بەرپرسە؟
ئەرێ‌ ئەو كینە خارنێ‌ دهاڤێژن د ناڤ زبلدانێن كلێشیدا؛ زارۆكژی ژ برسان دمرن؟!
ئەرێ‌ ئەو كینە دبینن زارۆكێن خارنێ‌ لسەر زبلدانان دخۆن و ئەو وان خودان ناكەن؟!
ئەرێ‌ ئەو كینە ڤان ڤێلا و بالەخانێن هندە مەزن و بلند ئاڤادكەن هەتاكۆ عەوران دبرن؛ زارۆكژی ژ برسان دمرن؟!
ئەرێ‌ ئەو كینە مالی لسەر مالی ددەینن و پارەی هەر كۆمدكەن؛ زارۆكژی ژ برسان دمرن؟!
ئەرێ‌ خودێ‌ یە ڤان كاران و هێشتاژی دكەت یان مرۆڤن؟!
سالانە ملیون و نیڤ زارۆك ژ برسان دمرن ژ برسان یانژی ژبەر خرابییا خارنێ‌، ئەرێ‌ تو دزانی چەند پارە بەسە بۆ دابینكرنا خارنا (5)ملیون زارۆكان؟!
ئێك زارۆكێ‌ بتنێ‌ ڕۆژانە پێدڤی ب (10)دۆلارایە، ئانكۆ (3650) دۆلار د سالەكێدا، ب ڤی ڕەنگی بۆ ڕێژا (5) ملیون زارۆكان (18.25) ملیار دۆلار د سالەكێدا پێدڤینە.
ئەرێ‌ تو د زانی مال و سامانێ‌ هندەك ژ دەستهەلاتدارێن عەرەب چەندە؟!
مال و سامانێ‌ پادشاهێ‌ (سعودیە) دگەهت (18) ملیار دۆلاران: ئانكۆ پارێ‌ ڤی كەسی بتنێ‌ تێرا (5) ملیون زارۆكان هەیە بۆ سالەكا تمام.
مال و سامانێ‌ خەلیفە (ال نهیان) (15) ملیار دۆلارە، دیسان (10) دەستهەلاتدارێن عەرەبی مال و سامانێ‌ وان دگەهت (40) ملیار دۆلاران!! ئانكۆ پارێ‌ وان بەشێ‌ (5) ملیون زارۆكان دكەت بۆ ماوێ‌ زێدەتری (2) سالان!!
ئەرێ‌ تو د زانی مال و سامانێ‌ (20) كەسێن زەنگینێن جیهانی دگەهت چەندێ‌؟! ئەوژی (815) ملیار دۆلاران، ئانكۆ ئەڤ ڕێژا پارەیی تێرا (5) ملیار زارۆكان دكەت بۆ ماوێ‌ (45) سالان!! دیسان ئەرێ‌ تو د زانی مال و سامانێ‌ (30) كەسێن ئێكێ‌ یێن جیهانی دگەهت چەندێ‌ ؟! ڕێژا پارێ‌ ڤان سیهـ كەسان دگەه (1123) ملیار دۆلاران! ئانكۆ پارێ‌ ڤێ‌ هژمارا كەسان تێرا (5) ملیون زارۆكان دكەت بۆ ماوێ‌ (62) سالان، گونەها مەزنژی لڤێرەیە ئەڤ داهاتە هەمی د دەستێ‌ ڤێ‌ خەلكیدا و هێشتا هندەك كەسێن نەزان ئەڤێ‌ خەلەتییا دابەشكرنا داهاتی و زۆلما وان دكەن د ستوویێ‌ خودێ‌ دا و ئەز بێژم باش یا دیارە ژ كارێ‌ مرۆڤایە و ئەو ئەزموونە یا ئەو تێدا!!
خودێ‌ زارۆكێ‌ برسی ناكۆژت، بەلكۆ كەسێن زۆلمكار و ستەمكار وی دكۆژن، ئەو دەستهەلاتدارێن زكێ‌ خوە ژ مالێ‌ شەعبێ‌ كری تێر ئەو دكۆژن، دیسان كەسێن دەرەبەگ و نەهنگێن سەرمایەداری وان دكۆژن، خودانێن خەزینان وان دكۆژن، ئەو حوكمەتێن نەدروست د ڕێڤەبرنا خوەدا ئەو دكۆژن، ئەو كەسێن مالێ‌ خوە لسەر تشتێن ب كێر نەهاتی خەرج دكەن ئەو ڤان زارۆكان دكۆژن، ئەم وان دكۆژین ئەگەر ئەم ژیانێ‌ بۆ وان پەیدانەكەین.
