ڤایرۆسی كۆرۆنا و تێگەیشتنێكی سەقەت و تێڕوانینی دروست

 

 

دوای تەشەنەسەندنی ڤایرۆسی كۆرۆنا لە وڵاتی چین لە كۆتایی مانگی یەكی ئەمساڵ (۲۰۲۰ز)، لە یوتیوب و فەیسبووكدا ژمارەیەك وتارو پۆستی پڕ هەڵەو ناتەواویم بینی، بە داخەوە هەندێكیان ئەو ڕووداوەیان پەیوەست كردووە بە باسی ئاین و ستەم و غەزەبی خواو كوفرو ئیمانەوە، تەنانەت هەندێ كەس ئایەت و فەرموودەشیان بۆ دۆزیوەتەوە..
بۆیە بە ئەركی خۆمم زانی كە ئەم ڕاستكرنەوەیە لە (۱۰) خاڵدا عەرز كەم:
یەكەم/ وڵاتی چین دەیان ساڵە ستەم دەكات لە موسڵمانانی وڵاتەكەی، بە تایبەتی لە نەتەوەی موسڵمانی (ئۆیغۆریی)و ئەو ستەمە كاری ئەمڕۆو دوێنێی نیە.
دووەم/ هەرگیز ستەمكاریی چینییەكان كەمتر نەبووە لە ستەمەكانی سۆڤیەتی جاران لە ئەفغانستان و صیربەكان دژی بۆسنییەكان و ڕوسیای ئەمڕۆ لە سوریاو بەریتانیاو ئەمریكا لە هەموو جیهانی ئیسلامیدا، یان ستەمی ڕژێمە دیكتاتۆرە بە ناو موسڵمانەكان دژی نەتەوەكانیان.
سێیەم/ ئەو كەسانە بیریان نیە یان نازانن كە خوای گەورە ژمارەیەك سوننەت و یاسای گەردوونیی هەن، كە تەنها بە ویستی خوا دەسووڕێن، یەكێك لەو سوننەتانە پەیوەندیی بە بواری دەردو دەرمان و نەخۆشیی و هۆكاری نەخۆشیی و چارەسەرەوە هەیە. هەموو جارێك ئەو سوننەتانە پەیوەندییان بە كوفرو ئیمان و تۆڵەی خواییەوە نیە.
چوارەم/ ئەو كەسانە چی ئەكەن لە دەیان دیاردەی نەخۆشیی و لافاوو برسییەتی و قەحتیی و بێ بارانیی.. كە ڕوو دەكەنە خەڵكی بێ تاوان و ناوچەی موسڵمان نشین؟ تەنانەت لە سەردەمێكی نموونەیی وەك دەسەڵاتی پڕ دادپەروەریی خەلیفە عومەری كوڕی خەتتابدا، وەبای تاعون هەزاران كەسی كوشت، (واقدی باسی لە ۲٥ هەزار كەس كردووە)، بگرە چەندین صەحابەی پایە بەرزیشی كوشت، وەك: ئەبوعوبەیدەی جەڕڕاح و مەعازی كوڕی جەبەل و ئەبو جەندەل و .. هتد.
پێنجەم/ ئەوەی سەلماوە ئەوەیە كە غەیری خوا كەس نازانێ كامە دەردو دیاردەی كارەساتبار بەڵاو تۆڵەیەو كامەیان تاقیكردنەوەیەی خوایی یە؟ بۆیە نادیدەگرتنی سوننەتە خواییەكان و لەخۆڕا تەفسیرو ڕاڤەكردنی دیاردە گەردوونییەكان، هەڵەیەكی مەنهەجیی گەورەیە. ئەوە خوای گەورەیە كە لە قورئانی پیرۆزدا ئاگاداری كردووین كە بەردبارانی تەیرە ئەبابیل بۆ قورەیش و تۆفانی نوح و سەنگبارانی قەومی لوگ و ڕەشەبای سەڕسەڕی قەومی عادو ناڵەو نركەی سەر قەومی صالح و..هتد تۆڵەی خوایین، وەگەر نا هەموویان لە ئاقارو ڕیزبەندیی سوننەتە خواییەكان بەدەر نین. بۆیە جیاكردنەوەیان تەنها كاری خوایە، نەك ئێمە، ئەگەر ئەو باسی نەكردنایە كە تۆڵەن، هەرگیز نەماندەزانی ئەوەیەو وا تەفسیر نەدەكران. بۆیە ئەگەر( كۆرۆنا)یش - یان هەر شتێكی تری هاوشێوە - لە حەقیقەتیشدا تۆڵەو سزا بێت، ئەوە بۆ ئێمە نیە وا تەفسیری بكەین تا دڵنیا نەبینەوە، دیارە سەرچاوەیەكی وەحی دڵنیاكەرەوەشمان لەو بارەیەوە نیە.
