هۆشیاربن، نەبنە نێچیری ڕاوچییە (پەست)ەكان!!

 

زۆر جار بەبێ‌ ئەوەی بەخۆمان بزانین یان دەسەڵاتێكی ئەوتۆمان هەبووبێت، یاخود هەڵە و خەتایەكی بەرچاوی خۆمانی تێدا بووبێت، بووینەتە نێچیرێكی ستەملێكراوی دەستی بازرگان و سیاسی و دیكتاتۆرەكان، هەندێ‌ جاریش نێچیرێكی خۆشدەستی بەردەم مایك و شاشە و قەڵەم بەدەست و میدیا و دەزگاكانی ڕاگەیاندن، كە دواجار و درەنگ یان زوو باجەكەیمان داوە.
لە هەموو ئەمانە خراپتر و مەترسیدارتر ئەوەیە كە -خوانەخواستە- ببینە نێچیری دەستی ڕاوچییە پەست و نەفس نزم و ئەخلاق لاوازەكان، كە باجەكەی زۆر سەخت و گەورە و هەندێ‌ جاریش قەرەبوو نەكراوە و كەسێتی نێچیرەكە ئەفەوتێنێ‌ و پریشەكەشی دەوربەرەكەی دەگرێتەوە.
بەداخەوە ئەمجۆرە ڕاوچییە دوور لە بەها ئەخلاقیانە كەم نین، كە (بێ‌ باوەڕی) و (ئیمان لاوازی) و (شەرم نەكردنیان لە خوا) كردووینییەتە ڕاوچی و ئەڵبەتە لە هەمان كاتدا نێچیری دەستی نەفس و شەیتان و خەریكە بە هەموو گۆشە و كەنارێكی نیشتیماندا بڵاو بوونەتەوە و تۆڕ و تەڵە و داوە قێزەون و ڕەشەكانیان لە زۆر جێگەدا هەڵداوە و خستووەتە كار و ژەهری تاڵی كوشندەیان دەڕژن.
یەكێك لە زەقترین و دیارترینی ئەو شوێنانەی كە ئەم جۆرە ڕاوچییە ئەخلاق لاواز و ڕەوشت پەست و نەفس نزمانە تەڵە و داوەكانی خۆیانی تێدا بەكار دەهێنن و ژەهری كوشندەیان بەكار دەهێنن، ناو فەزای مەجازی و تۆڕە كۆمەڵایەتییەكانە بەگشتی و لەوانەش تۆڕی كۆمەڵایەتی فەیس بووك بەتایبەتی، خراپترینی ئەو تەڵە و ژەهرەش كە بەكاری دەهێنن بابەتە عاتیفی و سۆزیارییەكان و مەسەلەی (سێكس) و پەیوەندی ناتەندروستی نێوان ڕەگەزی جیاوازە.
بۆیە پێویستە هەمووان هۆشیار بن و نەكەونە ناو ئەم جۆرە تەڵە و داوانە و ئەم جۆرە ژەهرە كوشندانەیان دەرخوار نەدرێت، ئەڵبەت پێویستە زیاتر لەوەش هۆشیار و بە ئاگا بن كە زۆر جار ئەم ڕاوچییە مەترسیدارانە تەكتیك و میكانیزم و شێوازی زۆر سەرنج ڕاكێش و (بەسود و بەچێژ!!) و تەنانەت باوەڕ پێ‌ نەكراویش دەگرنە بەر.
ئەم بابەتە مەترسییەكی گەورەیە و گریمانەی ئەوەی هەیە یەخە و بەرۆكی هەموومان بگرێت، بۆیە پێویستمان بە وزە و هێزی بەرگری و (مەناعە) هەیە، كە بە بڕوای بەندە بابەتی ئیمان و باوەڕ و شەرم و ترس لە خوا بەهێزترین و باشترینیانە، وێڕای هەبوونی هۆشیاری كۆمەڵایەتی و ئەخلاقی و تەندروستی و تەنانەت هۆشیاری ئەمنی و ئاسایشی.