سەیرە!!!

  دوو شەممە, 18 ئەیلول 2017 12:52

لە كوردستان یان بڵێن مەملەكەتی عەجایبستان سەیر زۆرە، نەك هەر زۆرە كەم شت هەیە سەیر نەبێ‌، سەیرەكان ئەوەنە زۆرن سەیرە كەسێ‌ نەزانێ‌ چەن زۆرن؟!،ئێستا سەیر ئەوەیە شتێ‌ هەبێ‌ سەیر نەبێ‌! نازانم باسی كام سەیر بكەم؟

سەیری ئەوەی دەوڵەتین و دەوڵەتیش نین!، سەیری ئەوەی بەشداری حكومەتی عێراقین و معارەزەشین!، سەیری ئەوەی نەوتی دنیا ئەفرۆشین و پارەشمان نیە!، سەیری ئەوەی گەنم وهەنگوین و پەتاتە هەناردە ئەكەین و یەك رۆژیش سنور داخرێ‌ ئەبێتە گرانی، سەیری ئەوەی دوو ساڵە دەوامی قوتابخانە بایكۆتە و دەوامیشە!، سەیری ئەوەی دۆستی ئەمریكان و دوژمنیشین!، سەیری ئەوی 5ملیۆن كەسین و زیاتر لە 500 دەزگای راگەیاندنی بینرا و بیسترا و خوێندرا و ئەلەكترۆنیمان هەیە!، سەیری ئەوەی لە بۆنە ئاینەیەكانی وەك رۆژانی جەژن و مانگی رەمەزان و رۆژانی هەینی، مزگەوتەكان جمەیان دێ‌، بەڵام یەك زەڕە رەحم بە یەكتری ناكەین و هیچ كاریگەرێكی نیە!، سەیری ئەوەی دەیان رێكخراومان هەیە بەناوی داكۆكی كردن لە مافی ژنان،بەڵام یەكێتی پیاوان ساڵانە ئاماری لێدان و كوشتی پیاوان بەدەستی ژنان بڵاو ئەكاتەوە و قوربانیەكان لە زیاد بووندان!
لەهەموو سەیرتر ئەوەیە، دوو ساڵ پەرلەمان پەكخرا و سەرۆكی پەرلەمان بۆی نەبوو كۆبونەوە بكات و بانگهێشتنامە ئاڕاستەی پەرلەمانتاران بكات،دواتر تەكلیفی دنیای لێكرا ئامادەی دانیشتن نەبوو!،كە دەرگای پەلەمان داخرابوو، هەندێ‌ كەس و لایەن ئەیان وەت ئەبێ‌ ئەم قوفڵە بشكێنین و ئەم درگایە بكەینەوە، كە قوفڵەكە كرایەوە وتیات نابێ‌ بكرێتەوە با هەر قوفڵ بێ‌!.
5 حیزب 9 دانیشتنیان كرد بۆ پۆستی سەرۆكی هەرێم، وتیان قبوڵی ناكەین كەسێك ماوەكەی بەسەر چووە سەرۆك بێ‌، زۆر باشە قبوڵ نەكرا و هەزار و یەك كێشە هاتە ئاراوە،بەڵام تا ئێستاش كەسی ناوبراو بێ‌ ئەوەی منەتباری كەس بێ‌، لانی كەم پیاوەتی لایەنە سیاسیەكان بێ‌،ئەو كەسە تا ئەم لەحزەیە لە پۆستەكەی هەر بەردەوامە!!!.