شەشەم/ ئەی ئەو كەسانەی كە لە گۆترە ئەو تەفسیرانە دەكەن، چی ئەكەن لەوەی هەزاران ئەفریقی چەوساوە لە برسا دەمرن و تاوانیشیان نیەو هەقخۆرە نانبڕەكانیشیان زرت و زیندوو دەسووڕێنەوە؟ یان دەیان ڕژێمی ملهوڕ جۆرەها ستەم دەكەن و تا بێت مل ئەستوورتر دەبن؟ یان دەیان ناهەقیی دەكرێن و هیچیش ڕوو نادات؟
بۆیە جۆرو كات و شێوەو ناونانی ئەو ڕووداوانە بە (غەزەب و تۆڵەی خوایی) یان (تاقیكردنەوەی خوایی و خەڵات)، تەنها كاری خوایەو كاری ئێمە نیە، تا دڵنیا نەبینەوە.
حەوتەم/ دیارە ئەم بۆچوونە لە بنەڕەتدا پێچەوانە نیە لەگەڵ یەكێك لە سوننەتە خواییەكان كە: خوا تۆڵە سێنەو لە كاتی خۆی و شوێنی خۆیداو بە چۆنییەتییەك كە خۆی دەیەوێت، تۆڵە دەستێنێت لە ستەمكاران و ملهوڕان. لەم پۆستەدا باس لەوەیە كە ئێمە بۆمان نیە ناو لە (مصادیق)و نموونەكان بنێین، واتە ڕیزبەندییان بكەین و كاری دابەشكاریی بكەین.
ئەم ئیشكالییەتە لە ناو هەندێك لە موسڵمانە مولتەزیمەكاندا بەدی دەكرێت، بۆ نموونە: كەسێك كەسێكی خۆش دەوێت، كە ئەو خۆشەویستەی تووشی نەخۆشییەك دەبێت، دەڵێت: خوا خۆشی دەوێت و ئەو دەردە تاقیكردنەوەیەو كەفارەتی گوناهەو ڕەفعی دەرەجاتە!! لە كاتێكدا هەمان كەسی نەخۆش، كەسێكی تر هەر موسڵمانیشەو مولتەزمیشە، خۆشی نایەت لێی، ئەڵێت: با بیخوات! ئەوە تۆڵەی خوایەو حەقی فڵان شتە ئەیسێنێ و.. هتد. ئەمە چەندی بە چەند؟
هەشتەم/ بەڕێزان! ئەم دیاردەی شەماتەو حەزكردنە بە تۆڵەكردنەوەی خوا لە خەڵكی، پیشەی موسڵمان نیە، ئەوە خۆكردنە بە وەكیلی خوا، تاوانە، ئەم ناونانەی سوننەتە خواییەكان و دابەزاندنی لە زەوی واقیعدا، كاری موسڵمان نیە، لە مەودای زانست و ئاگایی ئەویشدا نیە، بە كورتییەكەی ئەچێتە خانەی غەیب و نابێ كەس خۆی لە قەرەی بدات.
نۆیەم/ ئەوەی لەسەر موسڵمانە لە حاڵەتی بینینی ستەم و ناعەدالەتی ستەمكارانێك لە خەڵكێكی چەوساوە، ئەگەر دەسەڵات هەبێت، هەوڵی ڕێگرتنە لە ستەم و پشتیوانیی لە ستەملێكراوان، ئەگەر دەسەڵاتی فیزیكی نەبوو، ڕێگای تر دەبێتە پشتیوانیی مەعنەویی، كە یەكێكیان دەبێتە دۆعای سەركەوتن بۆ ستەملێكراوان و دۆعای شكست و تیاچوون بۆ ستەمكاران.
دەیەم/ پێویستە موسڵمان حەزو هەواو خۆزگەی خۆی، تێكەڵ بە ڕێساو بنەما ئاینییەكان نەكات و بە شێوەیەكی گشتگیر لە سوننەتە خواییەكانی گەردوون تێبگات.
بەو هیوایەی قورئان و سوننەتی پێغەمبەری خوا (سەلامی خوای لەسەر) بكەینە ڕوانگەی تێڕوانینمان.
خوایە! لە حەقیقەتی چەمكە ئاینییەكان تێمان گەیەنە.
خوایە! هەقی ستەملێكراوان لە ستەمكاران بستێنە..