یەکگرتوو..خەمخۆری خەڵک و نیشتمان

  هەینی, 14 تەمموز 2017 05:50

یەکگرتوو چ وەک نەهج و ڕێباز،یان وەک هەڵوێست وڕەفتار؛ نەڕقی لەکەسەو نەکۆنەقینی هەیە..

بۆیە لەپێناو بەرژەوەندی خەڵک و خاکدا ،هەرگیز سڵ لەسەردانی هیچ لایەک ناکاو گفتوگۆ بە دەرگای چارەسەری هەموو گرفتەکان دەزانێت. یەکگرتوو خۆی بڕیاردەدات و فەرمانی ئەملاو ئەولای قبوڵ نیە ،بۆیە
ـ ئەگەرچی خۆی بەشێکە لە هاوکێشە سیاسیەکەی کوردستان ـ بەڵام بۆ بەیەک گەیاندن و کۆکردنەوەی هێزو لایەنە سەرەکیەکان و ڕێککەوتن لەسەر خاڵە هاوبەشەکان و کۆتاییهێنان بەکێشەکان ، دەیەوێ ڕۆڵی خێرو ئیجابی و حیادی بگێڕێ و خۆی تەسلیمی هیچ لایەک نەکات .. لەمەشدا یەکگرتوو چاوەڕێی پاداشتی کەس نیەو وەکو مەبدەئو قەناعەت،ئەم ئەرکە ئەنجام دەدا..
لەوانەیە بەحوکمی ئاڵۆزبوونی ڕەوشەکەو کزبوونی متمانەی نێوان و تێکەڵبوونی ڕاستی و ناڕاستی بەیەک، ئەم ڕاستیانە ئەمڕۆ بۆ هەموان بە جوانی دەرنەکەون؛بەڵام بەدڵنیاییەوە لە ڕۆژانێکی نزیکدا بەڕوونی دەر ئەکەون.
ئەمینداری گشتی یەکگرتوو کاتێک کە بە وردی تەماشای ڕەوشەکەو ئەگەرو پێشهاتەکان دەکات ، ناچێتەوە سەرئەوەی کە دوێنێ ئەندامان و کادیرانی فڵانە لایەن چ هەڵسوکەوتێکیان بەرامبەری نواند،یان بەرپرسانی فڵانە حیزب چۆن یەکگرتوو تۆمەتبار ئەکەن،یان پێرێ چۆن کادیرە پێشکەوتووەکانی یەکگرتوو لەلایەن کادران و لایەنگرانی فلانە حیزبەوە شەهید کران و بارەگاکانی سوتێنران ؛ چونکە هەریەک لەوانە لەکاتی خۆیدا هەڵوێستیان لەسەر وەرگیرا ، بۆیە ناکرێ هەتا هەتایە ئەو زامانەی ڕابوردوو، هەر زوخاویان لێ بتکێ ؛ بەڵکو بەلای یەکگرتووەکانەوە، پێویستە داهاتووی گەلو وڵات نەکەینە قوربانی هەڵەو پەڵەکانی دوێنێ و چیتر گەلی ماندوی بەشمەینەتی کوردستان لە نائومێدی و چاوەڕوانیدا نەهێڵینەوە.
ئەمەش لەڕاستیدا لەخۆبوردەیی و هەوڵی بێوچان و کۆڵنەدانی دەوێ ؛ بێگومان بەرپرسیاریی بەردەم خواو خەڵکی خواش،ئەوە دەخوازێ.

حامد محەمەد عەلی

حامد محمدعلی لەدایكبووی 1960 خانەقین دەرچووی زانكۆی بەغدا ـ كۆلیژی ئەدەبیات ـ بەشی ڕاگەیاندن.. ماستەر لە ڕاگەیاندن و ڕۆژنامەگەریی لە زانكۆی سانت كلیمێنتس ـ ئۆنلاین ..ئەنامی دەستەی دامەزرێنەرو سكرتێری پێشووی سەندیكای ڕۆژنامەنوسان . لەساڵی 1985 وە لە بەغدا دەستی بەنووسین و بڵوكردنەوە كردووە بە عەرەبی و كوردی.. سەرنوسەری ڕۆژنامەی یەكگرتوو لە 1999ـ 2005 . بەشدارێكی كارا بووە لەداڕشتنی پڕۆژە یاساكانی سەندیكای ڕۆژنامەنووسان و ڕۆژنامەگەریی لە هەرێمی كوردستان .. بەشداریی لەدوو كۆنگرەی ڕاگەیاندنی ئێراقی كردووە لە بەغدا 2005 و لە پاریس 2007 .هەروەها بەشداری لە دووكۆنگرەی فیدراسێونی نێودەوڵەتی ڕۆژنامەنووسان كردووە لە ڕوسیاو لە ئەسپانیا لە 2007 و 2010..چەند نامیلكەیەكی چاپكراوی هەیە لەبواری جیا جیا ..