میدیا و ڕاگەیاندنی كوردی لەنێوان (ڕۆژنامەنوسی كاسب) و (دەزگای ئیعلامی ئەجێندایی)ـدا 

 

ئەركی سەرەكی ڕاگەیاندن بەهەرسێ جۆرەكەی (بینراو و بیستراو و خوێنراو) بریتیە لەگەیاندنی زۆرترین زانیاری و هەواڵی ڕاست و دروست بەهاونیشتمانیان، هاوكات لەگەڵ بەخشینی كۆمەڵێك هەقائیقی جێگیر و ڕوون بە بینەر و بیسەر و خوێنەر، دیارە ئەمەش لەڕێگەی پیشاندان و گواستنەوەیەكی ڕاستگۆیانەی هەواڵ و ڕوداوەكان، و شرۆڤەیەكی ورد و هاوسەنگ و بێلایەنانەوە دەبێت بە ڕەچاوكردن و حسابكردن بۆ ڕا و ڕای بەرامبەر .

هەروەهائەركێكی دیكەی ڕاگەیاندن ئەوەیە كە پێویستە بەردەوام لە هەوڵی گۆڕینی واقیدا بێت بەرەو باشتر، و بەهەموو بوونیەوە خۆی بخاتە خزمەت كۆمەڵگە بەجۆرێك هاونیشتمانیان ئەوەیان لاجێگیر بێت كە ئەو ڕاگەیاندنە تەعبیرە لە هزر و ڕۆح و خواست و مەیلەكانیان لەیەككاتدا، و ئەگەر ئامانج لە ئیعلام بەشێوەیەكی گشتی گەشەدان نەبێت بە لایەنی هزری و دەرونی و ڕۆحی مرۆڤەكان ، ئەوا بێگومان زیادەیە و هیچ پێویست نیە و بگرە زیانیشی هەیە.!

هەندێك دەڵێن ئاسایشی نەتەوەیی (الامن القومی) زۆر گرنگە، هەندێكی دیكە دەڵێن ئاسایشی خۆراكی (الامن الغژائی) لەو گرنگترە، بەڵام پێموایە لە هەردوكیان گرنگتر بریتیە لە ئاسایشی فیكری (الامن الفكری) كە پەیوەندی ڕاستەوخۆی بە كاری دەزگاكانی ڕاگەیاندنەوە هەیە كە چۆن كاریگەری ئیجابی لەسەر فیكری كۆمەڵگە دروست بكەن و لێنەگەڕێن فیكری فاسد و شاز و نەگونجاو بە بەهای ئەم گەل و نەتەوە، و ناسازگار لەگەڵ ڕەوشتی ڕەسەنی كوردایەتی دزە بكات، و نەهێڵن بۆشایی وەها دروست ببێت، خێرا بە فیكری تازە و جوانی كوردی و خۆماڵی پڕیبكەنەوە .

بەداخەوە ئەوەی ئێستا لێرە دەبینرێت ڕاگەیاندن تا ڕادەیەكی زۆر پێچەوانەی مەبەست و ئامانجەكانی كار دەكات، زۆرجار كەس و دەزگای ئیعلامی حەز و مەزاج و مەیل و ویستی (فكریی و ئایدۆلۆژی و حیزبی) خۆی تێكەڵ بە داڕشتن و ڕوماڵ و نقڵی هەواڵ و زانیارییەكە دەكات و بەویستی خۆی شرۆڤەی بابەتە ئاڕاستە دەكات، دیارە ئەویش بۆ خزمەت و پاڵپشتی و سەرخستنی ئەجێندا و بەرنامەی لایەنێكی دیاریكراو یان بۆ برەودان بە ئایدۆلۆژیایەكی تایبەت ، ویان بە پێچەوانەوە بۆ لێدان لە لایەنێكی دیاریكراو، یان زۆرجار كار لەسەر تەوقیتی هەواڵەكە دەكرێت و لەگەڵ هەواڵێكی دیكە لەیەكی دەدات بۆ ئەوەی ئەو گریمانە و ئەنجامگیریی و شرۆڤەیەی كە خۆی دایناوە فەرزی بكات و بیسەلەمێنێت، یان دەبینین بەرنامە دەكرێت و ڕای شەقام وەردەگیرێت بۆ دروستكردنی حەشدێك لەسەر ئەو داتا و هەواڵ و زانیارییەی كە ئەو دەزگا دیاریكراوە دەیەوێت تەرویجی بداتێ و ئیشی لەسەر بكات، یان دروستكردنی ڕاپرسی و دەنگدانی درۆ و ساختە ، ئەمەش بۆ فشار لەسەر لایەنێكی دیاریكراو و یان بەدەستهێنانی مەكسەب و مەنسەبێكی دیاریكراو ، بەوەی كەسێك دەهێنرێت فووی تێ دەكرێت و ماوەیەك دەكرێتە واجهە بۆ ئەوەی دواجار بكرێتە ئایكۆن بۆ وەرگرتنی پۆستێكی حكومی و ئیداری، یان بۆ شەڕی دەرونی و لێدانی كەسانی دیكە .

