واعیزەكانی سوڵتان و لایەنگری لە شەیتان!

  چوار شەممە, 21 حوزەیران 2017 13:39

 

دیارە دەسەڵاتداران لە هەر كوێیەك بن شەرعیەت بە دەسەڵاتی خۆیان دەدەن،بەداخەوە بەشێك لەم بەشەرعی ناساندنەش كراوە بە كاری واعیزەكانی سەر بە دەسەڵاتدارە دیكتاتۆر و خوێن مژەكانی خۆرهەڵاتی ناوەڕاست، كە دوور و نزیك بڕوایان بە دین و ئەخلاق و عەدالەت نیە.

ئەم دەسەڵاتدارە دیكتاتۆرانە وەك دێوەزمە یەخەی گەلەكانیان بەرنادەن و ،هەر جارەی بە شێوازێك دەسەڵاتە ناشەرعیەكانیان دەشەرعێنن.لەم بارەشەوە و بۆ شەرعاندنی دەسەڵاتەكانیان زیاتر پەنا بۆ دوو چین و توێژی كۆمەڵگە دەبەن، كە بریتن لە (حاكم و موفتی)یەكان، دیارە دەستگرتن بەسەر ئیرادەی زۆرێك لە حاكمەكان كارێكی قورس نیە ،چونكە كەم نین ئەوانەی بە مەسەلەی ماددە ئیرادەی خۆیان لە دەست دەدەن و حەق پێشێل دەكەن.

بەڵام ئەوەی جێگای داخە و زۆر نائاساییە، بریتیە لەوەی كەسانێك بەناوی دینەوە لایەنگری لە قەتڵ و زوڵم و ستەم بكەن،زۆر بەداخەوە زۆربەی ئەوانەی پلە و پایەی موفتی و ئەندامی مەجلیسی فەتوای وڵاتان وەردەگرن، بە رەزامەندی دەسەڵاتدران دەگەن بەم پلەیە نەك كەفائەت و زانیاری خۆیان.

واعیزەكانی سوڵتان هەرچەند ریشیان درێژبێ‌ و عەمامەكەی سەریان زل و گەورەبێ‌، لەبەر ئەوەی پیاوی دەسەڵاتن،بۆیە خواگیان توزقاڵێك خۆشەویستیان ناخاتە دڵی خەڵكەوە،چونكە خۆیان خۆشەویستی سەرۆكەكانن نەك خوای سەرۆكەكان.

نمونەی بەناو عالم و زانان و موفتیەكانی سەر بەدیكتاتۆرەكان زۆرن، بۆ نمونە ئەوەتا (بەدرەدین حەسون)ی موفتی (ئەسەد) لەسەرەتایی شۆڕشەكەی سوریاوە رایگەیاند پێویستە دایكان و باوكان رێگا نەدەن رۆڵەكانیان بەشداری خۆپیشاندانەكان بكەن چونكە بەشەرع دروست نیە، دوایی بەوەش نەوەستا و كاتێك شۆڕشگێڕان هێزیان كۆكردەوە و جاش و شەبیحەكانی ئەسەدیان لە چەند شوێنێك راماڵی،ئەم جارە فەتوای دا كە ئیتر جیهاد كردن لەسەر هەموو كەسێك واجب بووە و، پێویستە هەركەس توانای چەك هەڵگرتنی هەبێ‌ پاڵپشتی لە (ئەسەد)بكات، ئەگەر كوژار شەهیدە و ئەگەر خەڵكیشی كوشت موجاهیدە!!!(شەوقی ئیبراهیم)ی بەناو موفتی میسر فەتوای دا كە لە كاتی بەجێهێنانی فەریزەی حەج، خەڵك هاندان لە دژی دەسەڵاتەكەی (سسیی)جولەكە زادە دروست نیە و حەج بەتاڵ ئەكاتەوە و حەرامە !!!(عەلی جومعە)ی كۆنە موفتی میسر دوای ئینقیلابەكە فەتویدا كوشتنی ئەوانەی خۆپیشاندان دەكەن دروستە چونكە زیان بە خەڵك دەگەێنن! ،جارێكی تر فەرمووی، داخستنی مزگەوتەكان لە رۆژانی هەینی ئاساییە و، دەكرێ‌ خەڵك لە ماڵەكانیان و لە رێگای تەلەفزیۆنی حكومی گوێ‌ لە وتاری هەینی بگرن و، دوایی هەر لەماڵەوەش نوێژەكانیان بە جەماعەت لەگەڵ تەلەفزیۆنەكەدا بكەن دروستە!!!،دواجار لە ڤیدیۆیەكی دزە پێكراو دەركەوت لەبەردەم سەدان ئەفسەری سوپا و پۆلیس دەڵێ‌ (بەختەوەری بۆ ئەو كەسەی كە ئیخوانەكان دەكوژێ‌ ، خوا لەگەڵ ئێوەیە پێغەمبەر لەگەڵ ئێوەیە، ئەولیاكانی خوا لەگەڵ ئێوەن،لە رێگای خەوێكی راستەوە یەكلابۆتەوە كە پێغەمبەر لایەنگری ئێوە دەكات)دەیان سەیر و سەمەرەی تر ،ئاخر ئەم واعیزە بەكرێ‌ گیراوانە هەم خۆیان قێزەن وون دەكەن، هەم دواجار روو رەشی بەردەم قاپی خوا و سەرشۆڕی بەردەم میللەت دەبن.

