دایانمەخەن، چاكیان بكەن

 لەو ماوەیەدا هەواڵی داخستنی چەند كارگەیەكی ناوخۆ لە چەند ناوچەیەكی جیاجیا بڵاوبوویەوە، دیارە ئەوەش نیگەرانی لای من و بەشێكی زۆری ئەو خەڵكە دروست كرد كەوا خۆشەویستیان بۆ بەرهەمی ناوخۆ هەیە.

داخستنی ئەو كارگانە لە كاتێكدایە زۆربەی خەڵك داوای زیادكردنی بەرهەمی خۆماڵی دەكات و باس لە بایكۆتكردنی كاڵای بیانی دەكەن و ئاڕاستەیەك دروست بووە بۆ ئەوەی كاڵا و كەلوپەلی خۆماڵی جێگرەوەی كاڵا و كەلوپەلی هاوردە و بیانی بگرێتەوە.

دەكرێت لەبەرامبەر پێشێلكاری كارگە خۆماڵیەكان سیاسەتێكی تایبەت بگیرێتەبەر، ئەویش لە بڕی داخستنیان چاككردنیان و پێدانی كات بێت بۆ لابردنی كەمووكوڕیەكانیان، ئەمەش بۆ ئەوەی دانەخرێن و هەواڵی داخستنیان خەڵك دڵتەنگ نەكات.

بێگومان ئەگەر بەشێكی هۆكاری داخستنی هۆكاری كارگە خۆماڵیەكان بۆ لایەنی پێوەندار بگەرێتەوە بۆ هەبوونی كەمووكوڕی و سەرپێچی، ئەو هۆكارێكی تریش هەیە نابێت لەبیر بكرێت ئەویش هاوكاری نەكردنی كارگەكانە لە لایەن حكوومەت و دامەزراوە پێوەندارەكان، بۆ نمونە زیادكردنی نرخی كارەبا بۆ 5 بەرامبەر نرخی پێشووی، یان زیادكردنی باج و رسومات.

بەراورد بە كارگە گەورەكانی وڵاتانان كارگە خۆماڵیەكانی ئێمە ساوان و تەواو لەسەر پێی خۆیان نەوەستاون، بۆیە دەبێت رەچاوی ئەوە بكرێت هاوكاریان بكرێت و نەهێڵدرێت بكەون.

4 هەزار و 802 كارگە مۆڵەتیان پێدراوە، ئەوانەی کار دەکەن و بەرهەمیان هەیە، ژمارەیان 2 هەزار و 739 كارگەیە، ئەوانەی داخراو و بێكاریشن، ژمارەیان 2 هەزار و 66 كارگەیە،بەشی زۆریان یان داخراون،یان بەرهەمیان وەكو پێویست نیە، هەندێكی تریش مۆڵەتی کارگەیان وەرگرتووە، بەڵام کار بە مۆڵەتەکانیان نەکراوە و كارگەكە بوونی نیە، بۆیە دەبێت دیراسەیەكی ورد بكرێت تاوەكو كێشەكانیان دەست نیشان بكرێت و چارەسەریەكانیشیان بخرێتە بەردەست.

پێویستە حکوومەتی هەرێم و هەمو وەزارەتە پەیوەندیدارەکانی تێکڕای کابینەکە گرنگییەکی زۆر بەوە بدەن کە ئەو مەترسییەی لەسەر ئاسایشی خۆراک هەیە نەیهێڵن، ئەویش بە شێوەیەک بتوانین بەرهەمە خۆماڵییەکان زیاد بکەین و هانی جوتیارەکان بکەین کە بەشداربن لە بە دابینکردنی ئاسایشی خۆراک و پێداویستییەکانیان بۆ دابین بکەین و ساغکردنەوەی بەرهەمەکانیشیان لە بازاڕدا گەرەنتی بکەین.

كاتێك ئێمە رێگری دەكەین لە داخستنی كارگە خۆماڵیەكان ئەوە دەرفەتی زیاتر دەدەین بە زیادكردنی هەلی كار و زۆر كردنی بەرهەمی ناوخۆیی و رێگری كردن لە بردنە درەوەی سامان و داهاتی نشتیمانیمان.