چارەسەری ترسنۆكانەی ئەمڕۆ... سەركەوتنی سبەینێی بەدواوەیە

  هەینی, 25 ئاب 2017 14:23


وانەیەك لە مێژوی گەلان........


ئەڵێن كاتێ یەكێتی سوڤیەت بە نهێنی موشەكە سەر بە كڵاوە ئەتومیەكانی گەیاندە ووڵاتی كوبا لە ساڵی 1962 ، كاتێ ئەمریكا بەم كارە ئەزانێ زۆر تێك ئەچێت ، چونكە لە شەڕی كڵاوەی ئەتومیدا كات مەسەلەیەكی یەك لا كەرەوەیە ، لە كوباوە بۆ ناو ئەمریكا كەمتر لە پینج خولەكی پێویستە تا بگاتە هەر شارێكی ئەمریكاو ژێراو ژوری بكات ، بەڵام لە یەكێتی سۆڤێتەوە زیاتر لە 40 خولەكی پێویست ئەبێت .


سەرۆكی ئەمریكا ( جۆن كەنەدی ) كۆمەڵێكی زۆر لە پلەداری سەربازی و خاوەن بڕیار و دبلوماتكار كۆدەكاتەوەو لە ژێر زەمینی كۆشكی سپی دایان ئەنێ و پێیان ئەڵێ گەڕانەوە بۆ ماڵەوە یاساغە تا ئەو كاتەی بڕیارێك ئەدەن و ئەیدەنە دەستم و منیش گەلی لێ ئاگادار ئەكەم ، لە پاش چەند ڕۆژێك دوای ئەوەی زۆربەیان كۆك ئەبن لە سەر چارەسەری سەربازی و پێیان وایە پێویستە لە كوبا بدرێت و ژێراو ژوو بكرێت ، لەو كاتەدا نوێنەری ئەمریكا لە نەتەوە یەكگرتوەكان كە ئامادەی كۆبونەوەكان ئەبێت ڕوو ئەكاتە سەرۆك ئەڵێ قوربان من بۆچونێكی جیاوازم هەیە و لەلای خۆمەوە ناوم لێ ناوە ( چارەسەری ترسنۆكەكان ) ووتی چۆن ؟ ووتی من پێم وایە ئەم كارە لە ڕێگای دیبلوماتیەوە چارە سەر ئەكرێت ، پاشان سەرۆك وەزیری دادی ڕاسپارد بۆ ئەوەی پەیوەندی بە كەسێكەوە بكات لە ناو سەفارەتی سۆڤیەت كە هاوڕێی نزیكی خرۆ شۆف بوە ، دوای پەیوەندی كردن پێوەی لە شوێنێكی تایبەت یەك ئەبینن وپێی ئەڵێ من لە لایەن بەرزترین باڵای دەسەڵاتی ئەم ووڵاتەوە قسەت لە گەڵ ئەكەم ئەتوانی ئەمەی من پێت ئەڵێم بیگەیەنی بە سەرَوك خرۆشۆف ؟ ڕێك ئەكەون لە سەر ئەوەی یەكێتی سوڤیەت موشەكەكانی لە كوبا بكشێنێتەوە بە مەرجێ‌ ئەمریكاش موشەكەكانی لە توركیا بكشێنێتەوە بەڵام بە شێوەیەكی نهێنی و دوور لە هەڵای ڕاگەیاندن .


لێرەدا چەند خاڵێك ئاماژە پی بكەین :


1- لە كاتێكا ئەمریكا بەم جۆرە چارە سەرە ڕازی ئەبێت كە ژمارەی موشەكەكانی چەند بارەی موشەكەكانی یەكێتی سوڤیەت بوون ؟
2- مەرج نیە هەموو كات ئەوەی كە هێزی هەیە لە ڕووی هێزەوە و بەكارهێنانی هێزەوە سەركەوتن بەدەست بهێنێ .
3- زۆر جار ڕاگەیاندن بە مەبەست بێت یان نار ِۆڵی تێك دەر ئەبینێ لە تەنگەژەكاندا و بەرەو چارە سەر هەنگاوی پێ نانێ .
4- زۆر جار كلیلی چارە سەر مەرج نیە لای كەسە گەورەكان بێت ، ئەو تەنگەژە گەورەیەی نێوان یەكێتی سوڤیەت و ئەمریكا لە ڕێگای سكرتێری دوەمی سەفارەتی سوڤیەتەوە بو لە ئەمریكا .
5- گرنگە لە كۆبونەوەكاندا هەمیشە ڕای جیاواز هەبێت نەك سەرۆك چی ووت ئیتر ئەوە كەلامی خوایە و نابێ لێی لابدەیت و ئەبێ بیر لە جێ بەجێ كردنی بكەیتەوە و بەس ، چونكە نەبونی ڕای جیاواز لە بەرامبەر سەرۆكەوە زەمینەی لە دایك بوونی دیكاتۆرە لە ناو حیزبدا پاشان لە ناو دەسەڵات و ووڵاتدا .
6- هەلوێستی ترسنۆكانە كاتێ ئەزانی بۆچی ئەترسی خۆی لە خۆیدا گەورەییە و سەركەوتنی بەدواوە ئەبێت .
7- تاكی كوردی چاوەڕێی هەلوێستی لەم جۆرەیە لە پێناوی ژیانی هاوڵاتی ئەم وڵاتەدا كە بە دەست ژیانەوە ئەناڵێنێ .
8- ئەمەی نوسیم باسی نامەی دڵداری و ناواقعی نیە ، باسی قۆناغێكی زۆر هەستیاری نێوان دوو زلهێزی جیهان بوو كە هەموو دونیایان كردبوو بە دوو بەشەوە و لە كۆتاییدا چۆن عەقڵ و ژیری سەركەوتن بە سەر مل هوڕی و هێزی سەربازی جبەخانەو فیشەك و باروت .