سەیرێكی تر ئەوەیە سەرمایەدارێك 7 ساڵە كەناڵێكی تەلەفزیۆنی داناوە و، تا ئێستا ئەیوت من تەنها پارە لەم پڕۆژەیە خەرج ئەكەم و یەك دیناریشم تیا دەست ناكەوێ‌، چونكە من هیچم لەكەس ناوێ‌ تەنها ئەوەیە حەز ئەكەم خزمەت بە گەل و نیشتیمان بكەم،بەڵام دواتر وەك زۆر چاوەڕوان كرابوو حیزبێكی تازەی راگەیاند،ئەو بەڕێزە لە قسەكانی تێنەگەیشتم،چونكە وتی من حەزم لە سیاسەت نیە و دەسكاری سیاسەت ناكەم، بەڵام خەونی ئەوەم هەیە داهاتوی ئەم گەلە بگۆڕم و ببەم بە سەرۆك!،وتی هەڵبژاردن ناكرێ‌ بەڵام ناوی قەوارەكەی لە كۆمسیۆن تۆمار ئەكات!،وتی نەوەی كۆن و شتی كۆن تەواو بەسەرچوون، بەڵام ئەگەر پیرێكی نەوەی كۆن واز لە حیزبەكەی بێنی و لەگەڵ من ئیش بكات كێشە نیە و تازە ئەبێتەوە!!!وتی ریفراندۆم هیچ قیمەتێكی نیە، بەڵام زۆر خەتەرە و ئەگەر بكرێ‌ قیامەت ئەخوڵقێ‌،ئاخر ریفراندۆم یان نابێ‌ بێ‌ قیمەت بێ‌ یان نابێ‌ خەتەربێ‌!!!.
سەیرەكان بەردەوامن، بەڕیزێكی تر گەورەترین پلەی حیزبی و حكومی هەبوو،ئێستا ئەویش حیزبێكی تر رائەگەیەنێ‌ و خۆی جیا ئەكاتەوە،لەكاتێكدا بەر لە جیابوونەوەی ئەو و، كەسانی پێش ئەویش، كاتێك هەموویان لە ژێر یەك چەتر بوون، نەیانتوانیوە نمونەیەكی جیاواز پێشكەش بكەن و سەرەنجی خەڵك بۆ خۆیان راكێشن.ئەبێ‌ ئەم حیزبە تازەیە عەسای سیحری پێ‌بێ‌؟
سەیری ئەوەیە لە ماوەی 3 رۆژدا تەنها لەیەك شار 2 حیزبی تازە لەدایك ئەبێ‌،بەداخەوە پێم وایە ئێمە كێشە كەمی حیزبمان نیە، نەخێر بەڵكو كێشەی عەقڵەیەتی سیاسی و یەكتر قبوڵ نەكردنمان هەیە، كێشەی یەكتر سڕینەوە وحساب بۆ یەكتر نەكردنمان هەیە، لە پێناو سەركەوتنی خۆمان كێشەی سفر كردن ومل شكاندنی ئەوی ترمان هەیە،كێشەی ئەوەمان هەیە سیاسەت لەم وڵاتە هیچ بەهایەكی نەماوە و، زۆر ناشیرین و قێزەون بووە!،كێشەی ئەوەمان هەیە دوای سەدەیەك لە خەبات و تێكۆشان هیچ رەمز و سمبولێكما نیە كە هەموومان رێزی لێبگەین و لەسەری كۆك بین!.
بە دڵنیایەوە سەیرەكان تەواو نابن و، هێشتا زۆر سەیری تر ماوە، بەڵام پێم وایە سەیر تر لەم سەیرانە بە رێگاوەیە و، دڵنیابن ئێمە لەم سەیرخانەیە، هەرگیز سەیرمان لێ نابڕێ‌، ئەگەر بڕا،ئەبێتە گەورەترین سەیر!!!

سۆران هەستیار

سۆران عبدالله، لە دایك بووی 1973.ئەندامی كارای  سەندیكای رۆژنامەنوسانی كوردستان.ئەندامی یەكێتی رۆژنامەنوسانی نێودەڵەتی.بەشداربووی چەندین خولی جۆراو جۆری بواری رۆژنامەوانی،وەرگێر و شاعیر و پەخشان نووس.شرۆڤەكاری سیاسی،موحەریری هەواڵ لە كەناڵی سپێدە لە ساڵانی پێشوو، نوسەری  بەردەوامی رۆژنامەی یەكگرتوو پێش وەستانی رۆژنامەكە.