مردنی نەوشیروان و گۆڕان و هوتاف كێشان

  دوو شەممە, 22 ئایار 2017 10:39

وەك ئاشكرایە رۆژی هەینی 15ی ئایار،بەڕێز رێكخەری گشتی بزووتنەوەی( گۆڕان) لە تەمەنی 73 ساڵیدا كۆچی دوایی كرد و، رێوشوێنی ناشتنەكەشی كەوتە رۆژی دواتر. دیارە لە مەڕاسمی ناشتنەكەیدا، جگە لە دەیان هەزار كەس، بەشێك لە سەركردوە و كەسی یەكەمی حیزبەكانیش وەك هاوخەمی و، رێزو حورمەت لێنان، لە (نەوشیروان مستەفا) و خەباتی 50 ساڵەی ئامادە بوون و قسەیان بۆ ئامادەبوان كرد.

لە درێژەی وتاری لایەنە سیاسیەكاندا، بەڕێز (ئەمینداری یەكگرتوو)ش وەك وەفا و عورف و ئەخلاق و ئەمەك بۆ سەركردەیەكی كۆچكردو ئامادە بوو، پاشان وتارێكی پێشكەش كرد،ئەوەی جێگای داخە لەكاتی وتارەكەی ئەمیندار، بەشێك لە جەماوەری (گۆڕان) بەئاشكرا بێ‌ ڕێزیان بەرامبەر بە ریشی سپی و كەسایەتێكی ناسراو و، سەرۆكی حیزبێكی سیاسی كرد!!!
بەداخەوە عەیبەیەكی گەورەیە ئێمە كاتێ‌ كە رەخنە لەیەكتر ئەگرین لەسەر سیفەتێكی دیاریكرا و خۆشمان هەڵگری هەمان سیفەت بین.
ئەوەی زۆر جێگای سەرەنج و لەسەر وەستانە ئەوەیە كە، ئەو بێڕێزیە لەماڵی (گۆڕان) و لە مەنزڵگای رابردوو و ئێستای خودی (نەوشیروان مستەفا) بوو، لە كاتیێدا كود لە ئەخلاقی باب و باپیرانی فێری ئەوە بووە،كە لە ماڵەكەی خۆیدا دەست بۆ دوژمنەكەشی نەبات.
بەداخەوە دیارە كۆچكردووی بەڕێز، كە تەمەنێك لە خزمەتی میللەتەكەی بوو، خەباتی كرد، وانەی وتەوە،خەڵكی فێركرد، دواجار كە (گۆڕان)ی دروستكرد، بۆ ئەوە بوو كە بیگۆڕێ‌، بەڵام چی بگۆڕێ‌؟ ئەوە بگۆڕێ‌ كە بیركردنەوە و هەڵوێستی جیاواز و كۆپی نەبوونی یەكتر، سروشت و ناسنامەی هەموو كۆمەڵگایەكی تەندروست و سەلیمە، بەڵام جێگای داخە، دیارە نەك خەڵكی عەوام بەڵكو بەشێك لە هەوادار و شوێنكەوتوانیشی نەیان توانیوە لەم پیاوە گەورەیە تێبگەن، دەی ئەگەر بیان توانیایە تێبگەن لە مەڕاسمی ناشتنی بەڕێز(نەوشیروان) لەبری ئەوی بە هەڵوێستی جوان رۆحی شاد بكەن، بێ‌ ڕێزیان نەدەكرد بە رامبەر بە میوان و سەركردە ریش سپیەكان.
ئەوش بلێم كە هەمو كارێكی ناشیرین وەك شمشێری دوو دیو وایە، ئەگەر دیوێكی بەرامبەرەكەت ببڕێ‌،ئەوە دڵنیابە دیوەكەی تری خۆت ئەبڕێ‌.
لەمەش خراپ یتر ئەوە بوو كە سەركردوە كاربەدەستەكانی (گۆڕان) لەدوای ئەم هەڵوێستە ناشیرینە نە پۆزشیان هێنایەوە، نە رەدی ئیعتیباریان كرد و نە روونكردنەوەیاندا.
راستە گومان لەوە نیە كە (نەوشیروان مستەفا) نیو سەدە لە خەباتدا بووە، بەڵام خۆ ئەمینداریش هەر نیو سەدەیە لەخەباتە بۆ كوردو كورستان، بەڵام بە ئامراز و كەرستەی جیاواز، حەق بوو ئەو برادەرانەی ئەم كارە ناشیرین و خراپەیان ئەنجامدا لەبەر هیچ نە بوایە لە بەر خاڵێكی زۆر گرنگ رێزی دنیا لەم پیاوە هێمن و ریش سپیە بگرن، ئەویش حەقیقەتێكی تاڵە و برادەرانی (گۆڕان)زۆر حەزناكەن لە وتنی، ئەزانن چیە؟ ئەوەیە كە (گۆڕان) بیەوێ‌ یان نا، زۆرینەی سەركردە و كاربەدەست و بنكەی جەماوەری و دەنگدەرانی (گۆڕان) لە رەحم و هەناوی دوو حیزب گەورەبوون و فێری ئەلف و بێی سیاسەت بوون، بەكورتی (گۆڕان) زۆرینەیان رۆڵە و كوڕی دوو دایكن، ئەم دوو دایكەش بریتین لە (یەكێتی و یەكگرتوو).هەر كەس ئەڵێ‌ وانیە ئەوە ئەرز و ئەوەش گەز.
بەهەر حاڵ خەمی گەورەتر ئەوە بوو بەڕێز جەنابی ئەمیری (كۆمەڵ ) كە بە چەپڵە رێزان و هوتافی پیاوی مەرد چووە سەر منەسەكە، حەق بوو بڵێ‌ زۆر سوپاس بۆ چەپەڵەكانتان دڵخۆشتان كردم، بەڵام ئەم رەفتارەتان زۆر ئازاری دام، چونكە ئەو كەسە برا و هاوبیر و هاورێگا و هاوسەفەری منە، چەند چەند جوان ئەبوو بڵێ‌، ئامادە بوان ئەزانم ئێوە دڵتان پاكە و لەوانە بەهەڵە ئەوە كرابێ‌، بۆیە هەموو بەجارێ‌ بڵێن ببورە، ئەو كات ئەو پیاوە چەند گەورەیە گەورەتر ئەبوو.
بەداخەوە تاكی كورد چ سەركردوە بێ‌ یان كەسێكی ئاسایی، ناتوانێ‌ گەوەرەبێ‌، چونكە كورد بە گەورەیی رانەهاتووە، بەڵكو بوونی خۆی لە شكانی ئەوەی تر و، ژیانی خۆی لەمردنی ئەوی تر و سەركەوتنی خۆی، لە شكستی ئەوی تر و، خۆشی خۆی لە مل شكان و نەگبەتی ئەوی تر ئەدۆزێتەوە، دڵنیان بن تا وابژن هەر وا ئەژین.

سۆران هەستیار

سۆران عبدالله، لە دایك بووی 1973.ئەندامی كارای  سەندیكای رۆژنامەنوسانی كوردستان.ئەندامی یەكێتی رۆژنامەنوسانی نێودەڵەتی.بەشداربووی چەندین خولی جۆراو جۆری بواری رۆژنامەوانی،وەرگێر و شاعیر و پەخشان نووس.شرۆڤەكاری سیاسی،موحەریری هەواڵ لە كەناڵی سپێدە لە ساڵانی پێشوو، نوسەری  بەردەوامی رۆژنامەی یەكگرتوو پێش وەستانی رۆژنامەكە.