ئەرێ‌ هوین د زانن هەتا ئەو دەستەیا جیهانییا پرۆگرامێ‌ خوارنێ‌ ژی (WFP) جوداهیێ‌ د ناڤبەرا جوتیارێن ژن و زەلامدا دكەن د دابەشكرنا هاریكارییاندا لسەر وان، داكۆ هندەكان بسەر بێخن و هندەكانژی بمرینن، هیچ وەكهەڤیەكێ‌ د هاریكاریێن خوەدا ناكەن، هاتییە دیاركرن ڕێژا كەسێن برسی د جیهانێدا (150) ملیون كەسن؟! دیسان ئەرێ‌ هوین د زانن نڤێسینگەها نیشتیمانییا ئاماران ل بریتانیا دبێژت: خەلكێن بریتانیا بتنێ‌ سالانە (20) ملیار دۆلاران ل ماددێن بێهوشكەر دمەزێخت؟! ئەڤ برا پارەیی ژی تێرا (5) ملیون زارۆكان هەیە بۆ ماوێ‌ زێدەتری سالەكێ‌!! ئەرێ‌ هوین د زانن مرۆڤ چەند پارەیی د ماددێن فاحیشێدا دمەزێخن؟! بتنێ‌ ل (4) وەلاتێن (ئەمریكا، چین، یابان، كوریا) ئەو پارێ‌ بۆ ڤی ئالیی دهێت خەرجكرن دگەهت (86) ملیار دۆلاران سالانە، ئەڤ ڕێژا پارەیی ژی تێرا (5) ملیون زارۆكان هەیە بۆ ماوێ‌ (50) سالان!!
ئەرێ‌ كی ژ ڤێ‌ هەمیێ‌ بەرپرسە؟ خودێ‌، یانژی مرۆڤێن خراپكار ئەڤێن دڤێت مەزنترین حساب لسەرا ڤێ‌ یەكێ‌ لگەل وان بهێتكرن؟!
"حسام مۆنس" گوتنەكێ‌ دەربارەی "چارلز داروین"ی دبێژت: داروینی وژدان و ئیمان ژ پتریا دەستهەلاتدارێن ڕۆژهەلاتی، بەلكۆ ژ پتریا مەژی هەبوو، دەمێ‌ د ناڤ ئێك ژ پەرتووكێن خوەدا گوتی: "مادەم ئەڤ نەخوەشیی و ئالۆزییا ب سەرێ‌ خەلكێ‌ هەژار دهێت نە ژ یاسایا ڕێككەڤتنا سرۆشتی یە، بەلكۆ بەرۆڤاژی ژ ئەگەرا دەزگەهێن مرۆڤییە، كەواتە گونەها مە گەلەكا مەزنە!".
دیسان "محمد الغزالی" دبێژت: "ژ لاوازییا هندەك كەسان: ئەگەر ئەرد گەندەلبوو، ئێكسەر گونەهێ‌ دكەن د ستوویێ‌ ئەسمانیدا! ل شوینا ئەڤ كەسە ب كارێ‌ خوە ڕابن و گەندەلیێ‌ ژ ناڤ ببەن و دادیێ‌ بینن، گەلەك خوە مەزن دكەن و گوتنێن مەزن لسەر دینی و ڕەبێ‌ دینی دبێژن!".
هەروەسا "احمد خیری العمری" دبێژت:"برایێن مولحدێن نوی دبێژن: كا خودێ‌؛ ئەرێ‌ ما ڤێ‌ سزادانا زارۆكان و مرۆڤان نابینت...هتد؟! ئەو بەرۆڤاژی د ئەڤێ‌ فەرمانێ‌ دگەهن؛ چونكی ئەو وەسا هەست دكەن جیهان "ئەزموونا خودێ‌"یە، لسەر وی پێدڤییە هەمی دەمان شیانێن خوە نیشانی خەلكێ‌ بدەت داكۆ باوەریێ‌ پێ‌ بینن، د ڕاستیدا ئەڤ پرسە بەرۆڤاژییە ب تەمامی؛ چونكی جیهان "ئەزموونا مە"یە، لسەر مە پێدڤییە ئەم كریارا هەر باش ئەنجامبدەین، ئەم ئەڤێ‌ سزایا خەلك ب سەرێ‌ خەلكێ‌ دئینت كێم بكەین و دادیێ‌ د ئەڤی ئەردیدا بەلاڤبكەین".
ل دۆماهیێ‌ ژی (یحی جاد) دبێژت: "هیڤی دكەم هزرا خوە د ڤێ‌ چەندێدا بكەن دەما خودێ‌ دبێژت:"ڵقَدْ أَرْسَلْنَا رُسُڵنَا بِالْبَیِّنَاتِ ۆأَنزَلْنَا مَعَهُمُ الْكِتَابَ ۆالْمِیزَانَ لِێقُومَ النَّاسُ بِالْقِسْگِ" الحدید: 25.