کورد پێویستى بەحیکمەتە نەک پاڵەوان!

ئاشکرایە کە لەوەتەی کورد هەیە لەلایەن زلهێزانەوە چەوسێندراوەتەوەو ستەمی لێکراوەو فرۆشراوە، ئەمەش بوەتە هۆی سەرهەڵدانی گەلێک شۆڕش و بەرخۆدان،وە لەهەموو پارچەکانی کوردستان دژ بەو ستەمو زوڵمانە وەستاونەتەوە، لەبەرامبەریشدا کورد باجی گەورەی داوە چ وەک خەبات و چ وەک نەتەوەش.
لەسەرو بەندی ئەو ململانێ سەختانەدا کورد زۆرجار ناچار کراوە کە هاوکاری هەندێک لەو وڵاتانە قبوڵ بکات کەخۆیان بە فریادرەس ناساندوە بەتایبەت وڵاتە زلهێزەکان، بەو ئومێدەی ئاهێک بێتەوە بەبەریداو هەناسەیەکی ئازاد هەڵمژێت و کەمێک لەژێر ستەم و داپڵۆساندن پارێزراو بێت، بەڵام مەخابن هەردەم ئەو وڵاتانە بۆ بەرژەوەندی خۆیان کوردیان بەکار هێناوەو تائەو شوێنەی کەئیشیان پێ ی بوە هاوکاریان کردوەو دواتر زۆر بێشەرمانە پشتیان تێ کردوەو فرۆشتویانە، باشترین نمونەش وەک ترامپ خۆى دەڵێ، پشت تێکردنی کورد بو لەکاتی هێرشەکانی حەشدی شەعبی و سوپاکەی ئێران لەساڵى 2017دا بۆ داگیرکردنی شاری کەرکوک و دوا هەڵوێستیشیان دەستبەردانى چاوەڕوان نەکراوی ئەمریکای هاوپەیمان بو لەڕۆژئاوای کوردستان.
ئەمەیان تاڕادەیەک کورد دەست و پەنجەی لەگەڵ نەرم کردوەو یەکەمجاری نیە کە لەپشتەوە خەنجەری لێ بدرێت، بەڵام ئەوەی جێگەی داخە ئەو هەڵمەتە ناوخۆییەی کوردە کە دژ بەخۆی هەیەتی و بەتایبەت لەسۆشیاڵ میدیا هەرچی پەلو پۆو پەنجەو دەست و دڵ و قاچی یەکتر هەیە ئەیشکێنن و بەشی تیمارو چارەسەریشی پێوە ناهێڵن، هەرچى سەرکردەو ڕەمزو کاریزماو ڕۆشنبیرو پیاوى قسە رۆشتو دەسترۆشتومان هەیە سوک و ریسواى ئەکەن، بەبێ ئەوەى هیچ سودو قازانجێکى لێ بکەن جگە لەماڵوێرانى زیاتر بۆ نەتەوەکەمان، هەڵمەتێک کە دڵی داگیرکارو دوژمانی هێندە خۆش کردوە کە دورنیە ئاهەنگی بۆ نەگێڕن.
ئێستە کورد پێویستى بەچیە؟
-کورد لەئێستادا پێویستی بەحیکمەتی زیاترە.
-پێویستە کارە ڕاستەکە بکات نەک یەکتر شکاندن و یەکتر سوک کردن.
-کورد پێویستی بەپاڵەوان بازی و خۆ بەپاڵەوان ناساندن نیە، چونکە تازیاتر ئازابین زوتر ئەمرین، تا زیاتر شەڕکەربین زۆرتر پارە ئەکەین، تا زیاتر خۆخۆر بین زوتر و زۆرتر ریسوا ئەبین.
ئەوەى ڕۆژێک کورد بوبێت پاڵەوانە، چونکە بەرگەى ئەو هەموو ماڵوێرانی و خیانەت و ئاوارەیی و ئەنفال و کیمیابارانەى گرتوە.
-کورد پێویستى بەیەکڕیزى و ئاشتەوایی نیشتمانی هەیە.
-کورد پێویستى بە سەروەریە پێویستى بەدەوڵەتە.
-کورد پێویستى بەدوژمنى زۆرترو بەهێزتر نیە،وەک دەڵێن: دوژمنێک زۆرەو هەزار دۆست کەم.
-کورد پێویستی بە نەشتەرو برینی نوێ نیە، پێویستی بە ساڕێژکردنی برینە کۆنو نوێکانێتى.
هەمومان خوشک و برای یەکین چارەنوسمان گرێدراوە بەم خاکەوە، ئەگەر خۆمان پەلوپۆی یەکتر بشکێنین لاوازترین دوژمن ئەتوانێت بەسەرماندا زاڵ بێت، هەر بۆیە ئەوە بزانن کە، ئەو قسەی ئەمڕۆ تۆ بۆ شکاندنى کەس و لایەنێکى تر ئەیکەیت چاندنی ڕقێکە نەوەکانی داهاتووى ئەم نەتەوەیە باجەکەی ئەدەن، واتە درێژەدانە بە خۆخۆری و یەکتر سڕینەوە. لەداهاتوشدا، گەرەنتى کردنى ناکۆکیەکانى داهاتومانە بۆ وڵاتە نەیارەکانمان.
کەواتە با تۆوی ئاشتی و برایەتى لەناو خۆماندا بڵاو کەینەوە، سابەڵکو لەداهاتودا بۆ هەمیشە نەوەیەک دروست ببێت کەپشتی یەک بگرن.
نەوەیەک کە بتوانێ هەموو جیاوازیەکان تێپەڕێنێت، وەک چۆن ئەمریکا توانی ڕەشپێست و سپی پێست و سورپێست تێپەڕێنێت و ببێتە گەورەترین زلهێزى دونیا، ئەوەتا ئێستا بەوپەڕی غرورەوە ئەڵێت: ئێمە بەهێزترین وڵاتی دونیاین، ئێمە خاوەن بەهێزترین سوپای دونیاین، ئێمە خاوەن بەهێزترین ئابوری دونیاین.!
هەروەها پێشکەوتوترین وڵاتی تەکنەلۆجی جیهانیشە.
لەکاتێکدا ئەمریکا وڵات نەبو، بەڵکو خاکێکی داگیرکراوی ڕسواکراوبو لەلایەن بەریتانیاوە!!
کەواتە با وشەکانی ئەمڕۆمان نەبنە درێژەپێدەری ئەو ڕق و کینەو ناکۆکى و خۆخۆریە مێژوویەی کە هەمانبوە بەرامبەر یەکتر.
با نەبینە هۆی هەڵوەشاندنەوەی زیاتری نەسیجی کۆمەڵگاکەمان، بەڵکو ببینە ڕێنیشاندەری نەوەکانى داهاتومان تا ببنە بناغە بۆ دەوڵەتێکی بەهێزی نیشتمانی ڕاستەقینە.
نەک دەوڵەتۆچکەی حیزبی و ئایدۆلۆجی و بەرژەوەند خوازانەى لاوازو بێدەسەڵات!!