ترس له‌ مه‌رگ "كۆڕۆنا" وه‌ك به‌هانه‌ 

"مردن! ئه‌ی بووكی خۆرنه‌وه‌زان 

چه‌نده‌ به‌شه‌رم و ته‌ریق بوونه‌وه‌ خوداحافیزی ده‌كه‌یت،

كاتێك له‌تۆوه‌ فێری قردێله‌ به‌ستانی داره‌بازه‌كان نابین ".

یه‌كێك له‌ ماهیه‌تی عیرفان ومه‌عنه‌وه‌یت ڕه‌واندنه‌وه‌ی ترسه‌ له‌ مه‌رگ، به‌ڵام به‌ومانایه‌ی نا مرۆڤ له‌ گۆشه‌نیگای چه‌مكی ڕه‌شبینییه‌وه‌ بڕوانێته‌ ژیان، به‌ڵكو بریتییه‌ له‌و ئاشته‌واییه‌ی به‌دوای مرۆڤی كامڵه‌وه‌یه‌ تابیگه‌یه‌نێته‌ كه‌ناری ئه‌نیسی خودایی و ته‌واوی قه‌ده‌ره‌كان به‌ ئه‌و ببه‌ستێته‌وه‌،ئیدی باكی به‌ مه‌رگ نه‌بێت.

چونكه‌ كاتێك باڵاخانه‌ی ڕۆحی مرۆڤ دامه‌زراو نه‌بوو به‌ ئیمانێكی زیندوو ئه‌وا شوناسی ئه‌و دیندارییه‌ ون ده‌كات و به‌ سانایی داده‌ڕمێت و ترس له‌ ڤایرۆسێك چۆكی پێداده‌دات دواجار ئه‌م ڤایرۆسی كۆڕۆنایه‌ ده‌بێته‌ به‌هانه‌یه‌ك بۆ ترسان له‌ مه‌رگ! كه‌چی بێ ئاگا له‌وه‌ی قه‌ده‌ری خودا هه‌رچییه‌ك بێت هه‌ر ئه‌و ده‌بێته‌ پێشهات‌. به‌ڵێ خۆپارێزی له‌ هه‌موو نه‌خۆشی وپه‌تایه‌ك ئه‌ركی تاكه‌كانه‌و پێویسته‌ به‌ گرنگییه‌وه‌ڕه‌چاوبكرێت ، به‌ڵام ئه‌مه‌ خۆ مانای وانییه‌ مرۆڤی تۆقیو دروست بكات.

حافزی شیرازی ده‌فه‌رموویێت : "فكر هر كس به‌ قدر همت او هست "

واته‌: فكری هه‌ركه‌س به‌ئه‌ندازه‌ی هیمه‌تی ئه‌وه‌ 

ده‌ی خۆ كۆتایی هه‌موو تونێڵێك ڕۆشناییه‌ كه‌وایه‌ گرنگه‌ ئه‌وه‌ بزانین چۆن مامه‌ڵه‌ له‌گه‌ڵ مردن و چه‌مكی مه‌رگ بكه‌ین به‌ڵام نه‌ك ئه‌وه‌ی ژیانی دوای مه‌رگمان بیربچێته‌وه‌ كه‌ خۆی ئه‌وه‌ ئه‌سڵی بابه‌ته‌كه‌یه‌. ئه‌وه‌ی ئێستا ئێمه‌ كه‌ له‌ ژیانداین و ئه‌زموون ده‌كه‌ین بریتییه‌ له‌ خه‌ونێكی دوورودرێژ.. كه‌ی مردین ئه‌وكات بێدار ده‌بینه‌وه‌!

پرسیاره‌كه‌ ئه‌وه‌یه‌ ئایا ئێمه‌ ئه‌وه‌نده‌ی حیساب بۆ مه‌رگ ده‌كه‌ین؛ حیساب بۆ ئه‌و دیوی مه‌رگ ده‌كه‌ین ؟

عه‌بدوڵا په‌شێو ده‌ڵێت : " مردن مادام تۆ هه‌ردێی 

ڕۆژێكی ئاوا وه‌ره‌ خۆم بۆلات به‌ڕێوه‌بم

ڕۆژێكی ئاوا وه‌ره‌ 

گڕم دانه‌مركابێ 

سه‌ر به‌رزو به‌ پێوه‌ بم"

كه‌وایه‌ ئه‌وه‌ش بزانین ژیانێك پڕبێت له‌ مه‌رگی واتایی و شكاندنی شكۆی مرۆڤبوون و نادادی و درزی ڕۆحی ئیدی مردن خۆی له‌ خۆیدا ڕزگاربوونێكه‌ بۆ دنیایه‌كی ئارام و له‌بننه‌هاتوو...