كوردستان لە نێوان بەرەی فریشتە و بەرەی شەیتان!

  پێنج شەممە, 03 ئاب 2017 12:41

 

جێگای داخە ئەم وڵات و مەملەكەتەی ئێمە لە مێژووی دوور و نزیكدا، هەردەم لێكەوتە سیاسیەكانی گەرم بووە و هەرگیز ساردبونەوەی بەخۆیەوە نەدیوە،لە مێژووی دووردا زلهێزەكانی دنیا بەردەوام هەر جارە و یەكێك، ئەم وڵاتەی كردوە بە گۆڕەپانی شەڕ و كێشە و ئاڵۆزیەكان،دواتر میرنشینەكانی كوردیش، كەمتر لە ناحەزانیان بە خەڵك و میللەتی خۆیان نەكردوە،دوای ئەوانیش دەسەڵاتە یەك لەدوای یەكەكانی عێراق، بەراست و چەپ بەسەری ئەم میللەتەیان كێشاوە و نەیانهێشتوە هەر گیز خێر لەخۆی ببینێ‌.

بەڵام لەهەموویان ناخۆشتر و بە ئازارتر،ئازاری ئەو حیزب و لایەنە كوردیانەیە، كە ساڵانێك خەڵكی بەش مەینەت نەك خۆی، بەڵكو خۆی و ماڵ و مناڵ و دار و نەداری خستە بەرپێی ئەو لایەنانەی كە بەناوی كوردایەتی و رزگاری نەتەوەیی خەڵكیان منەت بار كردبوو، بەڵی منەتی ئەوەیان ئەكرد كە ئەوان لەبەر خاتری میللەت سنگیان داوەتە بەر گوللەی دوژمن،بەڵام لە هەمان كاتیشدا، ئەوسا و ئێستاش ئەوەندەی كورد بەدەستی یەكتر كوژراوە و ئازاری چەشتوە هەرگیز دوژمنەكانی بۆیان نەكراوە ئاوای پێبكەن.

سەخت ترین دەردی كۆن و تازەی كورد، تۆمەتە حازر و ئامادەكەیە، كە هەموو كات بەردەستە و ئامادەیە بۆ لێدانی ئەوانی تر، ئەویش تۆمەتی بەخائین كردن و بە شەیتان كردنی یەكترە.
بەداخەوە مێژووی تەخوین و بە شەیتانكردن هی ئەم سەردەمە نیە و، رۆژگارێكە لەگەڵ مێژووی ئەم گەلە قۆناغ بە قۆناغ هاتوە و بەردەوام بووە تا ئەمڕۆ.
نازام خەڵكانێك بۆ ئەوەنە حەزیان لە بە شەیتانكردنی ئەوانی ترە؟ لە كاتێكدا بە واقیعی هیچ كەس نە حەقی تەواوی لایە و فریشتەیە، نە هەرچی زوڵم خراپە هەیە خەتای ئەوە و بووە بە شەیتان.

بۆ نمونە لەسەردەمی بەعسدا كەسانێك هەبوون بەحساب پێشمەرگە بوون، بەڵام پیاوی بەعس بوون و لە كاتی شەڕەكان لە دواوە دەستیان لە پێشمەرگە ئەوەشاند،،خەڵكانێكیش هەبوون جاش و مستەشاربوون، بەڵام هەرچی فیرار و راكردوی دەستی بەعس هەیە،ئەوان پەنایان ئەداو ئەیانشاردنەوە، كەواتە چاكە و خراپە و فریشتە بوون و شەیتان بوون، ڕیژەییە و كاڵایەك نییە بە باڵای كەس بڕابێ‌.

سەیر ئەوەیە كەسێك ئەگەر تووشی هەڵامەتێكی زۆر ئاسایی بێت، سەرەتا هەست بە ئازار ئەكات و ئاو لە لوتیا ناوەستێ‌، دواتر تووشی دەردی هەڵامەت ئەبێ‌،بەڵام دەری تەخوین و بە شەیتانكردن هیچ نیشانەیەكی نییە و، بە قودرەتی قادیر كابرا لە ماوی یەك چركەدا لە شەیتانەوە ئەبێ‌ بە فریشتە ،یان لە فریشتەوە ئەبێ‌ بەشەیتان ناپرسن بۆ؟
لەبەر ئەوەی فریشتە بوون و شەیتان بوون،لەسەر بنەمای بەرژەوەندی شەخصی و حیزبیە،كابرا لەسەر یەك لێدوانی كەناڵەكان یان پۆستێكی فەیسبوك، مەدەلیای فریشتە یا شەیتانی بە بەرۆكیەوە هەڵئەواسرێ‌!!!

