بنیات و به‌رهه‌مێن روحانیه‌تا ئیسلامی(8)

  پێنج شەممە, 20 نیسان 2017 05:32

 

 

زكر به‌نداتی یا هه‌می ده‌مایه‌.....(خ8)

 

 

زكرچیه‌؟ ئانكو مروڤ خودایێ خو بینیته‌ بیرا خو یان بیرا خو ل خودێ بینیت

به‌لێ گومان تێدا نینه‌ دڤێت وه‌سا مروڤ زكرێ خودێ بكه‌ت هه‌روه‌كی خودێ فه‌رمان ل مه‌ كری و بومه‌ دیار كری، هه‌روه‌سا هه‌روه‌كی پێغه‌مبه‌رێ خودێ سلاڤ لسه‌ر بن ب كریار د هه‌مێ مه‌یدانێت ژیانێ دا زكرێ خودێ كری

ل ده‌ست پێكێ هه‌ر خودایێ مه‌زن د فه‌رموت ( فاذكرونی اذكركم) خودێ دبێژیته‌ مه‌ زكرێ من بكه‌ن من بیننه‌ بیرا خو ، به‌لێ ب چ شێواز چه‌وا مروڤ زكرێ خودێ بكه‌ت!؟ گومان تێدا نینه‌ نموونێن زكرێ خودێ ژ ژیانا خوشتڤی سلاڤ لسه‌ر بن د زورن ، زكر كرنا خودێ لدویف ڤێ پارچا ئایه‌تێ دڤێت ب وی ره‌نگی بیتن تو وه‌سا زكرێ خودێ بكه‌ی هه‌تا خودێ ژته‌ قه‌بیل بكه‌ت یان خودێ ژ زكرێ ته‌ رازی بیت هینگێ دێ خودایێ مه‌زن ئه‌و په‌یمانا دایه‌ مه‌ ب جھ ئینیت ده‌مێ دبێژیت (اذكركم)

باشه‌ خودێ دێ چه‌وا زكرێ مه‌ كه‌ت ؟؟

دێ ناڤێ ته‌ دناڤ فریشتا دا ئینیت ، دێ ناڤێ ته‌ دناڤ مه‌له‌كوتێت ئه‌سمانا دا ئینیت ، هه‌روه‌سا دێ دلوڤانیێ لمه‌ بارینیت ، دێ زكرێ مه‌ قه‌بیل كه‌ت ، دێ پشته‌ڤانیا مه‌كه‌ت و دێ ته‌وفیقا مه‌ ده‌ت.

بڤی ره‌نگی هه‌كه‌ ئه‌م لدویف گوتنا خودێ بچین و زكرێ خودێ بكه‌ین وسا دێ خودێ خه‌لاتێت خو ده‌ته‌ مه‌ ، ژبه‌ر هندێ هه‌كه‌ ئه‌م به‌رێ خو بده‌ینه‌ پێغه‌مبه‌ری سلاڤ لسه‌ر بن وه‌ك ب هێزترین زكر كه‌ر دناڤ دیروكا مروڤاتیێ دا دێ به‌رێ خو ده‌ینێ چه‌ند جورێن زكری دكرن :

1- خوشتڤیێ خودێ سلاڤ لسه‌ر بن ب ره‌نگه‌كێ به‌رده‌وام زكرێ سپێده‌ و ئێڤارا دكر ، كو چه‌ند زكره‌كێن ده‌ست نیشان كرینه‌ ژ قورئانێ و فه‌رمودێن پێغه‌مبه‌ری سلاڤ لسه‌ر بن دڤێت مروڤ بوخو بكه‌ت دا بومه‌ ببنه‌ په‌ژانێن شه‌ڤ و روژاو بێیه‌ پاراستن ژ هه‌می نه‌خوشیا و شه‌یتان و سه‌رداچونا.

2- زكرێ هه‌لكه‌فتا : ئه‌ڤ زكره‌ ژی ب هه‌لكه‌فتێ ڤه‌ یێ گرێدایه‌ وه‌ك ده‌مێ تو ژمال ده‌ردكه‌ڤی و ده‌مێ دچیه‌ مزگه‌فتێ و ده‌مێ د چیه‌ د ترومبێلێ دا و هه‌تا دوماهیێ..... و ئه‌ڤ زكره‌ یێ پێتڤی یه‌ و داببیته‌ به‌ره‌كه‌تا ژیانا مروڤی و وی كارێ مروڤ دكه‌ت و مروڤ بێته‌ پاراستن ژ هه‌می شه‌یتانا.

