حكـومەت و جـەژن

  هەینی, 18 ئاب 2017 05:52

لە كۆمەڵی كوردەواریدا جەژن بەهاو كاریگەری زۆری هەیە، زۆرجار كێشەو دووركەوتنەوە كۆمەڵایەتیەكان لە جەژندا چارەسەر دەكرێن و كۆتاییان پێدێت، جەژن ڕەهەندی ڕۆحی و دەروونی زۆری لەسەر تاكی كورد هەیە، ئەوەندەی تاكی كورد لە جەژندا ئامادەیی لێبوردنی هەیە لەڕۆژانی تردا ئەو بارە دەروونیە لەبارەی نیە، زۆرجار تاكی كورد لە ڕۆژانی جەژندا بەپێی خۆی دەڕوات بۆ ماڵی ئەو كەسانەی دڵی ڕەنجادون و داوای لێبوردنیان لێدەكات، نهێنی ئەمەیش تەنها ئەو حاڵەتە دەروونی و ڕۆحیەیە كە جەژن دروستی دەكات.

لەكاتێكدا ئەمساڵ كە بەرەو جەژنی قوربان دەڕۆین حكومەتی هەرێم قەرزاری سەرجەم موچەخۆر و فەرمانبەر و تاك بەتاكی كۆمەڵی كوردەواریە، سێ ساڵی ڕابردوو حكومەت چارەكە موچەی دابەشكردووەو هەموو مانگێ‌ سێ چارەك قەرزار بووە، لەگەڵ هەموو ئەم قەرزە زۆرەدا، هێشتا هیچ دەرچەو دەرەتانێك نیە حكومەت بڵێت ئەوە قەرزەكانی پێ دەدەمەوە، نە بودجەی بەغدا هات و نە پارەی نەوت گەڕایەوە ناو خەزێنەی دەوڵەت بەقسەی خۆیان، نە نرخی نەوت بۆ سەد دۆلار و بەرەو سەر بەرز دەبێتەوە.
لەگەڵ هەموو ئەو قەرزاری و بێ پارەیی و زیاد بوونی توڕەیی سەرجەمی خەڵكی و هەڕەشەی فەرمانبەران، هەروەها كۆمپانیای دانا غاز و كۆمپانیاكانی تر وەك ئەو بوونەتە ڕەگی گولی تووشی جەستەی حكومەتە قەرزارەكە بوون و لە كۆڵی نابنەوەو حكومەتیش تەنانەت لە ژێر لێویشەوە باسی ئەو بابەتە ناكات، هەرچەند ساڵی ڕابردوو بە پاڵ و پەڕۆ و پینە و توانرا ساڵی خوێندنی قوتابخانە و زانكۆ و پەیمانگاكان بەڕێبكرێت و دەرگای خوێندن دابخەن و حكومەتیش هەناسەیەكیدا، چونكە ترسی ڕژانە سەرشەقامی هەزاران قوتابی و خوێندكار و مامۆستای نەما، بەڵام وەكو دەڵێن ساڵ هەر لە خۆیەوە دێتەوەو ساڵێكی تری خوێندن دەگەڕێتەوەو حكومەت هەر لە شوێنی خۆیدایە.
باشترین ڕێگە لەبەردەم حكومەتدا ئەوەیە پێش ئەوەی جەژن بڕوات، حكومەت هەلی جەژن لەدەست نەدات و لەبەرامبەر ئەو هەموو قەرزە زۆرەی كەوتووە بەسەریدا، داوای گەردن ئازادی لە فەرمانبەرانی بكات و بڵێت دڵتان گەورە بێت و لێبوردنتان هەبێت، وەك هەڵوێستێكی كوردەواریانە گەردنمان ئازادكەن و لەو قەرزەكانتان خۆش بن و با لاپەڕەیەكی نوێ هەڵدەینەوە، ئەوەی چووچوو، با لە سەری ساڵێكی نوێوە حسابی كەین، چونكە خۆتان دەزانن لەو بەردەم (ڕیفراندۆم و ڕاپرسی و گشتپرسیداین)، بەرەو دروستكردنی دەوڵەتی كوردی دەڕۆین، هەرچەندە جیاوازی ڕاو بۆچوون هەیە لەسەر ئەنجامی گشتپرسی، برادەرانی ئەولا دوو ڕایان هەیە: یەكەم دەڵێت: گشتپرسی مەرج نیە بۆ ئیعلانی دەوڵەت بێت، دووەم دەڵێت: بۆ دەوڵەتی كوردیە، برادەرانی ئەملاش ناتوانن خۆیان یەكلای بكەنەوە، لە هەولێر دەڵێن گشتپرسی مافی گەلەكەمانە، لە سلێمانی كۆبوونەوەی بێئەنجامی بۆ دەكەن، هەندێ‌ لە برادەرانی تری ئەملا دەڵێن: گشتپرسی دوولەتمان دەكات لەبری دەوڵەتی یەكگرتووی كوردی، ئەگەر حكومەت هیچكام لەمانەی بۆ نەكرا سەرباری ئەو هەموو قەرزەی كەوتووە بەسەریدا ئەوە دەبێت جەماوەری بەشەرەفی گەلەكەمان خۆیان گوتەنی دڵیان گەورە بێت، چونكە وەزعەكە ناسكەو شەڕی داعشەو نەوتەكە پارەكەی دیار نیەو نرخی دابەزیوەو سەرقاڵی دروستكردنی دەوڵەتین، لەبەرامبەر هەموو ئەمانەدا دەبێت میللەت دڵی گەورە بێت و گەردنی حكومەتی خۆی ئازاد بكات و ئیتر چاوەڕێی قەرەزە كۆنەكانی نەبێت بیكات بە خاتری دەوڵەتی داهاتووی كوردستان؟!.