كورد و دەوڵەت، پێكدادانی رەوتی چەپگەر و ئاین رۆژئاڤا بە نمونە

مرۆڤەكان لە هەر گۆشە و كەنارێكی ئەم جیهانە بن دواجار سەر بە نەتەوە و ئاینێكن و جۆرێ‌ لە بیروباوەڕ و پیرۆزیان هەیە،گرنگە نییە ئایدیاكان ئاسمانی بن یان زادەی فەلسەفی كەسێك، گرنگ ئەوەیە هیچ مرۆڤێك بێ‌ بیرو ئایدیا نییە.

ئاشكرایە كورد نەتەوەیەكی بێ‌ ناسنامە و بێ‌ دەوڵەتە،لەماوەی 100 ساڵی رابردوودا سەدان كتێب و هەزاران هەزار بابەت لەسەر ئەم مەسەلەیە نوسراوە و ئەوە ئەم وتارەشی چووە پاڵ. ئاشكرایە بێ‌ دەوڵەت بوونی كورد لە ئەنجامی كۆمەڵێك فاكتەر و هۆكاری مێژووییە،كە ناكرێت ئاماژە بەهەموویان بكەین، بەڵام یەكتر نەویستی سەرەكی ترینیانە. ئەوەی جێگای سەرەنجە لانی كەم و بە ڕواڵەت ئایدیای زۆرینەی كورد ئاینی ئیسلامە،لە بەرانبەردا چەندین رەوتی عەلمانی و ناسۆنیالیستی و چەپگەر بوونیان هەیە،كە بەئاشكرا خۆیان لەئاین بە دوور ئەگرن و دژایەتی بەردەوامی ئەكەن.

دوژمنانی كورد،كە لە هەمانكاتدا دراوسێن، بەردەوام ئاینیان بۆ بەرژەوەندی نیشتیمانی و نەتەوەیی خۆیان بەكار هێناوە،بەڵام ئێمەی كورد لە بری وەڵام دانەوەمان بەهەمان چەك،لە هەموو نسكۆ قوڕبەسەری و شكستێك، لەبری یەك بوون، ئەكەوینە گیانی یەكتری و ئەوەی دوژمن پێی نەكراوە بەرانبەرمان خۆمان تەواوی ئەكەین. بەداخەوە لە چەند رۆژی رابردوودا لەگەڵ هێرشەكانی توركیا بۆ سەر رۆژئاوا، لە سۆشیاڵ میدیا كوڕ ئەو كوڕە بوو، لە رەقی توركیا پەلاماری خواو پێغەمبەر و ئاین پیرۆزیەكانی ئیسلام بدات،خەڵك هەبوو پەیوەندی بە بەرنامەی میدیاكانەوە ئەكرد و داوای داخستن و نەهێشتنی مزگەوتەكانی ئەكرد!!!بەشێك لە بانگخواز و وتاربێژەكان لەبری دەستخۆش بۆیان، كە بە خەم رۆژئاڤاوە بوون،سەدان سوكایەتیان پێكراوە و دەیان قسەی پوچیان بۆ هەڵبەستراوە.

دوور لە ئەخلاقی ییشەیی رۆژنامەوانی، بەناوی مامۆستا و بانگخوازەكانەوە، درۆی شاخدار كراوە بە مانشێتی سایت و رۆژنامەكان، گوایە بانگخواز و ئاین پەروەرەكان دژی كوردن و لەبەرەی توركیان، پرسیاری جددی لێرەدا ئەوەیە،ئەرێ‌ ئەو بەناو نوسەر بەناو رۆشنبیرانە كە سوكایەتی بە ئاین و مامۆستا و بانگخوازەكان ئەكەن ،خۆیان چیان لەدەست هاتوە جگە لە شكاندی ئەوانی تر،چەندیان لەبەرەكانی شەڕن و چەندیان گیانی خۆیان بەختەت كردوە؟ نا ئەوان پشتگیری و هەڵوێست و كۆمەك و هاوكاریان ناوێت، ئەوان تەنها یەك شتیان لەخەڵكی ئاین پەروەر ئەوێت ،ئەویش ئەوەیە بێنە سەر شاشەكان و بڵێن ئەم دین و شەرع و ئیسلامە بەكەڵكی ئەم رۆژگارە نایەت و تەواو،ئیتر دڵیان ئارام ئەبێت و زمانیان ڵاڵ.

