ئایا خەونی لە مێژینەی گەلی كورد ئەم جۆرە پەرلەمانە بو؟؟؟.

لە دانیشتنە ئاسایی و نائاساییەكانی پەرلەمانەوە كە خۆشبەختانە لە ڕاگەیاندنەكانە پەخش دەكرێت، گوێ بیستی هەندێ كار و یاسا و بڕیار و هەڵوێست و وشەو و دەستە واژەی پەرلەمانی خۆشەویستی خەونی دەیان ساڵەی گەلی كورد دەبین جا نازانیت بگریەیت یان پێبكەنیت.
ئاخر بەڕێز سەرۆكی پەرلەمان داتاشیان و داهێنانی وشەو دەستەواژەی نوێ كەی كاری پەرلەمان و پەرلەمانتارە، بۆچی كار و ئەركی خۆتانتان لەبیر چۆتەوە؟ یان لەبیرتان براوەتەوە!
دەزانن كاری هەنوكەیی ئێوە چیە؟
- حەقە وەزیری نەوت بانگهێشتی پەرلەمان بكەن بزانن ئەو قەرزانەی كۆمپانیاكانی نەوت لەسەر هەرێم چەندە و چۆنە و بۆچی قەرزارین؟
- كارێكیترتان بانگهێشتی وەزیری داراییە، كە ئەخۆ حكومەت چەند قەرزاری بانكە بیانی و ناوخۆكان و بەڵێندەران و موچەخۆرانی خۆیەت؟ دەیەوێت كەیی چۆن ئەو قەرزانە بداتەوە؟؟؟
لە دواین لێدوانی وەزیری دارایدا هاتوە كە حكومەت تەنها 8 موچەی موچەخۆرانی هەرێم قەرزارە، ئایا ئەوە هەر بەڕاستیەتی یان خەڵكی بە گێل دەزانن، ئەوە كاری ئێوەیە ئەو هەڵەیە ڕاست بكەنەوە.
- وەزیری نەوتی عێراق دەڵێت حكومەتی هەرێم دەبێت ڕۆژانە 200000هەزار بەرمیل نەوت وەك شایستە داراییەكان بداتەوە بە كۆمپانیاكانی وەبەرهێنانی نەوت، بپرسن ئەمە بۆچی و تاكەی؟
من بە پەرلەمانی كوردستان و پەرلەمانتارە بەڕێزەكان دەڵێم گەر توانیتان دەست بۆ ئەو دۆسیانە ببەن ئەوە ئێوە شایستەی دەستخۆشی و ڕێز و جێی شانازی دڵ خۆشی جەماوەری كوردستان دەبن.
بەڵام دیارە لە دنیای مۆدێرنەدا كارێكی نوێ بۆ پەرلەمان زیاد بوە ئەو خەڵكە عەوامەی وەك ئێمە ئاگامان لێی نیە، ئەویش داهێنانی زاراوە و دەستەواژەی نوێیە!!! ئیتر نازانم ناوەندە ئەكادیمی و زانكۆكانی كوردستان كاریان چییە؟!
كارەكانی پەرلەمانی كوردستان هیچ نەبێت لەم خولەدا دیار و ڕونن، یەكەم متمانەدان بو بە كابینەی نۆ ی حكومەتی هەرێمی كوردستان و دەركردنی یاسای لاوەكی، ئیتر شتێك بەناوی پەسەندی بودجە و بانگهێشتی بەرپرسانی حكومی و لێ سەندنەوەی متمانە شتێكی وا لە گۆڕێدا نیە!!! گەر ئێوە بەم جۆرە كارانە دڵتان خۆش بكەن و هەر وا بەردەوام بن ئایا هیچ گۆڕانكاریەكی ئەرێنی وەدی دێت؟؟؟
بۆیە حەق نیە ئیتر دەست بەتاڵی وەكو ئێمەش ڕەخنە لە كارەكانتان بگرین.