زۆرجار دەبینین هەنێك میدیا و دەزگای ئیعلامی خەریكی خەلقكردنی قەرینە و سیناریۆی عەجیبن بۆ چەواشەكردن و بەلاڕێدا بردنی هاونیشتمانیان لەسەر مەسەلەیەك، و یان دروستكردنی تەپ وتۆز لە سەر هەقیقەتی بابەتێك بۆئەوەی وەك خۆی نەبینرێت، بۆیە لێرە دەكرێت خەستەخانە و بەنزینخانە و زانكۆ و بانك و مۆلیدەی ئەهلی هەبێت بەڵام ناتوانم بڕوا بە بوونی كەناڵ و میدیای ئەهلی و بێ لایەن بكەم..

ئەمەو جگە لەوەی هەنێك كەناڵ و سایت و دەزگای ڕاگەیاندن بەردەوام خەریكن ڕەشبینی پەخش دەكەن و شەوانە دنیایەكی دیكە خەم و پەژارە و نائومێدی ئەخەنەسەر كێشە و خەفەتەكانی ئەم خەڵكە هەناسە ساردە و هێندەی دیكە مەعنەویاتیان دادەڕوخێنن بە هەڵڕشتنی هەواڵی سەرچاوە نادیار و وەهمی و فڕێدانی ڕەقەم و داتای بێ سەروبەر،یان بڵاوكردنەوەی هەواڵگەلێك كە ئیسارەی غەریزەی زایەندی دەكات بەتایبەت لای لاوان و تازە پێگەیشتوان، دەشگونجێت لە پێناو ڕاكێشانی خوێنەر و پڕفرۆشكردنی گۆڤار و ڕۆژنامەكەی و پڕ بینەركردنی سایتەكەی ئەو كارانە بكەن.!!كە پێموایە ئەمانەی كە ئاماژەم بۆ كرد قەیرانێكە لە پاڵ قەیران و ئەزمە زۆر و زەوەندە‌كانی ئەم مەملەكەتە كە بەتەواوی تەنگیان بە هاوڵاتی ئەم نیشتمانە هەڵچنیوە، كە بێگومان جێكەوت و كاریگەرییەكانیئەوەندە ترسناكە كە نابێت نادیدە بگیردرێت و پێویستە لایەنی پەیوەندیدار لە خەمی ئەم كارەساتەدا بن.

دیارە بە نەمانی ئیتیك و بە ڕەچاونەكردنی ئەخلاقیاتی كاری میدیایی و بە كاركردن بەم شێوازە، خەڵكی متمانەیان نامێنێت و دەزگا و كەناڵەكە میصداقیەت لەدەست دەدات، ئەوكات ئیعلام لەبری ئەوەیڕێنوماییكەر و هاوكار و یارمەتیدەری خەڵك ، و دەسەڵاتی چوارەم بێت ، خۆی دەبێتە سیلاحێكی كوشندە و كاولكەری فكری مرۆڤ و دواجار كۆمەڵگەش..

