بلندكرنا ئاڵایێ ئیسرائیلێ د ڤیستەڤاڵا كوڵن دا

 

ل ڕۆژێن بوری ڤیستەڤاڵەك هاتەكرن ل ئەلمانیا- كوڵن، بۆ پشتەڤانیا ڕیفراندوما هەرێما كودرستانێ، تێدا هژمارەكا زوورا كوردان بەشداری كر و ژ لایێ دەزگەهێن مێدیای ب شێوەیەكێ بەرفرهـ هاتە ڕوماڵكرن.

جارێ بەحسێ ڤیستەڤاڵی ناكم، من دڤێت ئێكسەر بچم سەر بابەتی كو ئەو ژی بلندكرنا ئاڵایێ ئیسرائیلێ بی د وێ ڤیستەڤالێ دا، گەلو بلندكرنا وی ئاڵای چ مفایەك تێدا هەیە بۆ پروسا ریفراندومێ؟

گەلو زیانێن وێ زۆرترن یان مفایێن وێ، دێ سەرنجا هەوە بۆ بابەتەكی وەكو ڤی راكێشم د دیتنا ئیسرائیلیان بخوە دا.

ڕوژناما (یدعوت ‌أحرنوت) ل ١٨\٣\١٩٧٨ گوتارەك بەڵاڤكر، كو شروڤەكرن بۆ هێرشا ئیسرائیلێ بو باشورێ لبنانێ كربی ل ١٥\٣\١٩٧٨، تێدا ب دژواری ڕەخنە ل تەلەڤزیونا ئیسرائیلێ گرت، كو دیدارەك دگەل مارونیەكێ مەسیحی كر ئەوژی (سعد حداد) بی ل لبنان، ئەو بخوە ژی ئاكنجیێ لبنانێ بی، وی خوشحالیا خوە نیشاندا ب هاتنا هێزێن ئیسرائیلی بۆ باشورێ لبنان ب رێكا مێدیا فەرمییا ئیسرائیلێ، ئەڤ كەیف خوەشییە ژی بۆ هندێ بی كو جوهیان ئاخا موسلمانان داگیر كر، ئەوژی وەكو مەسیحیەك ب ڤێ كەیف خوەش بی.

ڕوژناما ئیسرائیلی د ناڤەڕۆكا بابەتی دا ڕەخنەیێن دژوار گرتن ل مێدیا ئیسرائیلی و گۆت نیشاندانا وێ لێدوانا ئەوی مەسیحی و خوەشحالیاوی كو هێزێن ئیسرائیلی هاتین لبنان، دێ وەل موسلمانان كەت كو دژی ڤێ هەستێن وان یێن ئاینی بلڤن، و پاشی یێن هەمی عەرەبان، حەتا فڵستینێ، ئەڤەژی دێ بزاڤێن ئیسلامی خورتر لێ كن دژایەتیا ئیسرائیلێ بكن، دڤی دەمیدا دێ بیت شەرێ موسلمانان و جوهیان ئەڤەژی دێ پلانا ستراتیژیا ئیسرئیلێ ژناڤ بیت، ژبەركو دڤێت ڕاگەهاندنا مە یا ئیسرئیلێ ڤێ راستیێ ژبیر نەكەت، كو پلانا مە بناڤێ شەرێ عەرەبان وئسرائیلە، ئەڤە راستیەكە و ئارمانجامەیە ،كو ٣٠ سالە سەر كاردكین كو شەری بكین شەرێ عەرەبان و ئیسرائیلی دا كو توشی شەرێ جیهانا ئیسلامی نەبین، چونكی ئەگەر ئەڤە ڕوی بدت ئیسرائیل خوە ل بەر شەرێ جیهانا ئیسلامی ناگریت،و دڤێت دان پێدانێ ب وێ بكین دێ توشی شكەستنێ بیت.


وێ ڕۆژنامەیێ رەخنە بو هندێ گرت داكو شەرێ وان بتنێ دگەل عەرەبان بیت، جیهانا ئیسلامی هەمی هشیار نەبیت و بێژیت شەڕێ عەرەبانە مە چو پەیوەندی پێڤە نینە، لێ گەر ببا شەرێ ئاینی بێگومان زێدەتر ژ ملیارەكا مروڤان دگەل چەند ملیونێن كێم جوهی ژ هژمارێ ڤە،خوسارەتیەكا مەزنە. راستە (سەعەد حەداد) ی پشتەڤانیا ئیسرائیلێ كر، لێ ئیسرائیلێ زانی ئەڤ پشتەڤانیە دێ ب خراب بۆ وان زڤریت لەوا ب وێ پشتەڤانیێ كەیف خوش نەبین.


لەوڕا ب دیتنا من ودیر ژ بەرچاڤ وەرگرتنا ئاین پەروەریێ، بلندكرنا ئالایێ ئیسرائیلی د ڤیستەڤاڵا كوڵن ل ئەلمانیا ژبلی زیانان چو مفای ناگەهینت، ژبەركو:
ئێك: جیهانا ئیسلامێ كو زێدەتر ژ ملیارەك موسلمانان و زێدەتر ٦٠ وەڵاتێن موسلمانان تورەبونەكا زێدە دژی كوردان دێ چێبیت.


دوو: بڤێ دێ نەتەوەیەكێ وەكو عەرەبان بیتە دوژمن، ژبلی بابەتێ ئاینی، وان دژایەتیا دیرو درێژ دگەل ئیسرائل هەیە.


سێ: ئیسرائیل هەرچەندە خودان پێگەهەكێ بهێزە ل ناڤەندا بریارا جیهانی، لێ كورد چ مفای ستراتیژی ژێ نابینن، ژبلی هندەك پەیوەندیێن دبلوماسی.


چوار: كارتێكرنا جوگرافی، كو هەرێما كوردستانێ د ناڤ جیهانا ئیسلامی دایە و پشتەڤانییا ئیسرئیلێ دێ هەمی جیران و نێزیكێن جوگرافی ل كوردان كت دوژمن، ئەڤە ژی دێ زیانەكا گەلەك مەزن ل پاش خوە هێلیت.


لەوما پیدڤیە ل دەمێ گێڕانا ئاهەنگێن رێفراندومێ چاڤ ل هن پرسان بهێنەگێڕان و كونترول لسەر بهێتەكرن، و ڕێك نەهێتەدان هەر تشت ب هەرەمەكی ب ڕێڤە بچیت. هەرچەندە ئەو ئاڵا ژ لایێ هندەك وەڵاتیێن ئاسای ڤە هات بلندكرن، لێ هەر دڤیا سەرپەرشتێن ڤیستەڤاڵێ لێ هوشیارببان.