دەی باشە ئەگەر كورد دەوڵەت بوویایە یان سبەی ببین بە دەوڵەت، دەی باشە ئاخر ئەو خەڵكە قاز نیە هەمووی یەك ئاواز بقڕینێ‌!؟هندستان یەكێكە لە دەوڵەتە سەیر و سەمەرەكانی جیهان، زیاتر لە 1000جۆر بیروباوەڕ و ئایدیای جیاواز لەخۆ دەگرێت،دڵنیام ئەگەر ئاوا بەیەكتر بكەن بەرگەی 1000رۆژ ناگرن.

كێشەی گەورەی ئێمە ئەوەیە، كە نازانن چۆن بەرگری لەخۆمان بكەین، ئاخر بەرانبەركانمان بۆ سەلماندنی قسەكانیان ئاماژە بە چەند پۆستێكی سۆشیاڵ میدیا ئەكەن، كە خەڵكانێك بە حسابی خۆیان وەك بەرگری لە كوردبوون بڵاویان كردۆتەوە، بێ‌ ئاگا لەوەی لەبری ئەوەی ببێت بە چقڵی چاوی دوژمن، ئەبێت بە تیر و دڵی و هەناوی خۆمانی پێ ئەپێكەن.

عەرەب و تورك و فاس، زۆر عاقڵانە لە پەنای ئاین تەقەمان لێ ئەكەن و سۆزی جیهان بەگشتی و نەتەوەكەی خۆیان بەتایبەتی بەرامبەر بە كورد ئامادە و تەیار ئەكەن،ئێمەش لەبری وەڵامی بەرد بە بەرد بدەینەوە، بە شووشە وەڵامیان ئەدەینەوە و گۆزەكە لەسەری خۆمان ئەشكێنن و پاساو بەدەستەوە ئەدەین.

ئاخر كەسێكی شۆڤێَنی خەڵك ئەكوژێ‌،بۆ پەلاماری خوا و نوێژ و مزگەوت بدرێ‌؟!،مەگەر خوا لە كام ئایەتە فەرمویەتی بڕۆن زوڵم بكەن و بەناحەق خەڵك بكوژن؟! سەیر ئەوەیە كەسانێك زۆر شانازی بە ئیسرائیلەوە ئەكەن،بەڵام بێ‌ ئاگان لەوەی حزبی (شاس) وەك حزبێكی ئاینی، كە ناوی حزبەكە لە تەوڕات وەرگیراوە،وەك حزبێكی دینی گەورترین كاریگەری هەیە لەسەر سیاسەتەكانی ئیسرائیل و ئاڕاستەكردنیان! جولەكە عەلمانیەكانیش هەرچەند لە بیروباوەڕدا لەگەڵیان جیاوازن، بەڵام هەرگیز بێ‌ رێزی بەرانبەر بە تەوڕات و حاخام و كەنیسەكانیان ناكەن!!!

راستی ئەوەیە كە خەڵكانیك هەن هەڵگری بیری چەپگەرن،جگە لە بیری چەپ بوون هیچی تریان قبوڵ نیە،لەگەڵ بوونی هەر بۆنەیەك تەقە لە ئاین و ئاین پەروەرەكان ئەكەن، باشە تۆ ئازادی و چەپگەربە بەڵام لەبەرانبەردا كەسانێكی تریش هەن هەڵگری ئایدیای ئاینی ئیسلامن،دەی رێگا بدە ئەویش بە ئایدیاكەیەوە بەرگری بكات، چونكە هەوڵ و تێكۆشانی ئەویش دیارە،ئەگەر قبوڵ نەبوو، بزانە تۆش دیكاتۆرێكی بێ‌ دەسەڵات زیاتر نیت.

ئەی باسی فرەیی و دیمكراسی چیم بۆ ئەكەی كاكی فەیلەسوف؟!