لەم نێوەندەدا نابێت ڕۆڵی خراپ و ناشایستەی هەنێك ڕۆژنامەنوس و هەواڵفرۆش باس نەكەین كە چۆن لێیان تێك چووە و بیریان نەماوە كە (ڕۆژنامەنوس) وەك چاوی سێیەمی خەڵك وەهایە، دەبێ مەوقیع و مەكانەتی خۆی بزانێت و پابەندبێ بە بەها و ئەخلاقیاتە میهەنیەكان نەك لەهەركوێ گەڵای سەوزی ئەمریكی بینی وەك گەڵای زەردی پاییزی سووك سووك هەڵوەرێت.!

ڕاستە كاری ڕۆژنامەنوسی و میدیایی وەك پیشەی (حرفە)لێهاتووە، بەڵام نابێتتاكە دافعی ڕۆژنامەنوس و میدیاكار تەنها بەدەستهێنانی (پارە و پاروو) بێت، لەم ڕوەوە بەداخەوە هەندێك لە ڕاگەیاندكار دەبینین بەبێ حسابكردن بۆ ئەوەی كە ویژدان و چاوی سێیەمی كۆمەڵگەن، كەپێویست وایە ئامانجێكی باڵا و پەیامێكی ڕوونی هەبێت لە كارەكەیدا،دێن (وەك یاریزان – خۆیان واتەنی) لەچ نادییەك بۆند و گرێبەستەكە چەورتربوووئیمتیازات باشتربووخێرا سەنگەر دەگوازنەوە و دەڕۆن لەوێ یارییان پێ دەكرێت، ئیتر گرنگ نیە ئەو دەزگایەیبۆی دەڕواتتاچەند تەریبە یان دژە بەو دەزگایەی پێشتر كاری تێدا دەكرد، و یان ئایا كامیان لەبەرەی هاونیشتمانیانە و كامیان سێبەری دەسەڵاتە..!؟

هەنێك بەمانای كەلیمە خەریكی كاری سیخوڕین و ناویشیان لە خۆیان ناوە (ڕۆژنامەنوس) كە لە ڕاستیدا ئەوەی كاری (ڕۆژنامەنوسی) لە كاری (جاسوسی) جیادەكاتەوە، بنەما یاسایی و مۆرالیەكان و ڕەچاوكردنی ئەخلاقیاتی میهەنی و پاراستنی میصداقیەت و پەرۆشیە بۆ گەیاندنی زانیاری و هەواڵی ڕاست و دروست بۆ كۆمەڵگە بەگشتی، ئەگەرنا ڕۆژنامەنوس و جاسوس تەنها یەك تاڵ موویان فەرقە، تاڵە مویەكی ناسك و بێ ڕەنگ و شەفاف..!!

زۆرجار بارودۆخی سیاسی ناوچەكە و هاوكێشە و لاسەنگە ئاڵۆزەكان و ئەزمە و قەیرانەكان ، و گەرمی ڕوداوەكان زۆر بە خێرایی ماكیاجەكان دەتوێنێتەوە و وردە وردە نوسخە ئەصڵیەكە دەردەكەوێت، و بەتەواوی ڕووی ڕاستەقینەی هەنێك كەناڵی ئیعلامی و سایت و ڕۆژنامەی ئەلكترۆنی و گۆڤار ، و تەنانەت نوسەر و ڕۆژنامەنوس و ڕۆشنبیر و موحەلیل و چاودێری سیاسی و چالاكوان دەركەوێت، وەك پێشتر بینیمان كەچۆن نەیانتوانی بەشێوەیەكی عەقڵانی و بابەتیانە شرۆڤە و ڕوماڵی دۆخەكە بكەن، بەڵكو خێرا كەوتنە ژێر كاریگەری حەز و ویست و بیرە حیزبی و ئایدۆلۆژیەكانیانەوە، و كەوتنە خزمەتی ئەجێندای لایەنێكی دیاریكراو بۆ لێدانی ئەوانی دیكە، و بینیمان چۆن (بێ لایەنی)ـان كەوتە ژێر پرسیارەوە، و(هاوسەنگی)ـان لاسەنگ بوو، و (ڕاستگۆیی)ـشیان بووە (چەپ)ـگۆیی..!

ئەوكات هەموو ئومێدەكەمان كە وەیس بوو، ئەویش بە شیعە دەرچوو..!