3- زكرێ پشتی عیباداتا و ب تایبه‌ت پشتی نڤێژێ : ئه‌ڤ زكره‌ ژی بو مروڤی دبیته‌ هێزه‌ك پتر عیباده‌ت لبه‌ر دلێ مروڤی شرین ببیت و دوعایێن مروڤی قه‌بیل ببن و مروڤ پتر خوشیێ و له‌ززه‌تا عیباده‌تی ببینیت .

4- زكرێ زور : زكرێ زور زكرێ پێغه‌مبه‌ر و ئه‌ولیانه‌ خودایێ مه‌ گه‌له‌ك جارا د قورئانێ دا به‌حسێ زكرێ زور كریه‌ (واذكروا الله كثیرا لعلكم تفلحون) خودێ بومه‌ گه‌له‌ك به‌حسێ زكرێ زور دكه‌تن دا ئه‌م گه‌له‌ك زكرێ خودێ بكه‌ین ئانكو د بنیات دا دڤێت زكرێ مه‌ یێ زور بیت نه‌ یێ كێم بیت .

پێغه‌مبه‌رێ خودێ سلاڤ لسه‌ر بن ئه‌ڤ ئه‌زكاره‌ هه‌می دگوتن هه‌تا چویه‌ به‌ر دلوڤانیا خودێ ، به‌لێ گومان تێدا نینه‌ هنده‌ مه‌رج پێتڤی نه‌ دڤێت مروڤ پێگریێ پێ بكه‌ت دا زكرێ مروڤی لسه‌ر مروڤی یێ كاریگه‌ر بیتن و دا خودێ ژی ژ مروڤی قه‌بیل كه‌ت :

1- دڤێت مروڤ ژدل زكرێ خودێ بكه‌ت ، به‌لكی ده‌مێ زكرێ خودێ دكه‌ت دلێ ته‌ هه‌می بو زكرێ خودێ بیت و چ تشتێ دی لگه‌ل ته‌ نه‌بیت .

2- دڤێت مروڤ هه‌می هه‌ستێت خو كوم كه‌ت كا مروڤ زكرێ كێ دكه‌ت ، ئانكو خودێ بتنێ د هزرا ته‌ دا بیت .

3- گه‌له‌كا پێتڤی یه‌ مروڤ رامانا هه‌ر زكره‌كی بزانیت ده‌مێ مروڤ دكه‌ت ، چنكی پتر كاریگه‌ریێ لسه‌ر مرڤی دكه‌ت.

4- هه‌روه‌سا پتر پێتڤی یه‌ مروڤ بها و ئه‌جرێ زكری ژی بزانیت كادێ ب ڤێ زكركرنێ چ گه‌هیته‌ مروڤی .

5- هه‌روه‌كی دوعا گه‌له‌ك پێتڤی یه‌ مروڤ زكری گه‌له‌ك دوباره‌ كه‌ت ، مروڤ پێتڤی یه‌ هند زكری دوباره‌ كه‌ت هه‌تا ببیته‌ ره‌وشا روحا مروڤی .

 

هه‌كه‌ مروڤ هوسا د زكرێ خودێ بگه‌هیت و هه‌ر چوار جورێن زكری بكه‌ت و پێگریێ ب هه‌می مه‌رجێن زكری بكه‌ت ب هاریكاریا خودێ دێ مروڤ بیته‌ ژ وان كه‌سا یێ خودێ ژی ب چاكی به‌حسێ مروڤی بكه‌تن و هه‌روه‌سا مه‌لائیكه‌ت ژی دێ په‌سنێن مروڤی دێ ب چاكی بێژن و مروڤ لسه‌ر رویێ ئاخێ دناڤ مروڤان دا ژی دێ مروڤه‌كێ خوشتڤی بیت .

هیڤی یا مه‌ ژ خودێ ئه‌وه‌ ب رزقێ مه‌ هه‌میا بكه‌ت