(گەلانی شۆڕشگێڕ تا ئێستەش باجی شۆڕشەكانیان دەدەنەوە)

(لە ڕۆژهەڵاتی ناوەڕاستدا شۆڕش و كودەتا و ڕاپەڕین كۆتایی بەیەكتر دێنن)

لە ڕۆژهەڵاتی ناوەڕاستدا شۆڕشگێڕەكان كە دێنە سەر دەسەڵات هەمان كۆپی دەسەڵاتەكەی پێش خۆیانن، خۆش بەختی ئەو شۆڕشگێڕانە لەوەدایە ئەو نەوە نوێیەی كە چەپڵە بۆ ئەمان لیدەدات و ئاگاداری كار و كرداری دەسەڵاتەكەی پێش ئەمان نیە، بەڵام كاتێك تێدەگات كە لە خشتە براوە، ئیتر كار لە كار ترازاوە و ئەوان جێ پێی خۆیان قایمكردوە و ئیتر ئیشیان بە جەماوەر نەماوە، پاش ئەوەی كە جەماوەر لە مەبەستە ناپاكەكەیان تێگەیشت، دووبارە و چەند بارە هەوڵی هەڵگیرسانی شۆڕشێكیتردێتە ئاراوە، ئەو كارەكتەرە نوێیانەش بە هەمان ڕۆحیەت و مەبەست سەرقاڵی كۆڕی خەبات دەبن، ئەمانیش كۆمەڵێك لاوی خوێنگەرم لە خشتە دەبەن و دەیانكەنە سوتەمەنی شۆڕشە نوێكە، سەركردەكانی شۆڕشە نوێكەش لە تەڕ دەخۆن و لە وشك دەخەون، چونكە ئەزمونیان وەرگرتوە لە سەرانی شۆڕشە یەك لە دوای یەكەكانی پێش خۆیان، لە درێژەی هەمو ئەو شۆڕشانەدا گەل بەدبەختر و سەرانی شۆڕشەكان خۆشبەختتر و لاوانیش باجی قورس و سوتەمەنی شۆڕشەكان بون، سەركردەی شۆڕشەكان زەنگین و گەلانیش هەژارتر بون، شۆڕشكێڕەكان لە پاش دەیان ساڵ لە بە ئەنجام گەیشتنی شۆڕشەكانیان و گەشتنیان بە كورسی دەسەڵات، سەری زمان و بنی زمانیان هەر باسی فیداكاریەكانی سەردەمی شۆڕشە، زۆربەیان سەروەریەكانی سەردەمی شۆرش یاداشت دەكەن و دەیدەدەنەوە بە نێوچاوی مێژوی میللەتەكەیاندا.

با بپرسین ئاخۆ ئێستە چەند كەس لەوانەی بەشداری كارایان هەبوە لە هەڵگیرسانی شۆڕشەكاندا پەشیمانبن لەو هەوڵ و ماندوبونەی لەو پێناوەدا دایان و ئەو خوێن و فرمێسكەی لەو پێناوەدا ڕشتیان؟؟؟

ئەو گەلانەی كە تاكە سەروەریان شۆرشەكانیان بوە تا ئەمڕۆشی لەگەڵدابێت باجی شۆڕشەكانیان دەدەنەوە، تا ئەمڕۆش شۆڕشەكانیان درێژەی هەیە، تا ئەمڕۆش بە شۆڕشێك یان كودەتایەك كۆتای بە دەسەڵاتی شۆڕشێكیتر دەهێنن.

سەرانی شۆڕشەكان سەرەتا نمونەی كەسانی خۆنەویست و قارەمان و گیان فیداكاربون، بەڵام كە دەستیان گەشتە دەسەڵات ئیتر هەمو پێوەرەكان پێچەوانە دەبنەوە، ئەو قارەمانانە دەبنە گەورەترین خوێنڕێژ و دكتاتۆر و مافیا، ئەو شۆڕشگێڕانە كامانەن كە بە شێوەیەكی ئاشتیانە و لە پرۆسەیەكی دیموكراسیدا ئاڵوگۆڕی دەسەڵاتیانكردوە؟

هەر دەسەڵاتێك بە كودەتا یان بە شۆڕش گەشتبێتە دەسەڵات، تەنها بە كودەتا یان ڕاپەڕین یان شۆڕشێكیتر دورخراوەتەوە لە دەسەڵات.

هەموجارێكیش گەڕاوینەتەوە بۆ بازنەی یەكەمی گەمەكە.