ریفراندۆم... بەڵێ ، نەخێر ، بەخێر

  دوو شەممە, 14 ئاب 2017 13:06


زۆر دەمێكە كورد شۆڕش دەكات ، شاخەو شاخ ، دێ بەدێ ، دۆڵ بە دۆڵ ، دێت و دەڕوا ، خوێن دەڕێژێ لە پێناوی شوناسێدا كە كاتی خۆی ووڵاتانی زلهێز و دەست ڕۆ یشتو وەكو گۆشتی قوربانی ئەم گەلەیان دابەش كرد بە پێی بەرژەوەندیەكانیان .


لە مێژوی تازەشماندا بە تایبەتی دوای شۆڕشی ئەیلول و سەر لە نوێ دەست پێ كردنەوەی شۆڕشی تازەی كورد لە دوای نسكۆی ساڵی 1975 ئەوە هەر مەپرسە ئەو هەموو نەهامەتیەی كە بەسەر ئەم گەلەدا هات بە تایبەتی لە ماوەی دەسەڵاتی حیزبی بەعس و تایبەتی تر لە ماوەی فەرمانڕەوایی صەدام حوسەیندا .


ئەم هەموو خوێن و فرمێسك و گریانە بۆ ڕۆژێك بوو كە هەناسەیەكی ئازادی هەڵمژین و تیكەیەك نانی بێ ترس بخۆین و خەوێكی بێ دڵەڕاوكێ بكەین .
ئێستا دوای حوكم ڕانیەكی خۆماڵی شكست خواردووی تا سەر ئێسقان ، سەر لە نوێ دڵەڕاوكێ ڕووی كردۆتەوە ئەم میللەتە خێر لەخۆ نەدیوە .


كاتێ سەیری دەسڵات دارانی خۆمان ئەكەین ئەوەندە لارو خوار و خێچن نازانین بە چ ڕستەیەك پێناسیان بكەین ؟ هەروەك بڵێی ئەم گەلە خوا قەهری لێ گرتبێت و ئەم دەسەڵاتەی بۆناردبێ ، لە پێش ئیسلاما هەر گەلێك كاتێ بە گوێی خوایان نەكردبێ یان لە پەیمان پاشگەز بوبنەوە خوای گەورە بە شێوازێ ئەشكەنجەی داون و زۆر جاریش لەناوی بردوون ، هەندێ جار لە شێوازی مرۆڤایەتی كردونیەتە دەرەوە و كردونی بە دروست كراوێكی تر ، جا نازانم ئێمە قەدەری ئەم دەسڵاتدارانەین ؟ یان ئەوان قەدەری ئێمەن ؟


لە لایەكی تر كاتێ مێژووی كەمتر لە سەدەیەك دەخوێنیتەوە دەسەڵاتدارانی عیراق هەركات لاواز بوبن باسی رێكەوتن و برایەتی و ئەم جۆرە شتانەیان كردوە لە گەڵ كوردو بەڕێوە بەرانی شۆڕشدا ، كاتێكیش دەستیان لە فیشەك و تەقەمەنی گیر بوبێت شاخەكانی كوردستان و شار و لادێكانی كردۆتە نیشان و بیژاویەتی بە كەیفی خۆی و كوردی وەك یاخی بوو پێناس كردوە ، ئێستاش ئەم دەسەڵاتە لە بغداد لە بەر دەم تاقی كردنەوەی مێژوویدایە دوای رزگار بونی لە داعش و گەڕانەوەی ئافاقە بۆ هێزی سەربازیەكەی ئایا پەلاماری كوردستان و شاخەكانی نادات ؟


ئەم گەلە بەش مەینەتیە لە نێوان دوو بەرداشدایە ، چی بكات ؟ بۆیە كۆمەڵێكی بە هەستەكانی بڕیار ئەدات و ئەڵێ دەوڵەتێ ئەم ستەمكارانەی تێدا حاكم بن ئەبەستم بە بەردێكەوە و لە نێو قوڵایی دەریادا فڕێی ئەدەم خەویشی پێوە نابینم .


كۆمەڵێكی تری ئەڵێ با بەعەقل و ژیری بیر بكەینەوە و ئەگەر هەليَك هەبێت با بە هەموومان پێكەوە بیقۆزینەوە و بەرەو ڕوی بڕۆین و ئەوەی ئەمڕۆ لەم دەوڵەتە دەستە باڵایە سبەینێ نەخۆی نە نەوەی نامێنێ و مێژوش وێنەی لەم جۆرە دەسەڵاتە زۆر بۆ تۆمار كردوین .


كۆمەڵێكی تر لە نێوان ( بەڵی و نەخێردا ) دوعای ( بەخێر ) دەكات خوا بە خێری بگێڕێ چ نەخێرەكان چ بەڵێكان منیش ئەڵێم .


لەبیرم دێ كە منداڵ بووم
باوكم دیوت
هەر ووتەكەی كاكەوڵایە
هەتا ماوە كورد هەر وایە
لە سەركردە بەختی ڕەشە
بوًیە باری ڕاسە نایە
كۆڵەكەی ماڵ كرمی تیایە