باشە چۆن تەنها لەیەك چركەدا فریشتە ئەبێ‌ بەشەیتان و شەیتانیش ئەبێ‌ بە فریشتە؟زۆر ئاسانە ئەوە لەبەر ئەوەیە كە ئەصلی كێشە و ململانێكان لەسەر دەسەڵات و خۆسەپاندنە،ئەم دەسەڵات و خۆسەپاندنەش هەر لایەك بە كەرستە و ئامرازی جیاواز ئیشی لەسەر ئەكات، ئەگەر نا خودی شەڕەكان دوور و نزیك پەیوەندیان بەخەڵكەوە نییە چۆن؟

ئاخر ئاشكرایە لایەنە ناكۆكەكان هەر هەموویان بەناوی خەڵكەوە قسە ئەكەن.بەڵام بە تەحەداوە ئەڵێم ئەگەر بەیانی بە قودرەتی خوا دەسەڵاتدارەكان بێ‌ دەسەڵات بوون و بێ دەسەڵاتەكانیش چوونە دەسەڵات، ئەو كات خیتابی هەرودوو بەرەكە رێك پێچەوانە ئەبێتەوە، ئەوكات دەسەڵاتدارە تازەكان ئەڵێن خەڵك هیچ عەیبی نیە، لە دەسەڵات كەوتوەكانیش ئەڵێن میللەت مرد و تیا چوو!!!،ئەم یاری (تۆم جێری)یە و یەكتر راونانە تازە نییە بەم وڵاتە،ئەوە لای هەموو كەس روون و ئاشكرایە.

بۆ ئەوی كەس بەهەڵە تێنەگات،دیارە هەموو حیزب و لایەنێكی سیاسی مادەم پێی ئەوترێ‌ حیزبی سیاسی،ئیتر ئەصلی ئیشەكەی سیاسەت كردن و ململانێی سیاسیە بۆ گەیشتن بە دەسەڵات و جێبەجێكردنی بەرنامە سیاسیەكەی خۆی.بەڵام كێشەی ئێمە ئەوە كە حیزبەكان ململانێی سیاسی ناكەن، بەڵكو شەڕی سیاسی ئەكەن،شەڕ بەو مانایەی حیزبەكان لەبری ركابەری ئیش لەسەر سڕینەی یەكتر ئەكەن، ئەگەر نەكرا ئیش لەسەر پەراوێز خستنی یەكتر ئەكەن، ئەگەر ئەمەش نەكرا،ئیتر ئیش لەسەر مل شكاندن و پاشقوڵ لێگرتن و كێشە بۆ دروست كردن ئەكەن.

بەداخەوە ئەم نەفەسە پیسە،ئەم بە فریشتە كردن و بە شەیتان كردنە لەناو ئێمەی كوردی بەدبەخت، مێژویەكی دوور و درێژی هەیە.

پرسیارە جدی و مەنتیقیەكە ئەوەیە، ئەرێ‌ بەڕاست ئەمانەوێ‌ هەر بەم نەفەسەش، دەوڵەت دورست كەین؟! خۆ ئەگەر وابێ‌ ئەم دەوڵەتە پێویست ناكات كەس پێی سەغڵەت بێ‌ و لێی بترسێ‌،چونكە تا یەك پایەی هەڵئەچنرێ‌ و دروست ئەكرێ‌،لە بەرامبەردا دوو پایەی هەلاهەلا بووە و ئاسەواریشی نەماوە!!!

سۆران هەستیار

سۆران عبدالله، لە دایك بووی 1973.ئەندامی كارای  سەندیكای رۆژنامەنوسانی كوردستان.ئەندامی یەكێتی رۆژنامەنوسانی نێودەڵەتی.بەشداربووی چەندین خولی جۆراو جۆری بواری رۆژنامەوانی،وەرگێر و شاعیر و پەخشان نووس.شرۆڤەكاری سیاسی،موحەریری هەواڵ لە كەناڵی سپێدە لە ساڵانی پێشوو، نوسەری  بەردەوامی رۆژنامەی یەكگرتوو پێش وەستانی رۆژنامەكە.