یەك كلتور و عەقڵیەت ، بە دوو ڕەنگ و لە دوو زۆنی جیاوازدا

ڕەنگە ڕاجیایی هەبێت لە دەست نیشانكردنی ڕێگە و وێستگەكانی گەیشتن بە كۆمەڵگەیەكی دیموكراس و پێشكەوتوو، و لەباسی ئەولەویەت و ڕیزبەندی ڕێكار و قۆناغ و هەنگاوەكاندا زیاتر لە بۆچوونێك هەبێت، بەڵام هیچ گومان لەوەدا نیە و بگرە كۆدەنگی و هاوڕایی هەیە لەسەرئەوەی (دابەشكردنی كۆمەڵگە بەسەر ڕەش و سپیدا، و دروشمی یان لەگەڵمیت یان دژمیت، و قبوڵنەكردنی ڕای بەرامبەر، و لۆژیكی لەگەڵم بیت نیشتمان پەروەریت و لەگەڵم نەبیت خائین و نیشتمان فرۆشیت....) زەقترین سیمای كۆمەڵگە داكەوتوو و دۆگماكانە و مایەی گەڕانەوەیە بۆ دواوە و لەباربەری هەموو هەوڵێكە كە بۆ دیموكراتیزەكردن و گەشەپێدانی كۆمەڵگە ئەنجام دەدرێت، بەخوری كردنەوەی ڕێسی چالاكوان و خەباتكارانی مەدەنیەت و ژیانی ژیارییە .
ئەو عەقڵەی كۆمەڵگە دابەش دەكات و هەڵدەستێت بەهێنانی هیڵی سور بەسەر ئەو بەشەی كەلەگەڵ بۆچوون و تێزەكانی ئەودا نایەتەوە و بەجۆرێكی دیكە بیردەكاتەوە، لە هەر كوێ بێت و لەهەر لایەنێكەوە بێت كارێكی نا ئەخلاقی و نا عەقڵانی و نا مەنتقیە و دژە بە سەرەتاییترین چەمكەكانی دیموكراسیەت و مافەكان، ئەو عەقڵە ترسناكە هیچ مبڕیڕێكی نیە و نیازێكی زۆری بە چەكوشكاری و پاكلەمەیەكی باش هەیە .
پێشتر بینیمان كە چۆن لایەنگرانی ڕیفراندۆم ئەوانەیان بە خائن و خۆ فرۆش لەقەڵەم دەدا كە لەگەڵ ڕیفراندۆم نەبوون، بەهەمان شێوە دژە ڕیفراندۆمەكانیش بە شێوەیەكی سووك و بە قسەی ناشرین و گاڵتەوە ڕوبەڕوی لایەنگرانی ڕیفراندۆم دەبوونەوە، تازەترین ڕوداوی ئەم دواییە، ئەوەبوو پاش چاوپێكەوتنی كەناڵی ئێن ئاڕتی لەگەڵ ئیسماعیل حەمە خورماڵی (بڕیاردەری كۆمسیۆنی باڵای سەربەخۆی هەڵبژادنەكانی هەرێم) ڕویدا لەسەر ئەوەی كە ووتبوی ئێمە ئامادەكاریمان كردووە بۆ ڕیفراندۆم و پەڕلەمان مەرجەعی ئێمە نیە بەڵكو تەنها چاودێری ئێمە دەكات و ئێمە ئیعازی خۆمان ڕاستەوخۆ لەسەرۆكی هەرێمەوە وەردەگرین، ئیتر هەنێك هەڵسوڕاو و گەنجی بزوتنەوەی گۆڕان كە كادری باڵاشیان تێدایە كەوتنە وێزەی و خۆی و حیزبەكەیان بە بەشدار لە نەهامەتیەكانی كوردستان لەقەڵەمدا و بە چەندین پۆست و كۆمێنتی ناشیاو و بازاڕیی كەوتنە ناوزڕاندنی (ئیسماعیل حەمە) و بە جاشی پارتی و پاشكۆ و خیانەتكار و هتد... لەقەڵەمیاندا و وێنەكەیان بە جامانەی سورەوە بڵاوكردەوە، بەبێ ئەوەی بیر لەوە بكەنەوە كە پێكهاتەی كۆمسیۆن لە هەموو حیزبەكان پێكهاتووە (بەخۆشیانەوە) و سەرجەمیشیان بە واژۆی ئەو مسعود بارزانیە دەست بەكاربوون كە ئەوان دەڵێن شەرعیەتی نەماوە و ماوەی ویلایەتەكەی بەسەر چووە.!
لێرەدا نامەوێت باس لەو گەنجە خوێن گەرمانە بكەم كە خۆیان لێ بوەتە پاڵەوان و شۆڕشگێڕی ئەو شەڕە نزمە، بەڵكو دەمەوێت قسە لەسەر ئەو خەڵكە بكەم كە پێی وایە (ناوزڕاندن و تشهیر و یەكتر قبوڵنەكردن و بە ڕەش و سپی بینینی كۆمەڵگە) دووجۆر و شێوازی هەیە، یەكێكیان ئاسایی و یاساییە، ئەوی دی دیكتاتۆریەت و بەربەریەت و چەقبەستووییە.!! بێ ئاگا لەوەی ئەو كلتور و ئەقڵیەتە سەقەتە تا دوا ڕادە لێكچوو و هاشێوەیی یەكدین و تاسەر مۆخ نامۆن بە سەرەتاكانی دیموكراسیەت و قبوڵكردنی ڕای جیاواز، و خودی ئەو عەقڵیەتە و كارەكە زاتەن هەڵەن، ئیتر ناكرێت و هەڵەیەكی مەنهەجیە بۆ لایەنێك بە هەڵە و عەیبە دابنرێت بەڵام بۆ لایەنێكی دیكە حەڵاڵ و ئاسایی بێت و بیانوی هەبێت.
هەر كەس و لایەنێك كاری ناوزڕاندن و تەشهیر و قسەی سووك و بازاڕیی بێت تەنها لەبەرئەوەی وەك ئەو بیرناكەیتەوە و تێزەكانی ئەو ناڵێیتەوە، ئەوە لێرە بێت یان لەوێ، لەژێر چەترێكی زەردا بێت یان نیللی، هیچ جیاوازییەكی نیە و یەك سەرچاوەی بیركردنەوەیە و یەك كلتور و یەك عەقڵیەتە، ناتوانرێت ئەو فیكرە دۆگما و خەتەرناكە و ئەو عەقڵیەتە سەقەتە بە ئیدعای گەورە و قسەی قەبە و بانگەشەی ڕووت و پڕوپاگەندەی ووشك تبریری بۆ دابتاشرێت و هەموو هەوڵێكیش بۆ میكیاج كردن و جوان پیشاندانی لە ڕێگەی ئیعلام و قەڵەمی فەریكە نوسەر و وردە ڕۆشنبیر و پەڕلەمانتاری فیسبوكەوانەوە نەزۆكە و هیچی لێ سەوز نابێت و وەك هێلكەیەكی پیس هیچی لێ هەڵنایەت.!
دیارە توانج و پلار لە پیاوە گەورە و لێهاتووەكان، سەرەخۆشی كەسە بێ كەڵك و گرگنەكانە، و بەڵگەنەویستیشە هەرگیز پەیین فرۆشەكان ناتوانن دەركی بەها و جوانیەكانی زێڕ بكەن .!!