با هەڵە تێگەشتنەكانمان ڕاست كەینەوە...!

ه‌مومان جاربەجار بەسەرمان هاتوە كە وادەزانین ئەو كارەی دەیكەین دیوە ڕاستەقینەكەی دینەو, كارەكەی خۆمان زۆر لا پەسەندەو دڵمان پێ ی خۆشە, هەربۆیە جاربەجاریش وەك شانازیەك لەكۆڕو كۆبونەوەو لای برادەرەكانماندا باسی دەكەین, ئەوەی من مەبەستمە بیڵێم ئەوەیە كە ئایا بەڕاستی ئەو كارەی كە كردمان دیوە ڕاستەقینەكەی دینە یان هەڵەین و ناگەڕێین بۆ ئەوەی هەڵەكەی خۆمان دەستنیشان بكەین و خۆمان بخەینەوە سەر هێڵە ڕاستەكە, لێرەدا نمونەیەكی واقیعی ئەگێڕمەوە:

ڕۆژێك سواری پاس بوم بۆ یەكێك لەشارەكان, لەنێو پاسەكەدا تەنها چەند كەسێكی لێبو, زۆربەی كورسیەكان بەتاڵ بون, من و دو نەفەری تر لەدواوە دانیشتبوین كە یەكێكیان كوردی ڕۆژهەڵات بو, ئەوان لەنێو خۆیاندا دەستیان بەگفتو كردبو باسی بارو دۆخی ئابوری و ئاینی و سیاسیان ئەكرد لەناو هەرێم و ئێراندا, دواتر كەوتنە باسی مرۆڤی چاك و خراپ و كاری باش و كاری خراپ, هەروەها باسی ویژدانی پاك و یارمەتیدانی هەژاران و....هتد.

پاش ماوەیەك منیشیان ڕاكێشایە ناو گفتۆكەیان, یەكێكیان باسی هەڵوێستێكی خێرخوازانەی خۆیی كردو وتی: ڕۆژێك لەبازاڕ گەڕامەوە بۆ ماڵەوە هەندێك خواردەمەنیم كڕیبو بۆ ماڵەوە, كاتێك نزیك بومەوە هەستم كرد كە دراوسێەكمان زۆر هەژارن و منیش ویژدانم جوڵاو تەقەم لەدەرگای ماڵەكە داو هەموو كەلوپەلەكانم پێدان, ماڵەكە زۆر دڵخۆش بون و خۆشم زۆر دڵم خۆشبو دوعای خێری زۆریشیان بۆ كردم..!!

من و پیاوە ڕۆژهەلاّتیەكە وتمان: وەڵا ئافەرم دەست خۆش خوای گەورە خێرت بنوسێ بەڕاستی هەڵوێستێكی جوان و مەردانەت نواندوە...!

ئەو لەقسەكانی خۆی بەردەوام بو وتی: تۆ سەیركەن خوای گەورە چۆن خێرا پاداشتی دامەوە..!!؟

وتی: چەند هەنگاوێك لەماڵەكە دوركەوتمەوە سەیر ئەكەم بڕێك پارە كەوتوە, منیش هەڵم گرتمەوەو ژماردم ئەزانم سێ قاتی ئەو پارەیەبو كە كەلوپەلەكانم پێكڕیبو, بۆیە خێرا خستمە گیرفانمەوەو وتم خوایەگیان سوپاس بۆتۆ, خوایە نەیبڕی بەڕاستی زوو پاداشتی چاكەكان ئەدەیتەوە..!!

من خێرا وتم: هەر بەڕاست تۆ پێت وایە ئەو پارەیە پاداشتی خۆتەو هەڵت گرتەوە؟ وتی: بەڵێ...!

وتم: برام ئەو پارەیە هی تۆ نیەو خاوەنی هەیە, بەڕاستی ئەوە هەڵەی زۆربەی موسوڵمانانە! وتی: بۆ كاكە لەبەرچی؟ وتم: دەی برا چۆن پارەیەك هەڵ ئەگریتەوەو خەرجی ئەكەیت بۆخۆت كە هی تۆ نیە!؟ چۆن بیرت لەوە نەكردۆتەوە كە خوا تاقیت ئەكاتەوە؟ پاشان وتم, براگیان زۆربەمان هەمیشە تایەكی ترازوەكەمان لەنگەو بەدڵی خۆمان تەئویل و تەفسیر ئەكەین, تۆ كارێكی باشت كردوە كە خێرت كردوە, بەڵام لەهەمانكاتدا هەڵەیەكی گەورەشت كردوە كە پارەیەكت بەهی خۆت زانیوە كە خاوەنی هەیە, ڕەنگە هی ماڵە هەژارێك بوبێت و ویستبێتیان پێداویستیەكی پێ بكڕن بەڵام لێیان ونبوە, تۆ پێویست بو لەسەرت بڕۆیت و هەوڵ بدەیت خاوەنەكەی بدۆزیتەوەو پارەكەی بۆ بگێڕیتەوە, نەك وەك پاداشتێكی خوایی لێ ی بڕوانیت و بیخەیتە گیرفانتەوە,پاش كەمێك هەستی كرد كارەكەی دوەمی هەڵەبوەو وتی دەست خۆش وەڵا ڕاست ئەكەی...!!

لەم چیرۆكەوە ئەوە ڕون دەبێتەوە, با بیهێنینە پێش چاوی خۆمان ئەگەر هاتو تێگەیشتن و بیرۆكەیەكی لەم شێوەیە بكرێتە پرۆژەیەكی گەورەو ڕێكخراو ئەبێت چ كارەساتێك بخوڵقێنێت, زۆرجار ئەم جۆرە هەڵە تێگەشتنانەو هاوشێوەكانی بونەتە پرۆژەی گەورەو بەناوی ئیسلام و چاكەخوازیەوە گەشەیان كردوەو زیانی زۆریان لەدینەكە داوەو پڕۆژە ڕاستەقینەكانیان پەك خستوە, باجەكەشی خەڵكی ئایندارو خێرخوازو چاكەخواز داویانە, نمونەش زۆرن لەوانە:( تاڵیبان و قاعیدەو بۆگۆ حەرام و داعش و...هتد) بەرهەمی هەڵەتێگەشتنن لەدین, هەر بۆیە تەتەڵە كردنی هەڵوێست و بڕیاڕەكان پێویستیان بە وریایی و شرۆڤەكردنی پێشوەختە هەیەو نابێت دەمارگیری و هەست و سۆزو دڵسۆزی نابەجێ, یان نمایش كردنی كارو كردەوەكانمان و داپۆشینیان بەبەرگێكی خێرخوازی و نیەت پاكی و چاكەخوازی ببێتە هۆی لەكەدار كردنی ئاینەكەمان, هیچ پێویست بەخۆ سەغڵەت كردن ناكات( لایكلف الله نفسا الا وسعها) خوا هەر ئەوەی لێمان ئەوێت كە لەتواناماندایە بەچاكی و بەپاكی بیكەین وەك خۆی بەبێ زیاد و كەم.

كەواتە با هەڵەتێگەشتنەكانمان ڕاست كەینەوە پێش ئەوەی ببێتە پرۆژەی گەورەو زەرەرمەند بۆ ئاین و كۆمەڵگە.