بەپاشەكەوتی موچە حكومەتی هەرێم ئەوەی ویستی كردی ؟!

  شەممە, 12 ئاب 2017 15:23

 

سێ ساڵ زیاترە حكومەتی هەرێم بەبیانوی جۆراو جۆر سیاسەتی برسیكردنی هاوڵاتیان وموچە خۆرانی خۆی دەست پێكردوە و هەررۆژەو بەشێوەیەك لەلایەن كاربەدەستانی ئەو حكومەتەشەوە باس لە لابردنی پاشەكەوتی موچەی فەرمانبەران دەكرێت و تەنانەت لە ئێستادا هاوڵاتیان هەرچی كێشەو گرفتی ئەم هەرێمە هەیە لەبیریان چوەتەوە سەری زمان و بنی زمانیان بووەتە" موچە هات ، موچە نەهات، پاشەكەوتەكەی لادەبرێت ، لانابرێت، كەی چاك دەكرێت ، پێش ریفراندۆم، دوای ریفراندۆم...)بەردەوام ئەم جۆرە پرسیارانە دێن بە زهنی هاوڵاتی و موچە خۆری ئەم هەرێمەدا.

لێرەدا دەمەوێت چیرۆكێك بگێرمەوە كە چۆن دەسەڵاتە ستەمكارەكان بۆ جێبەجێكردنی ئەجێندای بەرناو سیاسەتەكانی خۆیان وا لە خەڵكی دەكەن كە تەنها بیرلە نان و لەسكیان بكەنەوە "ساڵی 1987 منداڵبووم بەئاوارەیی ڕومان كردە وڵاتی ئێران ، بەڵام كاتێك هاوڵاتیانی ئێرانی دەهاتن بۆ كەمپەكەمان و سەردانیان دەكردین پێیان دەوتین( ئەرێ سەدام شەكری نەبوو ، رۆغەنی نەبوو، چای نەبوو، برنجی نەبوو، سەدام قەشەنگ نەبوو هاتن بۆئێرە"، ئێمەش پێمان دەوتن بەڵی َهەموو ئەو شتانەمان هەبوو بەڵام ئێمە ئازادیمان نەبوو لەبەرئەوە هاتوین) .
جا لێرەدا مەبەستەكەم ئەوەیە بڵێم حكومەتی ئێران هاوڵاتیانی وڵاتەكەی وا برسیی كردبوو تەنهاو تەنها بیریان لەلای چاو برنج و شەكرەكە بوو، لە ئێستاشدا حكومەتی هەرێم بەهۆی پاشەكەوتی موچەوە وایی لە هاوڵاتیانو موچە خۆران كردوە تەنها بیر لە موچەكانیان بكەنەوە و تەنانەت لێرەو لەوێ گوێبیستی ئەوە دەبین دەوترێت " هەرموچەكەمان چاكبكرێتەوە ئیتر خوا دەكات دارو پەردوی ئەم وڵاتە بەسەریەكەوە نەما ، ئەوە كەی كێشەی ئێمەیە" ئەوەیە سیاسەتی برسیكردن و نەمانی ئینتما بۆ خاك و خەڵك و نیشتمان.
هەر ئەم سیاسەتە چەوت و فاشیلە بووە وایکردوە لەئێستادا پرسێکی گەورەی وەک ریفراندۆم کە چارەنوسی نەتەوەیەکی پێوە بەستراوە لەلایەن بەشێک لە هاوڵاتیانی ئەم هەرێمە بەکەم بایەخ سەیر بکرێت و تەنانەت کەمپین و کەناڵی نەخێری بۆ دروست بکرێت و بکرێتە قوربانی سیاسەتە هەڵەکانی حکومڕانانی ۲٥ساڵی ڕابردوی هەرێمی کوردستان.

ئیسماعیل سەعدی

لەدایك بووی خورماڵ 1976 لەسلێمانی دادەنیشێت لە ئێستادا مامۆستایە و لەساڵی 1996دا یەكەم نوسینی لە ڕۆژنامەی داهێنان بڵاو بوەتەوە وبۆ ماوەی دوو ساڵ پەیامنێری ڕۆژنامەی یەكگرتوو بووە ماوەی دووساڵیش لە ڕۆژنامەی ئامانجی سەربە یەكێتی مامۆستایان كاری كردوە. بەرێوەبەری نوسینی گۆڤاری پەنجەرەیە و دووساڵ بەرنامەی پرسی گەنجی لە دەنگی یەكگرتوو رادیۆی سلێمانی پێشكەش كردوە ئەندامی كارای سەندیكای ڕۆژنامەنوسانی كوردستان
بەشداری دەیان خولی ڕۆژنانوسی كردوە و لەوبوارەدا چەندین بڕوانامەی بەدەست هێناوە. دەیان بابەت و نوسینی لەڕۆژنامەو گۆڤارو ماڵپەرە كوردیەكاندا بڵاو بونەتەوە لەوانە ڕۆژنامەی هاوڵاتی و ماڵپەری كوردیو ولە ساڵی 2009ەوە وەك پەیامنێرو هەواڵساز لە ماڵپەڕی كوردیو دەست بەكارەو لە ئێستاشدا بەردەوامە.