لە ئێستاشدا چەند رۆژێكە شێخە وهابیەكانی ئال سعود،لەمەسەلەی (قەتەر)وەك پاڵەوان دەردەكەون و بەم رەمەزانە دەستخۆشی لە قڕكردن و لەناوبردن و برسیكردنی خەڵكی بێ‌ تاوان دەكەن و، دەڵێن ئیخوان لە دین دەرچووە و عەقیدەی ناتەواوە و حیزبایەتی دەكات و،هەوڵدەدات دەسەڵات بگرێتە دەست و لەئەمری حاكمی وڵاتەكانیان دەردەچن، بۆیە موسڵمان نین و هەرچی بەرامبەیان بكرێ‌ شەرعیە.

وەك عەرەب ئەڵێن (بیت القصد)واتا پوختەی مەبەست هەر ئەوخاڵەیە كە ئیخوانەكان لەقسەی حاكمە زاڵمەكان دەردەچن و داوای شوڕش دەكەن بۆ گەڕانەوەی عەدالەت و، لەناوبردنی زوڵم و زاڵم.

بەداخەوە كەسیكی وەك (سودەیس)ی ئیمامی حەرەمی مككە و (عورەیفی) و لەسەرووی هەموشیانەوە پیری ئاخر شەڕ (عبدالعزیز عبدالله)ی بەناوی مفتی سعودیە كە لە لێواری مەرگە ئەڵێ‌ هەرچی ئال سعود بیكەن شەرعیە و، لەسەر بنەمایی دین و عەقڵ و حیكمەت سەرچاوەی گرتوە و لە قازانجی هەموو خەڵكە.ئەو ئال سعودەی كەناڵێكی فەڕەنسی ئاشكرای كرد 80ملیۆن دۆلاریان داوە بە (نەتانیاهۆ) بۆ هەڵمەتی هەڵبژاردن و دووبارە بوونەوە بە سەرۆك وەزیرانی جولەكە.

بە دڵنیایەوە واعیزەكانی سوڵتان دۆڕاوترین كەسی نێو كۆمەڵگەن و، بەرلە هەوو كەس سوكایەتی بەخۆیان دەكەن ئینجا بە عیلم و زانست و دین،واعیزەكانی سوڵتان ئەگەر بڕوایان بەو دینە هەبێ‌ كە ئەوانی تیا بوە بە موفتی و ئەهلی عیلم، پێویستە لە خۆیان بپرسن ئاخر نا حەق بە حەق كردن هەروا ئاسان نیە و رۆژێك لێپرسینەوەیان لەگەڵ دەكرێ‌،راستی ئەوانەی لە ناخەوە بچوكن هەرگیز بە پۆست گەورە نابن،ئەوانەش دۆر بە ناوی دینەوە دەكەن هەرگیز حەق ناچێتە دڵیانەوە،ئەوانەی كەشەیتان و ئەهریمەنەكانیش رازی دەكەن لە خوا بە دوورن و دوور و نزیك تەمسیلی دین ناكەن.

 

سۆران هەستیار

سۆران عبدالله، لە دایك بووی 1973.ئەندامی كارای  سەندیكای رۆژنامەنوسانی كوردستان.ئەندامی یەكێتی رۆژنامەنوسانی نێودەڵەتی.بەشداربووی چەندین خولی جۆراو جۆری بواری رۆژنامەوانی،وەرگێر و شاعیر و پەخشان نووس.شرۆڤەكاری سیاسی،موحەریری هەواڵ لە كەناڵی سپێدە لە ساڵانی پێشوو، نوسەری  بەردەوامی رۆژنامەی یەكگرتوو پێش وەستانی رۆژنامەكە.