وەڵامێكی كورت بۆ یونس ڕاوی

  سێ شەممە, 20 حوزەیران 2017 08:18

 

 


ماوەیەكە لەكەناڵە ڕاگەیاندنەكانەوە بە مەبەست بێت یان بێ‌ مەبەست بەناوی خوێندنەوەی نوێ‌ بۆ چەمكە ئاینیەكان و نوێ بونەوەی ئاینەوە دەست بۆ هەموو پیرۆزیە كانی ئاین دەبرێت، وەنەبێت ئەمەش لەلایەن كەسانی پسپۆڕەوە بێت، بەڵكو كەسانی ناشارەزاش لە لەزمانی عەرەبی پەنای بۆ دەبەن ، نزیكترین نمونەش بەڕێزێكە بەناوی (یونس الڕاوی)، كە لە دیمانەیەكی تەلەفزیۆنیدا وتیان( ئەوە خودی جەستە نییە كە دەخرێتە بەهەشت یان دۆزەخەوە، بەڵكو ئەوە ڕۆحی مرۆڤەكانە دەخرێتە بەهەشت یان دۆزەخ)،

      قال تعالى(وَقَالُوا لِجُلُودِهِمْ لِمَ شَهِدتُّمْ عَلَيْنَا ۖ قَالُوا أَنطَقَنَا اللَّهُ الَّذِي أَنطَقَ كُلَّ شَيْءٍ وَهُوَ خَلَقَكُمْ أَوَّلَ مَرَّةٍ وَإِلَيْهِ تُرْجَعُونَ) فصلت(  21)
(ئەوكاتەی ئەو دۆزەخیانە بەپێستی خۆیان دەڵێن ئەوە بۆچی شایەتیمان لەسەر دەدەن، ئەوانیش دەڵێن ئەو خوایەی كەدەتوانێت هەموو شتێك بهێنێتە گۆ ئێمەشی هێناوەتەگۆ، چونكە هەر ئەو زاتە لەسەرەتاوە دروستی كردوین و گەڕانەوەشمان هەربۆ لای ئەوە).

قال تعالى(إِنَّ الَّذِينَ كَفَرُوا بِآيَاتِنَا سَوْفَ نُصْلِيهِمْ نَارًا كُلَّمَا نَضِجَتْ جُلُودُهُم بَدَّلْنَاهُمْ جُلُودًا غَيْرَهَا لِيَذُوقُوا الْعَذَابَ ۗ إِنَّ اللَّهَ كَانَ عَزِيزًا حَكِيمًا) النساء(56(
(بەڕاستی ئەوانەی باوەڕیان نەهێناوە بە ئایات و فەرمودەكانە ئێمە، لە ئایندەدا دەیانسوتێنین بە ئاگری دۆزەخ، هەموجارێك كە پێستیان سوتاو هەڵقرچا، پێستیتر دەكەین بەبەریاندا بۆ ئەوەی بەچاكی سزا و ئازار بچێژن، بەڕاستی خودا هەمیشەو بەردەوام باڵادەستە).

قال تعالى (الْيَوْمَ نَخْتِمُ عَلَىٰ أَفْوَاهِهِمْ وَتُكَلِّمُنَا أَيْدِيهِمْ وَتَشْهَدُ أَرْجُلُهُم بِمَا كَانُوا يَكْسِبُونَ، يس (65( 
(ئەمڕۆ مۆر دەنێین بە دەمیاندا و قسەیان بۆ ناكرێت، بەڵكو دەستیان قسەمان بۆ دەكات، قاچیشیان شایەتی دەدات بەو كار و كردەوانەی كە ئەنجامیان دەدا) یس 65 .


ئەگەر وایە ئەی وەڵامی بەڕێزیان بۆ ئەو سێ‌ ئایەتە پیرۆزەی قورئان چییە كە بە ئاشكرا و بەبێ‌ پێچ و پەنا باسی سزا و شاهێدی جەستەیی مرۆڤە بێ‌ بڕوا و خراپەكاران دەكات لە دۆزەخدا؟ ئایا رۆح لەئەندامی جەستە و پێست پێكهاتووە یان نا؟ ئایەتەكان هێندە ڕونن هیچ تەفسیرێكیتر هەڵناگرن بە ناوی مەجازی بونی واتاكانی قورئانەوە، ئەو سێ‌ ئایەتە پیرۆزە ئەوەمان پێ‌ دەڵێت ئەوانەی كەدەچنە بەهەشت یان دۆزەخەوە خودی مرۆڤەكانن بەجەستە و رۆحی خۆیانەوە نەك تەنها رۆحەكانیان.


هیوادارم بەڕێزت و ئەوانەی وەك جەنابت خەریكی شێواندنی چەمكە پیرۆزەكانی ئاینی ئیسلامن دەست لەو كارانە هەڵبگرن و بەناوی نوێگەری و خوێندنەوەی نوێ‌ بۆ ئیسلام و تەفسیری نوێی بۆ زاراوەكان ، ئیتر خۆتان لەكەدار نەكەن.